Matye 6 - Labib An Kreol Seselwa

Lansennyman lo Mannyer Fer Lomonn

¹ Fer atansyon ou akonpli ou bann devwar relizye an piblik, zis pour fer ou ganny remarke. Sankwa, ou Papa ki dan lesyel pa pou rekonpans ou.

² Donk, kan ou fer lomonn, pa bezwen fer tapaz pour atir latansyon, parey bann ipokrit i fer dan sinagog e dan semen. Zot fer sa pour ganny felisite. Mon dir zot, sa i laverite: Sa dimoun in deza ganny son rekonpans.

³ Me ou, kan ou fer lomonn, ou lanmen gos pa devre konnen sa ki ou lanmen drwat i fer.

⁴ Ou bon aksyon i devre reste sekre. Ou Papa ki war ou aksyon dan sekre, ava rekonpans ou.

Lansennyman lo Lapriyer

⁵ Kan zot priye, pa fer parey bann ipokrit. Zot kontan debout pour priye dan sinagog e dan tou kwen semen pour ki tou dimoun i war zot. Les mwan dir zot: Sa bann dimoun in deza ganny zot rekonpans.

⁶ Me ou, kan ou priye, antre dan ou lasanm, ferm laport e priy ou Papa ki la dan sa landrwa sekre. Ou Papa ki war dan ou profon sekre, ava rekonpans ou.

⁷ Kan zot priye, pa servi en kantite parol parey bann non-Zwif: Zot krwar ki Bondye ava ekout zot si zot koz bokou.

⁸ Pa imit zot, akoz zot Papa i konnen sa ki zot bezwen, avan menm ki zot demann li.

⁹ La ki mannyer zot devre priye: Nou Papa ki dan lesyel! Nou demande ki ou non sen i ganny glorifye,

¹⁰ e ki ou renny i ganny etabli; ou lavolonte ava ganny akonpli lo later, parey dan lesyel.

¹¹ Donn nou ozordi, nou dipen pour sak zour.

¹² Pardonn nou, nou lofans, parey nou pardonn bann ki'n ofans nou.

¹³ Pa les nou tonm dan tantasyon. Me delivre nou kont ladverser. Akoz ou ki posed larwayote, pwisans ek mazeste pour touzour. Amenn.

¹⁴ Annefe, si zot pardonn bann dimoun ki'n fer zot ditor, zot Papa ki dan lesyel ava osi pardonn zot.

¹⁵ Me si zot pa pardonn lezot dimoun, zot Papa osi pa pou pardonn zot, lemal ki zot in fer.

Lansennyman lo Size Zenn

¹⁶ Kan zot zennen, i pa neseser pran en figir tris, parey bann ipokrit: Zot sanz figir pour ki tou dimoun i war ki zot pe zennen. Mon dir zot, sa i laverite: Sa bann dimoun in deza ganny zot rekonpans.

¹⁷ Me ou, kan ou zennen, lav ou figir e parfim ou latet.

¹⁸ Pa les dimoun remarke ki ou pe zennen. Zis ou Papa ki la dan sekre ki konnen. Ou Papa ki war tou sa ki ou fer an sekre, ava rekonpans ou.

Larises dan Lesyel

¹⁹ Pa anmas zot larises lo later, kot i ganny detri par lever ek larouy, kot voler i kas lakaz pour vole.

²⁰ Plito, anmas zot larises dan lesyel, la kot ni karya, ni larouy pa pou kapab detri, e ni voler pa pou kapab kas laport pour vole.

²¹ Annefe, la kot ou larises i ete, ou leker pou osi la.

Lalimyer Lekor

²² Lizye i lalanp ou lekor. Alor, si ou lizye i an bonn sante, ou lekor antye pou dan lalimyer.

²³ Me si ou lizye i malad, ou lekor antye pou dan fernwanr. Alor, si lalimyer ki dan ou, i parey fernwanr, ou pou vreman dan en gran fernwanr.

Bondye oubyen Larzan

²⁴ Personn pa kapab servi de met. Annefe, swa i pou ay enn e kontan lot; swa i pou devoue anver enn e mepriz lot. Ou pa kapab servi Bondye ek larzan anmenmtan.

Konfyans dan Bondye

²⁵ Pour sa rezon, mon dir zot: Pa trakase lo sa ki zot pou manze e lo sa ki zot pou bwar; ni pour konnen kwa ki zot bezwen pour viv oubyen kwa ki pou mete. Eski lavi pa i pli enportan ki manze, e lekor pa i pli enportan ki lenz?

²⁶ Get bann zwazo: Zot pa ni senmen, ni rekolte, e ni met nanryen an rezerv. Pourtan, zot Papa ki dan lesyel i nouri zot. Eski zot pa vo bokou plis ki bann zwazo?

²⁷ Lekel parmi zot ki krwar i kapab viv pli lontan kan i pran traka?

²⁸ E akoz zot bezwen trakase lo size lenz? Gete ki mannyer bann lis dan laplenn i pouse. Zot pa ni travay, ni fer latwal.

²⁹ Pourtan, mon dir zot: Menm Salomon dan tou son mazeste, pa ti osi byen abiye ki en sel sa bann lis.

³⁰ Ozordi, Bondye i abiy byen sa bann zerb dan laplenn. Demen, zot pou ganny zet dan dife. Alor, a pli fort rezon, pa i ava abiy zot? Zot napa bokou lafwa.

³¹ Alor, pa bezwen pran traka e demande: Ki nou pou manze? Ki nou pou bwar, oubyen ki nou pou mete?

³² Dimoun ki pa konn Bondye ki touzour pe rod tousala. Me zot Papa ki dan lesyel i konn tou sa ki zot bezwen.

³³ Rod plito Rwayonm Bondye ek son lazistis, e li menm i ava donn zot leres ki zot bezwen.

³⁴ Alor, pa trakase pour demen. Demen ava li menm anmenn ase traka konmsa. Traka ozordi i ase pour ozordi.