Mise 7 - Labib An Kreol Seselwa

Izrael I dan Degradasyon Moral

¹ Gran maler lo mwan! Mon'n vin parey sa enn ki, apre rekolt fri lete, apre ki lasezon rezen in fini, napa en sel grap pour manze, ni en sel fig kont sezon ki mon kontan.

² Dimoun ki fidel in disparet dan pei. Nepli annan en sel dimoun onnet. Zot tou, zot pe tranpe pour fer koule disan. Sakenn in met en pyez kont son prosen.

³ Zot bann eksper dan sa ki mal. Bann sef ek bann ziz pe esper gous. Dimoun enportan i fer konnen sa ki zot anvi. Zot manigans ansanm pour fer ekstorsyon.

⁴ Sa enn ki meyer parmi zot i parey rons. Sa enn ki pli onnet i pir ki en zarbis pikan. Sa zour rann kont ki bann santinel in anonse, in arive. Aprezan, zot dan konfizyon.

⁵ Pa bezwen fye lo ou zanmi, pa fer konfyans ou bann pros. Pa ouver ou labous avek sa fanm ki dormi dan ou lebra.

⁶ Annefe, en garson i ensilte son papa, e en fiy i opoz son manman, en belfiy i opoz son belmer. Lennmi i dan ou prop fanmir.

⁷ Mwan, mon pou tourn ver SENYER, mon pou esper Bondye, mon sover. Mon Bondye pou antann mwan.

Senyer I Sov Son Pep

⁸ Ou mon lennmi! Pa rezoui lo mwan. Si mon'n tonbe, mon pou leve. Si mon pe asiz dan fernwanr, SENYER i mon lalimyer.

⁹ Mon bezwen siport lakoler SENYER, akoz mon'n fer pese kont li. Me i pou defann mon lakoz ek mon drwa. I pou anmenn mwan dan lalimyer e mon pou war son lazistis.

¹⁰ Mon lennmi pou war sa e i pou ganny kouver avek laont. Sa enn ki ti abitye demande: Oli SENYER, ou Bondye, pou vin en spektak. I pou ganny kraze anba lipye, parey labou dan semen.

¹¹ Sa zour, ou bann miray pou ganny rekonstri. Sa menm zour, ou bann teritwar pou agrandi.

¹² Sa zour, i annan ki pou vin kot ou sorti Asiri ek bann lavil Lezip, depi Lezip ziska kot larivyer Zourden, depi en lanmer ziska lot, e depi en montanny ziska lot.

¹³ Me later pou vin dezer, akoz son bann zabitan, akoz rezilta mesanste son zabitan.

¹⁴ SENYER! Avek ou baton berze, kondwir ou pep. I pe reste tousel dan lafore, parmi bann pye fri. Parey dan letan lontan, anmenn li dan bann laplenn Basann, dan Galaad.

¹⁵ Mon pou fer li war bann mervey parey dan lepok ki ou ti sorti Lezip.

¹⁶ Bann nasyon pou war sa e zot pou onte malgre zot gran lafors. Zot pa pou konnen ki pou dir e fer konmsi zot pa tande.

¹⁷ Zot pou manz lapousyer parey serpan, ek lezot reptil. An tranblan, zot pou sorti dan zot fortres pour al ver SENYER, nou Bondye. Zot pou dan lafreyer, zot pou per ou.

Fidelite ek Konpasyon Bondye

¹⁸ Napa bondye ki parey ou, SENYER; ou efas fot e pardonn pese restan ou pep. Ou pa gard ou lakoler pour touzour, me ou pran plezir montre ou fidelite.

¹⁹ Ou pou pran ankor konpasyon pour nou. Ou pou met nou pese anba ou lipye. Ou pou zet nou pese dan profonder lanmer.

²⁰ Ou pou montre ou fidelite anver Zakob e ou lanmitye anver Abrahanm, avek ki otrefwa, par en serman, ou ti promet nou bann zanset.