Matye 4 - Labib An Kreol Seselwa

Tantasyon Zezi par Dyab

¹ Alor, Lespri ti anmenn Zezi dan dezer, pour li ganny tante par dyab.

² Apre ki i ti'n reste 40 zour ek 40 nwit san manze, Zezi ti lafen.

³ Dyab ti vin tant Zezi. I ti dir li, “Si ou Garson Bondye, donn lord ki sa bann ros i vin dipen.”

⁴ Me Zezi ti reponn li, “Lekritir i deklare: Zonm pa pou viv zis lo dipen, me lo tou parol ki sorti dan labous Bondye.”

⁵ Alor, dyab ti anmenn Zezi ziska Zerizalenm, e met li debout lo lapwent twa Tanp.

⁶ Dyab ti dir li, “Si ou Garson Bondye, zet ou anba. Annefe, i'n ekri: Bondye pou donn lord son bann lanz lo ou size: Zot pou anmenn ou lo zot lanmen, pangar ou konny ou lipye avek en ros.”

⁷ Zezi ti reponn li, “I'n osi ekri: Ou pa devre tant Senyer ou Bondye.”

⁸ Ankor en fwa, dyab ti anmenn Zezi lo en montanny byen o. I ti montre li tou bann rwayonm partou lo later ek zot splander.

⁹ Dyab ti dir li, “Mon pou donn ou tousala, si ou met ou azenou e ador mwan.”

¹⁰ Zezi ti reponn li, “Sorti la, Satan! Ale. I'n ekri: Se Senyer, ou Bondye ki ou devre adore e li tousel ki ou devre servi!”

¹¹ Alor, dyab ti kit li, e bann lanz ti vin servi li.

Zezi I Konmans Son Minister dan Galile

¹² Kan Zezi ti tande ki Zan ti'n ganny met dan prizon, i ti al dan Galile.

¹³ I ti kit Nazaret e i ti al reste Kapernaoum, obor lak Galile, dan teritwar Zabilon ek Neftali.

¹⁴ Sa ti arive pour ki parol profet Ezai i ganny realize:

¹⁵ Later Zabilon, later Neftali, semen lo kote lanmer, pei lot kote larivyer Zourden! Galile, kot bann nasyon etranze i reste!

¹⁶ Lepep ki ti pe asiz dan fernwanr, in war en gran lalimyer. Pour bann ki ti pe asiz dan pei, dan fernwanr lanmor, en lalimyer in leve parmi zot!

¹⁷ Apartir sa moman, Zezi ti konmans prese. I ti dir: Sanz zot mannyer viv, akoz Rwayonm lesyel i pros!

Zezi I Apel Kat Peser

¹⁸ En zour, Zezi ti pe marse obor lak Galile. I ti war de frer ki ti peser: Simon, ki zot ti apel Pyer, ek son frer Andre. Zot ti pe pas lasenn dan lak.

¹⁹ Zezi ti dir zot, “Swiv mwan e mon ava fer zot lapes zonm.”

²⁰ Deswit, zot ti kit zot lasenn e swiv li.

²¹ En pe pli lwen, Zezi ti war de lot frer, Zak ek Zan, de garson Zebede. Zot ti dan kannot avek zot papa Zebede, e zot ti pe repar zot lasenn. Zezi ti apel zot.

²² Deswit, zot ti kit zot kannot ek zot papa e swiv Zezi.

Zezi I Ansennyen e I Geri

²³ Zezi ti al partou dan Galile. I ti prese dan bann sinagog e anons Bonn Nouvel konsernan Rwayonm Bondye. I ti geri toudsort maladi ek soufrans parmi lepep.

²⁴ Son renonmen ti fannen partou dan Lasiri antye. Zot ti anmenn kot li bann ki ti annan toudsort maladi e ki ti pe soufer: Bann ki ti posede par demon, bann ki ti annan bebelouka ek bann ki ti paralize. Zezi ti geri zot tou.

²⁵ En gran lafoul ti swiv li sorti depi Galile, dan rezyon Dekapol, depi Zerizalenm, Zide e dan teritwar ki lo lot kote larivyer Zourden.