Matye 24 - Labib An Kreol Seselwa

Zezi I Koz lo Destriksyon Tanp

¹ Zezi ti sorti dan Tanp. Letan i ti pe ale, son bann disip ti vin kot li pou fer li remark konstriksyon Tanp.

² Zezi ti dir zot, “Zot war tousala? Mon dir zot, sa i laverite: Pa pou reste en sel ros lo en lot; tou pou degrengole.”

Zezi I Predir Persekisyon

³ Zezi ti pe asize lo montanny Zolivye. Son bann disip ti vin kot li an prive e demann li, “Dir nou kan tousala pou arive; ki siny pou endik ou retour ek lafen lemonn?”

⁴ Zezi ti reponn zot, “Fer atansyon, pa les personn tronp zot.

⁵ Annefe, en kantite pou servi mon non e dir: Mwan menm Mesi. Zot pou tronp en kantite dimoun.

⁶ Zot pou antann nouvel lager ek rimer lager; me pa trakase. I neseser ki sa bann keksoz i arive avan. Me sa pa pou ankor lafen,

⁷ akoz nasyon pou lager kont nasyon, rwayonm kont rwayonm. Pou annan lafanmin ek tranblemandter dan plizyer landrwa.

⁸ Tou sa bann levennman pou zis parey bann premye douler lakousman.

⁹ Zot pou ganny persekite e ganny met anmor. Dimoun pou ay zot akoz mwan.

¹⁰ Alor, en kantite pou abandonn zot lafwa, trai e ay kanmarad.

¹¹ En kantite fo profet pou aparet e tronp bokou dimoun.

¹² Akoz pese pou ogmante, lanmour laplipar dimoun pou diminyen.

¹³ Me sa bann ki reste fidel ziska lafen pou ganny sove.

¹⁴ Sa Bonn Nouvel Rwayonm pou ganny anonse partou dan lemonn, pour ki tou dimoun i tande. Apre sa, lafen pou arive.”

Devastater Terib

¹⁵ “Zot ava war sa enn ki apel Devastater Terib ki profet Danyel in koz lo la. I pou ganny enstale dan landrwa sen. Sa enn ki lir sa, konpran!

¹⁶ Alor, bann ki dan Zide, sov dan montanny.

¹⁷ Sa enn ki lo twa son lakaz, pa desann pour pran son zafer ki dan lakaz.

¹⁸ Sa enn ki dan plantasyon, pa retourn se li pour al pran son lenz.

¹⁹ Maler pour bann fanm ki ansent ek bann ki ava pe donn tete pandan sa bann zour!

²⁰ Priye ki tousala pa ariv pandan sezon liver, ni en zour saba.

²¹ Annefe, sa pou en letan gran soufrans, pli terib ki'n deza arive depi konmansman lemonn ziska konmela, i ki pa pou zanmen ariv ankor.

²² Me si Bondye pa ti'n rakoursi sa bann zour, personn pa ti pou ganny sove. Me Bondye in rakoursi sa bann zour, akoz son pep ki i'n swazir.

²³ Alor, si en dimoun i dir ou: Gete! Mesi i isi, oubyen Mesi i laba, pa bezwen krwar.

²⁴ Annefe, bann fo mesi ek bann fo profet pou aparet. Zot pou fer bann gran mirak ek bann gran siny, si posib pour tronp menm bann ki Bondye in swazir.

²⁵ La mon'n anons zot tousala davans.

²⁶ Alor, si zot dir ou: I laba dan dezer! Pa bezwen ale. Oubyen si zot dir ou: I dan lasanm! Pa bezwen krwar.

²⁷ Fis-de-Lonm pou vini parey zekler ki klate atraver lesyel depi Les ziska Was.

²⁸ La kot i annan kadav, bann korbo pou rasanble.”

Siny Retour Fis-de-Lonm

²⁹ “Deswit apre sa letan ladetres, soley pou aret klere, lalin pou nepli donn son lalimyer, bann zetwal pou tonbe sorti dan lesyel e bann pwisans dan lesyel pou dekontrole.

³⁰ Alor, siny Fis-de-Lonm pou aparet dan lesyel. Tou bann pep lo later pou lamante e zot pou war Fis-de-Lonm vini lo nyaz dan lesyel, avek gran pwisans ek gran mazeste.

³¹ I pou anvoy son bann lanz avek en gran tronpet. Zot ava rasanble bann ki'n ganny swazir dan kat kwen later, depi en bout ziska lot.”

Parabol Pye Fig

³² Pran leson lo pye fig: De ki son brans i vin tann, e son bann fey i konmans pouse, zot konnen ki lete i pros.

³³ Pareyman, kan zot ava war tou sa bann keksoz arive, konnen ki Fis-de-Lonm i pros: I devan laport.

³⁴ Mon dir zot, sa i laverite: Sa zenerasyon pa pou fini, avan ki tousala i arive.

³⁵ Lesyel ek later pou disparet, me mon parol pa pou disparet.

Personn pa Konnen kan Lafen Lemonn

³⁶ “Me konsernan sa zour e sa ler, kan i pou arive, personn pa konnen, ni menm bann lanz dan lesyel, ni menm Garson Bondye. Zis Papa ki konnen.

³⁷ Annefe, larive Fis-de-Lonm pou parey sa ki ti pase dan letan Noe.

³⁸ Dan sa bann zour avan deliz, dimoun ti pe manze e bwar, dimoun ti pe marye e fer marye zot zanfan, ziska zour ki Noe ti antre dan lars.

³⁹ Zot pa ti dout nanryen lo sa ki ti pe arive, ziska ki deliz ti vini e balye zot tou. Sa zour ki Fis-de-Lonm pou aparet, pou menm zafer.

⁴⁰ Alor, lo de zonm ki pe travay dan plantasyon, enn pou ganny anmennen, lot pou ganny kite.

⁴¹ Lo de fanm ki pe kraz legren ansanm, enn pou ganny anmennen e lot pou ganny kite.

⁴² Veye alor, akoz zot pa konnen ki zour zot Senyer pou vini.

⁴³ Konpran sa byen: Si en met lakaz ti konnen ki ler voler pou vini, i ti ava veye, e i pa ti pou les voler kas son lakaz.

⁴⁴ Zot osi, met zot pare, akoz Fis-de-Lonm pou vini ler ki zot pa pe mazinen.”

Serviter Fidel ek Serviter Enfidel

⁴⁵ “Alor, lekel sa serviter fidel e saz, ki son met in kit ansarz bann domestik, pour nouri zot kan fodre?

⁴⁶ Ere sa serviter, ki kan son met pou arive, ava war li pe fer son travay!

⁴⁷ Mon dir zot, sa i laverite: Son met pou met li an sarz tou son byen.

⁴⁸ Me si sa serviter i move, i pou dir dan li menm: Mon met i tarde pour retournen;

⁴⁹ e i konmans bat lezot serviter, manze e bwar avek bann soular.

⁵⁰ Son met pou retournen en zour ki i pa pe ekspekte e en ler ki i pa konnen.

⁵¹ I pou pini sa serviter severman, e met li ansanm avek bann ipokrit, la kot zot pou plere e grens ledan.”