Mise 6 - Labib An Kreol Seselwa

Senyer I Akiz Izrael

¹ Ekout sa ki SENYER i deklare: Leve, defann ou devan bann montanny; fer tande ou lavwa devan bann kolin.

² Bann montanny! Ekout lakizasyon ki SENYER i fer. Bann solid fondasyon later! Ekout lakizasyon ki SENYER i annan kont son pep. I'n konmans en prose kont Izrael.

³ Mon pep! Ki mon'n fer ou? Ki mon'n fer pour fatig ou? Reponn mwan!

⁴ Mon'n fer ou monte sorti Lezip. Mon'n delivre ou dan lesklavaz. Mon'n donn ou koman sef Moiz, Aaron ek Mirianm.

⁵ Mon pep! Rapel byen konplo Balak, lerwa Moab; sa ki Balaanm, garson Beor, ti reponn li; e sa ki ti arive kan ou ti traverse depi Sitim ziska Gilgal. Alor, ou ava rekonnet laviktwar ki SENYER in fer.

Sa ki Senyer I Egzize

⁶ Avek kwa mon pou prezant devan SENYER, kan mon pou ador Bondye ki lao dan lesyel? Eski mon devre ofer li sakrifis konplet, avek zenn toro enn an?

⁷ Eski bann milye mouton mal, bann milye larivyer delwil pour fer plezir SENYER? Eski mon devre ofer mon lene garson pour pardon nou bann pese? Eski mon bezwen donn mon zanfan, pour mon prop fot?

⁸ Ou ki en imen, SENYER in fer ou konnen sa ki byen. La sa ki SENYER i demann ou fer: Respekte lazistis, montre labonte, mars dan limilite avek ou Bondye.

Senyer I Pini Frod ek Vyolans

⁹ SENYER i koz avek zabitan lavil: I pou sov sa enn ki annan respe pour son non. Ekoute! Tribi Zida e zot lasanble dan lavil!

¹⁰ Eski mon kapab kontinyen siport sa bann trezor malaki, sa bann mezir fose e modi dan lakaz bann malfeter?

¹¹ Eski mon pou kontinyen toler zot bann balans fose e aksepte ki zot met bann pwa trike dan zot sak?

¹² Ou bann ris i ranpli avek vyolans. Ou bann zabitan, zot bann manter. Dan zot labous, i sorti zis parol tronpri.

¹³ Pour sa rezon, mon'n konmans tap ou. Mon pe detri ou akoz ou bann pese.

¹⁴ Ou pou manze me ou pou reste lafen. Tou sa ki ou pou met dekote pa pou reste; sa ki ou reisi met dekote, mon pou detrir par lepe.

¹⁵ Ou pou senmen me ou pa pou rekolte. Ou pou kraz zoliv me ou pa pou servi son delwil. Ou pou kraz rezen me ou pa pou bwar diven.

¹⁶ Ou'n gard bann lalwa Omri, e tou bann pratik lafanmir Akab; ou'n swiv tou zot konsey. Alor, mon pou detri ou lavil; dimoun pou monk bann zabitan e ou pou tonm dan laont.