Matye 7 - Labib An Kreol Seselwa

Pa Ziz Lezot

¹ Pa ziz personn e ou pa ava ganny zize.

² Bondye pou ziz ou parey ou ziz lezot, e i pou servi avek ou, menm mezir ki ou'n servi anver zot.

³ Ki mannyer ou war lapay ki dan lizye ou frer, me ou pa remark sa poto ki dan pour ou?

⁴ Oubyen, ki mannyer ou kapab dir ou frer: Les mwan tir sa lapay dan ou lizye, kan ou menm, ou annan en poto dan sa ki pour ou?

⁵ Ipokrit! Tir poto ki dan ou lizye avan. Apre, ou ava war ase kler pour tir lapay ki dan lizye ou frer.

⁶ Pa donn avek lisyen sa ki pour Bondye. Zot kapab retourn kont ou e desir ou. Pa zet ou bann perl devan bann koson. Zot kapab pil lo la.

Demande, Rode e Frape

⁷ Demande, zot ava gannyen. Rode, zot ava trouve. Tape, laport ava ouver.

⁸ Annefe, sa enn ki demande, i resevwar. Sa enn ki rode, i trouve. Laport i ouver pour sa enn ki frape.

⁹ Lekel parmi zot, ava donn son garson en ros, si i demann en dipen?

¹⁰ Oubyen, si i demann en pwason, eski i pou donn li en serpan?

¹¹ Si zot, move koman zot ete, zot konn donn zot zanfan bann bon keksoz, a pli fort rezon zot Papa ki dan lesyel, ava donn bon keksoz sa bann ki demann li.

¹² Tou sa ki ou oule ki lezot i fer pour ou, fer parey pour zot: Sanmenm sa ki Lalwa Moiz ek bann profet i ansennyen.

Laport Etrwat

¹³ Antre par laport etrwat! Annefe, laport ki kondwir ver lanmor i larz. I annan bokou ki pas par la.

¹⁴ Me laport e semen ki anmenn ver lavi i etrwat e difisil. Napa bokou ki trouv li.

En Pye Dibwa I Donn Son Fri

¹⁵ Mefye zot bann fo profet. Zot vin kot ou degize dan lapo mouton, me anndan, zot en bann loulou feros.

¹⁶ Zot ava ganny rekonnet par zot fri. Ou pa rekolte rezen lo pye pikan, ni fig lo pye rons.

¹⁷ Tou bon pye fri i raport bon fri, tandis ki en move pye fri i prodwi move fri.

¹⁸ En bon pye fri pa zanmen raport move fri e en move pye fri, pa zanmen donn bon fri.

¹⁹ Tou pye dibwa ki pa raport bon fri i ganny koupe e zete dan dife.

²⁰ Alor, zot ava rekonnet bann fo profet par zot fri.

Dir ek Fer

²¹ Pa tou sa ki apel mwan: Senyer, Senyer, ki pou antre dan Rwayonm lesyel, me zis sa bann ki fer lavolonte mon Papa ki dan lesyel.

²² Alor, kan zour zizman pou arive, bokou pou dir mwan: Senyer, Senyer! Dan ou non, nou ti profetize; dan ou non, nou ti sas bann move lespri; dan ou non, nou'n fer en kantite mirak.

²³ Alor, mon pou reponn zot: Mon pa'n zanmen konn zot. Sorti la lwen ek mwan, zot ki pratik lemal.

Parabol De Lakaz

²⁴ Alor, sa enn ki ekout mon bann parol e met zot an pratik, pou parey en zonm saz ki konstri son lakaz lo ros.

²⁵ Lapli i tonbe, larivyer i deborde, e divan i soufle lo sa lakaz. Me i pa tonbe, akoz i'n ganny konstri lo ros.

²⁶ Me en dimoun ki ekout mon bann parol e ki pa met zot an pratik, pou parey en zonm fou ki konstri son lakaz lo disab.

²⁷ Lapli i tonbe, larivyer i deborde, divan i soufle for lo sa lakaz. Lakaz in tonbe e i'n ganny konpletman detri!

Lotorite Zezi

²⁸ Kan Zezi ti'n fini ansenny zot, lafoul ti tre enpresyonnen par son lansennyman.

²⁹ Annefe, i pa ti ansenny parey zot bann profeser Lalwa, me avek lotorite.