Mise 4 - Labib An Kreol Seselwa

Renny Lape Iniversel

¹ Dan lavenir, kot montanny tanp SENYER i ete pou vin montanny pli o. I pou vin pli o ki tou bann kolin. Tou bann pep pou vin rasanble la.

² Plizyer nasyon pou vin la. Zot pou dir: Vini! Annou mont ver montanny SENYER, ver tanp Bondye Zakob. I ava fer nou konn son semen.

³ I ava rann zizman ant bann nasyon. I ava ziz bann nasyon pwisan ki menm lwen. Avek zot lepe, zot pou fabrik pyos e avek zot lans zot pou fer fosi. Pou nepli annan lager ant bann nasyon. Zot pou nepli aprann fer lager.

⁴ Sakenn pou viv anba son prop tonnel rezen. Zot pou viv anpe anba zot pye fig, san ki personn i fer zot per. SENYER liniver ki deklare.

⁵ Si sak nasyon pe obei son bondye, nou, nou pou ador e obei nou SENYER, nou Bondye pour touzour e touzour.

Izrael Pou Sorti Legzil

⁶ SENYER i deklare: Sa zour, mon pou rasanble bann ki bwete. Mon pou reini sa ki'n ganny disperse e bann ki mon'n maltrete.

⁷ Avek sa bann ki bwete, mon pou fer en restan; avek bann ki ti'n ganny rezete, mon pou fer en nasyon for. Alor, SENYER pou vin zot lerwa pour touzour.

⁸ Ou, Tour ki vey lo troupo, kolin fiy Siyon! Ou pou retrouv ou lotorite ki ou ti annan avan. Zerizalenm pou vin lavil kapital.

Traka ek Delivrans Zerizalenm

⁹ Akoz ou pe kriye aprezan? Eski napa lerwa kot ou? Eski ou konseye in mor, pour ki douler i pran ou parey en fanm ki pe akouse?

¹⁰ Zabitan Zerizalenm! Pliy an de e plennyen, parey en fanm dan lakousman. La aprezan, ou ava kit lavil pour al kanpe dan laplenn, ou pou al Babilonn. Apre, ou ava ganny delivre. Laba, SENYER ava sov ou dan lanmen ou bann lennmi.

¹¹ Aprezan, bokou nasyon in rasanble kont ou. Zot ki dir: Zerizalenm pou ganny detri, nou ava war spektak larin Siyon.

¹² Me zot pa konn plan SENYER; zot pa konpran son proze. In rasanble zot parey pake dible la kot zot ganny bate.

¹³ Zabitan Zerizalenm! Leve, al bat dible. Mon pou fer ou osi for ki en bef avek korn an fer, e sabo an bronz. Ou ava kas an morso bokou nasyon. Bann larises ki ou pran, ava ganny rezerve pour mwan, mwan SENYER, met liniver antye.