Matye 8 - Labib An Kreol Seselwa

Zezi I Geri En Lepre

¹ Kan Zezi ti desann sorti lo montanny, en gran lafoul ti swiv li.

² Alor, en zonm ki ti annan en maladi parey lalep ti vin kot Zezi. I ti tonm lafas ater devan li e sipliy li, “Senyer, si oule, ou kapab fer mwan vin pir.”

³ Zezi ti lev son lanmen e tous li. I ti dir, “Dakor, mon oule ki ou vin pir.” Deswit son maladi ti geri.

⁴ Apre, Zezi ti dir li, “Fer atansyon! Pa dir sa avek personn, me al prezant ou devan pret. Apre, al ofer lofrann ki Moiz in ordonnen. Sa i ava prouve ki ou'n geri.”

Zezi I Geri Serviter En Zofisye Romen

⁵ Zis koman Zezi ti pe antre dan lavil Kapernaoum, en zofisye larme Romen ti vin kot li e sipliy li,

⁶ “Senyer, mon serviter i malad dan lakour, i paralize e i pe soufer bokou.”

⁷ Zezi ti dir li, “Mon ava vin geri li.”

⁸ Me sa zofisye ti reponn, “Senyer, mon pa merite ki ou antre dan mon lakaz. Me dir zis en mo e mon serviter ava geri.

⁹ Mwan osi, malgre ki mon anba lotorite, mon annan en bann solda anba mon lord. Si mon dir avek enn: Ale! I ale. Si mon dir en lot: Vini! I vini. Si mon dir mon serviter: Fer sa! I fer li.”

¹⁰ Kan Zezi ti antann sa, i ti annan ladmirasyon pour sa zofisye. I ti dir avek bann ki ti pe swiv li, “Mon dir zot, sa i laverite: Zanmen mon'n war en tel lafwa kot personn dan Izrael.

¹¹ Mon dir zot ki bokou dimoun pou sorti dan Les e dan Was, pou pran plas dan repa avek Abrahanm, Izaak ek Zakob, dan Rwayonm lesyel.

¹² Me bann ki ti ganny destinen pour Rwayonm, pou ganny zet deor dan fernwanr. La, zot pou plere e grens ledan.”

¹³ Apre, Zezi ti dir sa zofisye, “Al se ou. Sa ki ou'n demande avek lafwa, in ganny realize.” Deswit, son serviter ti geri.

Zezi I Geri En Kantite Malad

¹⁴ Kan Zezi ti al kot Pyer, i ti war belmer Pyer lo lili, malad avek lafyev.

¹⁵ Zezi ti tous son lanmen e lafyev ti kit li. I ti leve e servi Zezi.

¹⁶ Ler aswar ti pe fer, zot ti anmenn kot Zezi en kantite dimoun tourmante par bann move lespri. Par son parol, Zezi ti sas sa bann move lespri. I ti osi geri tou bann malad.

¹⁷ Alor, sa ki profet Ezai ti'n anonse, ti ganny realize: I'n pran nou soufrans e port lo li nou maladi.

Bann ki Aksepte Swiv Zezi

¹⁸ Kan Zezi ti war sa lafoul otour li, i ti donn lord son bann disip pour al lot kote lak avek li.

¹⁹ En profeser Lalwa ti apros li. I ti dir li, “Met! Mon pare pour swiv ou partou kot ou ale.”

²⁰ Zezi ti dir li, “Bann renar i annan zot trou, zwazo dan lesyel i annan zot nik, me Fis-de-Lonm napa en landrwa kot i kapab repoz latet.”

²¹ En lot disip ti dir li, “Senyer! Permet mwan al anter mon papa avan.”

²² Me Zezi ti dir li, “Swiv mwan, e les bann mor anter zot bann mor.”

Zezi I Kalme En Gro Tanpet

²³ Apre, Zezi ti anbark dan en kannot e son bann disip ti swiv li.

²⁴ En sel kou, en gro divan ti leve lo lak. Divan ti sitan for, ki kannot ti preski kouver avek laroul. Me Zezi ti pe dormi.

²⁵ Bann disip ti apros Zezi e lev li. Zot ti dir li, “Senyer, sov nou! Nou pe mor!”

²⁶ Zezi ti dir zot, “Akoz zot per? Zot napa lafwa!” Apre, i ti leve, e i ti reprimann divan ek delo lak, e movetan ti kalmi.

²⁷ Zot tou, zot ti etonnen e zot ti dir, “Lekel sa zonm, ki menm divan ek delo i obei li?”

Zezi I Geri De Zonm ki Posede avek Lespri Demon

²⁸ Kan Zezi ti ariv lot kote lak, dan teritwar bann Gadarenyen, de zonm ki ti sorti parmi bann latonm, ti vin rankontre li. Sa de zonm ti posede avek plizyer demon. Zot ti sitan danzere ki personn pa ti oze pas par sa semen.

²⁹ Zot ti konmans kriye, “Ki ou pe rode avek nou, Garson Bondye? Eski ou'n vin isi pour tourmant nou avan ler?”

³⁰ Pa tro lwen, ti annan en gran troupo koson ki ti pe manze.

³¹ Bann demon ti sipliy Zezi, “Si ou sas nou, anvoy nou dan sa troupo koson.”

³² Zezi ti dir zot, “Ale.” Sa bann demon ti sorti dan sa de zonm e zot ti antre dan bann koson. Alor, troupo koson antye ti tay an desandan sa presipis e sot dan lak kot zot ti noye.

³³ Bann gardyen ti taye. Zot ti al anvil kot zot ti rakont zistwar sa de zonm ki ti posede par demon e sa ki ti'n arive avek zot.

³⁴ Alor, tou bann zabitan lavil ti sorti e al rankontre Zezi. Kan zot ti war li, zot ti sipliy li pour kit zot teritwar.