Mise 5 - Labib An Kreol Seselwa

¹ Aprezan, zabitan Zerizalenm! Sizle zot lekor koman siny dey. Lennmi pe antour nou, ou'n ganny anserkle. Avek en baton, zot tap sef Izrael lo son lazou.

Promes en Sef ki Pou Sorti Betlehenm

² Ou, Betlehenm Efrata! Ou pli pti parmi bann klan dan Zida. Kot ou, pou sorti pour mwan, sa enn ki pou gouvern Izrael. Son lorizin i remont dan lwen, lontan.

³ Pour sa rezon, Bondye pou abandonn zot, ziska letan ki akouse dan douler. Alor, leres son bann frer ava retournen pour zwenn avek pep Izrael.

⁴ Ou pou leve e nouri zot avek pwisans SENYER, avek mazeste non SENYER, son Bondye. Son pep ava viv an sekirite, e li, i ava ganny glorifye partou dan lemonn.

⁵ Li menm ki pou anmenn lape! Si bann Asiriyen i vin dan nou pei e penetre dan nou bann pale, nou pou anvoy kont zot set berze, wit sef parmi lepep.

⁶ Zot pou diriz Asiri avek lepe, e pei Nenmrod avek zarm. Si bann Asiriyen i vin dan nou pei, si zot travers nou frontyer e penetre dan nou teritwar, konmsa, ki nou pou ganny delivre.

Restan Izrael dan Lavenir

⁷ Leres desandan Zakob, parmi bann nasyon nonbre, ava parey en laroze ki sorti kot SENYER, parey en zanbren lapli lo zerb, e ki pa depann lo okenn imen. Zot pa esper nanryen sorti kot personn.

⁸ Alor, parmi bann nasyon nonbre, leres desandan Zakob, pou koman en lyon parmi bann zannimo lafore, parey en zenn lyon dan en troupo mouton. Partou kot i pase, i kraz e desir son bann viktim, san ki personn i kapab vin delivre zot.

⁹ SENYER i deklare: Ou pou lev lanmen kont ou bann ladverser e tou ou bann lennmi pou ganny detri.

¹⁰ SENYER i deklare: La sa ki pou arive sa zour: Mon pou detri ou bann seval ek ou bann kales lager.

¹¹ Mon pou detri tou lavil dan ou pei e demoli ou bann fortres.

¹² Mon pou detri tou sorsye kot ou; pou nepli annan deviner, kot ou.

¹³ Mon pou detri tou stati ek poto sakre kot ou; ou pou arete prostern devan sa ki'n ganny fabrike par ou lanmen.

¹⁴ Mon pou detri ou bann poto sakre kot ou e kraz ou bann lavil.

¹⁵ Apre, avek en gran lakoler, mon pou tir vanzans lo bann nasyon ki pa'n obei mwan.