Matye 23 - Labib An Kreol Seselwa

Fer Atansyon bann Profeser Lalwa ek bann Farizyen

¹ Zezi ti dir avek lafoul e avek son bann disip,

² “Bann profeser Lalwa ek bann Farizyen in ganny sarze pour eksplik Lalwa Moiz.

³ Fer tou sa ki zot dir fer, me pa imit sa ki zot fer. Annefe zot prese, me zot pa met an pratik sa ki zot prese.

⁴ Zot sarz fardo tre lour lo zepol dimoun, me zot menm, zot pa pare pour lev en ledwa pour tous sa fardo.

⁵ Zot fer tou keksoz pour fer dimoun remark zot. Zot agrandi bann bwat dan lekel zot met bann parol sakre ki zot port lo fron e lo lebra. Franz zot rob osi i pli long.

⁶ Zot kontan premye plas dan resepsyon e rezerv premye plas dan sinagog.

⁷ Zot kontan ganny salye dan bann landrwa piblik e ganny apele: Met.

⁸ Me zot, pa fer personn apel zot ‘Met’, akoz zot annan en sel Met e zot tou zot frer.

⁹ Pa apel personn isi lo later, ‘Papa’, akoz zot annan zis en sel Papa ki dan lesyel.

¹⁰ Pa fer apel zot ‘Sef’, akoz sel Sef, li menm Mesi.

¹¹ Sa enn ki pli enportan parmi zot i bezwen vin zot serviter.

¹² Sa enn ki oule pas pour pli gran, pou ganny imilye, e sa enn ki imilye li, pou pas pour pli gran.”

Zezi I Kondann Lipokrizi

¹³ “Maler lo zot, bann profeser Lalwa ek bann Farizyen! Bann ipokrit! Zot ferm laport Rwayonm Lesyel. Zot menm zot pa antre, e zot pa les antre dimoun ki a kontan antre.

¹⁴ Maler lo zot bann profeser Lalwa ek bann Farizyen! Bann ipokrit! Zot eksplwat bann vev e pran posesyon zot lakaz. Anmenmtan, zot fer long lapriyer pour zot paret bon. Zot kondannasyon pou pli sever.

¹⁵ Maler lo zot profeser Lalwa ek Farizyen! Bann ipokrit! Zot travers lanmer ek later pour konverti en sel dimoun. Kan zot in reisi, zot fer li merit lanfer de fwa plis ki zot menm.

¹⁶ Maler lo zot, bann gid aveg! Zot dir: Si en dimoun i fer serman par Tanp, sa serman pa angaz li. Me si i fer en serman par lor Tanp, sa serman i valab.

¹⁷ Zot bann fou! Zot bann aveg! Lekel ki pli enportan: Lor, ouswa sa sanktyer ki rann sa lor sakre?

¹⁸ Zot osi dir ki si en dimoun i fer en serman par lotel Tanp sa serman pa angaz li. Me si i fer en serman par lofrann ki lo lotel, i oblize gard son serman.

¹⁹ Zot bann aveg! Lekel ki pli enportan: Lofrann, ouswa lotel ki rann sa lofrann sakre?

²⁰ Donk, sa enn ki fer en serman par lotel, i fer en serman par lotel e par tou sa ki lo lotel.

²¹ Sa enn ki fer en serman par Tanp, i fer en serman par sanktyer, e par Bondye ki reste ladan.

²² Sa enn ki fer en serman par lesyel, i fer en serman par tronn Bondye, e par Bondye ki asiz lo la.

²³ Maler lo zot profeser Lalwa ek Farizyen! Bann ipokrit! Zot donn Bondye en dizyenm parti serten plant tel ki lanmant, legim ek zepis, me zot negliz sa ki pli enportan dan Lalwa, tel ki lazistis, konpasyon ek fidelite. I neseser ki zot fer tousala, me san negliz leres.

²⁴ Zot bann gid aveg! Zot tanmiz zot labwason pou tir en bigay, me zot anval en samo.

²⁵ Maler lo zot profeser Lalwa ek bann Farizyen! Bann ipokrit! Zot netway an deor zot lakoup ek zot pla, me anndan i ranpli avek zot bann vol ek zot bann move dezir.

²⁶ Bann Farizyen aveg! Konmans par netway anndan lakoup ek pla pour ki an deor osi i vin prop.

²⁷ Maler lo zot profeser Lalwa ek bann Farizyen! Bann ipokrit! Zot parey bann latonm blansi ki paret zoli an deor, me ki anndan i plen avek bann lezo dimoun mor ek tou kalite lapouritir.

²⁸ Zot osi, an deor, zot paret bon devan dimoun, me anndan, zot ranpli avek lipokrizi ek pese.

Zezi I Anons Pinisyon

²⁹ Maler lo zot profeser Lalwa ek Farizyen! Bann ipokrit! Zot ki fer bann zoli latonm pour bann profet, zot dekor tonbo bann ki zis,

³⁰ e zot dir: Si nou ti'n viv dan letan nou bann zanset, nou pa ti pou zot konplis pour fer koule disan bann profet.

³¹ Alor, zot aksepte zot menm ki zot desandan bann ki'n touy bann profet!

³² Dan sa ka alor, fini sa ki zot zanset in konmanse!

³³ Zot bann serpan, ras viper! Ki mannyer zot ekspekte sap kondannasyon lanfer?

³⁴ Pour sa rezon, mon pou anvoy kot zot, bann profet, bann saz ek bann profeser Lalwa. Zot pou touy serten, e krisifye en bann, fwet lezot dan zot sinagog e persekit zot dan tou lavil kot zot ale.

³⁵ Alor, disan tou sa bann inosan ava tonm lo zot, depi disan Abel, sa inosan, ziska disan Zakari, garson Bakari ki zot ti touye ant sanktyer ek lotel.

³⁶ Mon dir zot, sa i laverite: Tousala pou retonm lo sa zenerasyon.”

Lanmour Zezi pour Zerizalenm

³⁷ “Zerizalenm! Zerizalenm! Ou ki touy bann profet e saboul a koudros bann ki Bondye in anvoy kot ou! Konbyen fwa mon'n oule rasanble ou bann zanfan parey en mer poul i rasanble son bann piti anba son lezel, me ou pa'n oule!

³⁸ La aprezan, ou lakaz in ganny abandonnen.

³⁹ Mon dir zot, sa i laverite: Zot pa pou war mwan ankor ziska zot ava dir: Bondye! Beni sa enn ki pe vini lo non Senyer.”