Matye 17 - Labib An Kreol Seselwa

Transfigirasyon

¹ Sis zour plitar, Zezi ti anmenn avek li Pyer, e de frer Zak ek Zan. I ti anmenn zot alekar lo en montanny.

² Letan zot ti la, laparans Zezi ti sanze: Son figir ti klate parey soley; son lenz ti vin blan, klate koman lalimyer.

³ En kou an gran, Moiz ek Eli ti aparet. Zot ti pe koz avek Zezi.

⁴ Alor, Pyer ti dir avek Zezi, “Senyer! Nou byen isi. Si ou dakor, mon ava mont trwa latant isi, enn pour ou, enn pour Moiz e enn pour Eli.”

⁵ Letan Pyer ti pe koze, en nyaz klate ti kouver zot, e en lavwa sorti dan nyaz ti dir: Sa i mon Garson byenneme dan ki mon'n met tou mon lazwa. Ekout li!

⁶ Kan bann disip ti antann sa lavwa, zot ti per. Zot ti tonm lafas ater.

⁷ Zezi ti vin kot zot; i ti tous zot e dir, “Leve! Pa per.”

⁸ Kan zot ti lev lizye, zot pa ti war personn, eksepte Zezi tousel.

⁹ Letan zot ti pe desann sorti lo montanny, Zezi ti rekomann zot, “Pa rakont personn sa ki zot in war, ziska ki Fis-de-Lonm i resisite.”

¹⁰ Bann disip ti demann Zezi, “Akoz bann profeser Lalwa i dir ki Eli i bezwen vini avan?”

¹¹ Zezi ti reponn zot, “Annefe, Eli i devre vini pour met tou keksoz annord.

¹² Me mon dir zot, Eli in deza vini, me dimoun pa'n rekonnet li. Zot ti fer sa ki zot ti anvi avek li. Dan menm fason, zot pou fer Fis-de-Lonm soufer.”

¹³ Alor, bann disip ti konpran ki Zezi ti pe koz avek zot lo Zanbatis.

Zezi I Geri En Zanfan Posede par En Move Lespri

¹⁴ Kan zot ti rezwenn lafoul, en zonm ti vin azenou devan Zezi.

¹⁵ I ti dir, “Senyer! Pran pitye pour mon garson. I annan en move lespri e souvan i tonm dan dife oubyen dan delo.

¹⁶ Mon'n anmenn li kot ou bann disip, me zot pa'n kapab geri li.”

¹⁷ Zezi ti reponn, “Zenerasyon move e san lafwa! Ziska kan mon bezwen reste avek zot? Ziska kan mon pou bezwen siport zot? Anmenn sa garson isi!”

¹⁸ Zezi ti menas sa move lespri ki ti sorti dan sa garson ki deswit ti geri.

¹⁹ Apre, bann disip ti vin kot Zezi an sekre e demann li, “Akoz nou pa ti kapab sas sa demon?”

²⁰ Zezi ti reponn zot, “Akoz zot lafwa i feb. An realite, mon dir zot, sa i laverite: Si zot annan lafwa groser en lagrenn moutard, zot ava kapab dir avek sa montanny: Ale, sanz plas; al laba! I pou ale. Napa nanryen ki pou enposib pour zot.

²¹ Me sa kalite demon i ganny sase zis par lapriyer e par zenn.”

Zezi I Anons Ankor son Lanmor ek son Rezireksyon

²² En zour, kan tou bann disip ti ansanm Galile, Zezi ti dir zot, “Fis-de-Lonm pou ganny livre dan lanmen bann zonm.

²³ Zot pou touy li, me trwazyenm zour, i pou resisite.” Sa parol ti fer bann disip tre tris.

Taks Tanp

²⁴ Kan Zezi ek son bann disip ti ariv Kapernaoum, bann kolekter taks pour Tanp ti apros Pyer e demann li, “Ou met pa pey taks Tanp?”

²⁵ Pyer ti reponn, “Wi i peye.” Kan Pyer ti antre dan lakaz, Zezi ti koz premye e demann Pyer, “Ki ou mazinen Simon; lekel ki devre pey taks avek bann lerwa lo sa later: Bann sitwayen oubyen bann etranze?”

²⁶ Pyer ti reponn, “Bann etranze.” Zezi ti dir, “Byen! Alor, bann sitwayen pa oblize pey taks.

²⁷ Me pour pa ofans sa bann zans, al obor lak e zet ou laliny dan delo. Dan lagel premye pwason ki ou ava krose, ou ava war en pyes larzan. Pran li e pey taks, pour ou e pour mwan.”