Matye 19 - Labib An Kreol Seselwa

Zezi I Koz lo Divors

¹ Kan Zezi ti'n fini koze, i ti kit Galile e i ti al dan rezyon Zide lo lot kote larivyer Zourden.

² En gran lafoul ti swiv li e i ti geri bann malad.

³ Serten Farizyen ti vin kot li e esey met li dan en pyez. Zot ti demann li, “Eski nou Lalwa i permet en zonm divors son fanm pour nenport ki rezon?”

⁴ Zezi ti reponn, “Pa zot in lir, ki depi o konmansman, Kreater ti fer zot zonm ek fanm,

⁵ e ki i ti osi dir: Pour sa rezon, en zonm pou kit son papa ek son manman pour ini avek son fanm, e tou le de pou vin en sel laser.

⁶ Zot nepli de, me en sel. Alor, sa ki Bondye in ini, zonm pa devre separe.”

⁷ Bann Farizyen ti demann li, “Akoz Moiz ti donn drwa en zonm donn son fanm en let divors e fer li ale?”

⁸ Zezi ti dir zot, “Moiz ti donn zot permisyon pour divors zot fanm akoz zot leker dir. Me pa ti konmsa o konmansman.

⁹ Mon dir zot, si en zonm i divors son fanm pour okenn rezon, eksepte si i'n tronp li, e i remarye avek en lot fanm, i komet en adilter.”

¹⁰ Son bann disip ti dir li, “Si zafer ant en zonm ek son fanm, i konmsa, pa vo lapenn marye.”

¹¹ Zezi ti reponn zot, “Pa tou dimoun ki kapab konpran sa parol, me zis bann ki Bondye i permet.

¹² Annefe, i annan plizyer rezon akoz en zonm pa marye: I annan ki enik depi dan vant zot manman; serten, akoz dimoun i rann zot enik; lezot ankor pa marye akoz Rwayonm lesyel. Sa ki kapab konpran sa lansennyman, konpran!”

Zezi I Beni bann Pti Zanfan

¹³ Dimoun ti anmenn bann pti zanfan kot Zezi pour li poz lanmen lo zot e priy pour zot. Me bann disip ti reprimann sa bann dimoun.

¹⁴ Alor, Zezi ti dir, “Les bann zanfan vin kot mwan; pa bezwen anpes zot, akoz Rwayonm lesyel i pour bann ki parey zot.”

¹⁵ Zezi ti poz lanmen lo zot. Apre, i ti kit sa landrwa.

En Zennonm Ris

¹⁶ En zonm ti vin kot Zezi e demann li, “Met! Ki fodre mon fer ki bon, pour mwan ganny lavi eternel?”

¹⁷ Zezi ti reponn li, “Akoz ou poz mwan kestyon konsernan sa ki bon? I annan zis en sel ki bon. Si ou, oule antre dan lavi eternel, obei bann komannman.”

¹⁸ Sa zonm ti demande, “Lekel komannman?” Zezi ti reponn, “Pa fer krim; pa komet adilter; pa fer fo lakizasyon; pa vole;

¹⁹ onor ou papa ek ou manman; kontan ou prosen parey ou kontan ou prop lekor.”

²⁰ Sa zennonm ti reponn, “Mon'n obei tou sa bann komannman. Ki mon devre fer ankor?”

²¹ Zezi ti dir li, “Si oule vin parfe, ale, vann tou sa ki ou posede e partaz sa larzan avek bann pov. Alor, ou ava ganny en trezor dan lesyel. Apre, vini e swiv mwan.”

²² Kan sa zonm ti antann sa, i ti ale byen tris, akoz i ti annan bann gran larises.

²³ Alor, Zezi ti dir avek son bann disip, “Mon dir zot, sa i laverite: I pou difisil pour en dimoun ris antre dan Rwayonm lesyel.

²⁴ Mon repete: I pli fasil pour en samo pas par trou en zegwir, ki pour en dimoun ris antre dan Rwayonm Bondye.”

²⁵ Kan bann disip ti antann sa, zot ti tre etonnen. Zot ti demande, “Alor, lekel ki kapab ganny sove?”

²⁶ Zezi ti get zot. I ti dir, “Pour en zonm, sa i enposib; me pour Bondye tou i posib.”

²⁷ Pyer ti dir, “Me nou alor? Nou ki'n kit tou pour swiv ou, ki nou pou gannyen?”

²⁸ Zezi ti dir zot, “Mon dir zot, sa i laverite: Kan Fis-de-Lonm pou asiz lo son tronn mazeste, dan lemonn nouvo, zot ki'n swiv mwan, zot pou osi asiz lo 12 tronn pour ziz sa douz tribi Izrael.

²⁹ Tou bann ki'n kit zot lakaz, frer, ser, papa, manman, zanfan, propriyete akoz mwan, pou ganny 100 fwa plis e zot pou erit lavi eternel.

³⁰ Me bokou ki premye aprezan, pou vin dernyen, e bokou ki dernyen aprezan, pou vin premye.”