Matye 25 - Labib An Kreol Seselwa

Parabol Dis Zenn Fiy

¹ Rwayonm lesyel i kapab ganny konpare avek dis zenn fiy ki pran zot lalanp pour al rankontre nouvo marye.

² Senk parmi sa bann fiy ti fol e senk ti saz.

³ Sa senk ki ti fol ti pran zot lalanp, me zot pa ti anmenn en rezerv delwil avek zot.

⁴ Me sa senk fiy ki ti saz ti anmenn en rezerv delwil avek zot lalanp.

⁵ Nouvo marye ti tarde pour arive. Alor, zot tou, zot ti asoupi e zot ti dormi.

⁶ Dan milye lannwit, zot ti antann kriye: Nouvo marye in arive! Sorti, al zwenn li!

⁷ Alor, tou sa bann zenn fiy ti leve e prepar zot lalanp.

⁸ Sa bann fiy fol ti dir avek sa bann ki saz: Donn nou en pe zot delwil, akoz nou lalanp pe tennyen.

⁹ Me bann fiy saz ti reponn: Non, pa pou annan ase pour nou e pour zot. Al plito aste dan laboutik.

¹⁰ Letan ki zot ti'n al aste delwil, nouvo marye ti arive. Bann zenn fiy ki ti'n pare, ti antre dan festen maryaz, e laport ti ganny fermen.

¹¹ Plitar, lezot zenn fiy ti arive. Zot ti kriye: Senyer, senyer! Ouver laport!

¹² Nouvo marye ti reponn: Mon dir zot, sa i laverite: Mon pa konn zot.

¹³ Zezi ti azoute, “Veye alor, akoz zot pa konn ni zour ni ler.”

Parabol Trwa Serviter

¹⁴ “Rwayonm lesyel i parey en zonm ki ti pe prepare pour li al vwayaze. I ti apel son bann serviter e met zot ansarz son propriyete.

¹⁵ I ti donn sakenn son serviter dapre son kapasite: Enn senk talan; en lot de, e en trwazyenm enn. Apre, i ti ale.

¹⁶ Sa serviter ki ti'n ganny senk talan ti fer komers avek sa larzan e i ti ganny ankor senk.

¹⁷ Sa enn ki ti ganny de talan ti fer parey e i ti ganny ankor de lezot talan.

¹⁸ Sa enn ki ti ganny en sel talan, ti al fouy en trou dan later e kasyet larzan son met.

¹⁹ Apre en bon pe letan, met sa bann serviter ti retournen e fer zot rann kont.

²⁰ Sa serviter ki ti'n ganny senk talan ti vin devan e donn li ankor senk talan. I ti dir: Met! Ou ti'n donn mwan senk talan; la ankor senk ki mon'n gannyen.

²¹ Son met ti dir li: Ou'n byen fer. Ou en bon e fidel serviter! Ou'n fer byen dan en pti zafer; alor, mon pou donn ou en pli gran responsabilite. Vin partaz mon lazwa.

²² Sa serviter ki ti'n ganny de talan ti antre. I ti dir: Met! Ou ti donn mwan de talan. Gete! La de lot ki mon'n gannyen.

²³ Son met ti dir li: Ou'n byen fer. Ou en bon e fidel serviter. Ou'n fer byen dan en pti zafer; alor, mon pou donn ou en pli gran responsabilite. Vin partaz mon lazwa.

²⁴ Sa serviter ki ti'n ganny en talan ti antre e dir: Met! Mon konnen ki ou en dimoun sever; ou rekolte kot ou pa'n senmen, e ou rekolte kot ou pa'n plante.

²⁵ Alor, mon ti per e mon ti al kasyet ou larzan dan later. La ou larzan.

²⁶ Son met ti reponn li: Ou en serviter ki move e pares! Ou ti konnen ki mon rekolte kot mon pa'n senmen e ki mon rekolte kot mon pa'n plante.

²⁷ Akoz ou pa ti met mon larzan dan labank? Konmsa, kan mon ti ava retournen, mon ti ava ganny mon larzan avek lentere.

²⁸ Son met ti donn lord: Pran sa talan ki avek li e donn avek sa enn ki annan dis.

²⁹ Annefe, sa enn ki annan, pou ganny plis ankor, e annabondans. Me sa enn ki napa, pou ganny arase sa pti gin ki i ti kapab ankor annan.

³⁰ Pran sa serviter initil e zet li deor dan fernwanr; la kot zot pou plere e grens ledan.”

Dernyen Zizman

³¹ “Kan Fis-de-Lonm pou vini dan son mazeste avek tou son bann lanz, i pou asiz lo son tronn rwayal.

³² Tou nasyon pou ganny rasanble devan li. I pou separ zot dan de group parey en berze i separ bann mouton ek bann kabri.

³³ I pou met bann mouton lo son kote drwat e bann kabri lo son kote gos.

³⁴ Alor, lerwa pou dir avek sa bann lo son kote drwat: Vini, zot ki mon Papa in beni! Vin erit Rwayonm ki'n ganny prepare pour zot depi kreasyon lemonn.

³⁵ Mon ti lafen, zot ti donn mwan manze. Mon ti swaf, zot ti donn mwan delo. Mon ti en etranze, e zot ti resevwar mwan se zot.

³⁶ Mon ti touni, zot ti donn mwan lenz. Mon ti malad, zot ti pran swen avek mwan. Mon ti dan prizon, zot ti vin vizit mwan.

³⁷ Alor, bann ki'n fer lavolonte Bondye pou demann li: Senyer! Kan eski ou ti lafen e ki nou ti donn ou manze, oubyen swaf e ki nou ti donn ou delo?

³⁸ Kan eski nou ti war ou en etranze e ki nou ti resevwar ou se nou, oubyen touni e nou ti donn ou lenz?

³⁹ Kan eski nou ti war ou malad, oubyen dan prizon e ki nou ti vin vizit ou?

⁴⁰ Lerwa pou reponn zot: Mon dir zot, sa i laverite: Sak fwa ki zot ti fer sa, pour enn bann pli pti parmi mon bann frer, se anver mwan, ki zot ti fer li!

⁴¹ Apre, lerwa pou dir avek bann ki lo son kote gos: Sorti kot mwan zot ki'n ganny modi! Al dan dife eternel ki'n ganny prepare pour dyab ek son bann lanz!

⁴² Mon ti lafen, zot pa ti donn mwan manze; mon ti swaf, zot pa ti donn mwan keksoz pour bwar.

⁴³ Mon ti en etranze, zot pa ti resevwar mwan se zot; mon ti touni, zot pa ti donn mwan lenz; mon ti malad e dan prizon, zot pa ti vin vizit mwan.

⁴⁴ Alor zot pou reponn li: Senyer! Kan eski nou ti war ou lafen oubyen swaf, en etranze oubyen touni, malad oubyen dan prizon, e ki nou pa ti pran swen avek ou?

⁴⁵ Lerwa pou reponn zot: Mon dir zot, sa i laverite: Sak fwa ki zot ti refize ed enn sa bann pli pti parmi mon bann frer, se mwan ki zot ti refize.

⁴⁶ Sa bann ki lo son kote gos pou ganny pinisyon eternel, me bann ki'n fer lavolonte Bondye pou ganny lavi eternel.”