Matye 15 - Labib An Kreol Seselwa

Lansennyman bann Zanset

¹ Apre sa, bann Farizyen ek bann profeser Lalwa ti sorti Zerizalenm e zot ti vin demann Zezi,

² “Akoz ou bann disip i dezobei lansennyman ki nou bann zanset in transmet avek nou? Annefe, zot pa lav zot lanmen avan zot manze.”

³ Zezi ti reponn zot, “Me zot, akoz zot dezobei komannman Bondye pour swiv zot prop tradisyon?

⁴ Annefe, Bondye i dir: Onor ou papa ek ou manman; sa enn ki dir dimal lo son papa oubyen son manman i merit lanmor.

⁵ Me zot, zot ansennyen ki si en dimoun i dir son papa oubyen son manman: Sa ki mon ti devre donn ou mon'n konsakre pour Bondye. Alor sa zonm pa bezwen ed son papa ek son manman.

⁶ Dan sa fason, zot detri valer Parol Bondye, pour swiv zot prop tradisyon.

⁷ Bann ipokrit! Ezai ti annan rezon profetiz lo zot, kan i ti dir:

⁸ Sa pep, i onor mwan avek labous, Me zot leker i lwen avek mwan.

⁹ Zot ladorasyon i initil. Zot ansenny bann komannman ki'n ganny fer par zonm!”

Sa ki Rann En Dimoun Enpir

¹⁰ Apre, Zezi ti apel lafoul kot li. I ti dir zot: “Ekoute e zot ava konpran:

¹¹ Pa sa ki antre dan labous en dimoun ki fer li enpir, me sa ki sorti dan son labous; sa, ki rann en dimoun enpir.”

¹² Alor, bann disip ti vin kot Zezi. Zot ti dir li, “Eski ou konnen ki ou'n ofans bann Farizyen par sa ki ou'n dir?”

¹³ Zezi ti reponn, “Tou plant ki mon Papa dan lesyel pa'n plante pou ganny derasinen.

¹⁴ Les zot! Zot en bann aveg ki pe kondwir bann aveg. Ler en dimoun aveg i kondwir en lot aveg, tou le de i tonm dan rigol.”

¹⁵ Pyer ti dir li, “Eksplik nou sa parabol.”

¹⁶ Zezi ti dir zot, “Zot osi zot pa konpran?

¹⁷ Eski zot pa konnen ki tou sa ki antre dan labous en dimoun, i pas dan son lestoma avan ki i sorti dan son lekor?

¹⁸ Me sa ki sorti dan son labous, i sorti dan son leker. Sa, ki rann en dimoun enpir.

¹⁹ Annefe, dan leker i sorti tou bann move panse: Mert, adilter, lavi imoral, vole, fer kalonmni, ek medizans.

²⁰ Se sa bann keksoz ki rann en dimoun enpir. Me manze san lav lanmen, pa rann en dimoun enpir.”

Lafwa En Fanm Kananeen

²¹ Zezi ti kit sa landrwa e i ti al dan rezyon Tir ek Sidon.

²² En fanm Kananeen ki ti reste dan sa rezyon, ti vin kot Zezi. I ti konmans kriye, “Senyer, Garson David pran pitye pour mwan. Mon fiy pe ganny tourmante par en demon.”

²³ Me Zezi pa ti dir li nanryen. Son bann disip ti apros li e sipliy li, “Akord li sa ki i demande. I pa pe arete fer tapaz deryer nou!”

²⁴ Zezi ti reponn, “Mon'n ganny anvoye zis pour bann brebi perdi parmi pep Izrael.”

²⁵ Me sa fanm ti vini e azenou devan li, i ti dir, “Senyer, ed mwan!”

²⁶ Zezi ti reponn, “I pa byen pour pran manze zanfan e zet avek bann lisyen.”

²⁷ Sa fanm ti reponn, “I vre, Senyer. Pourtan bann lisyen i manz bann myet ki tonm anba latab zot met.”

²⁸ Alor Zezi ti reponn li, “Fanm, ou lafwa i gran! Ou dezir i ava ganny akonpli!” Dan sa moman menm, son fiy ti geri.

Zezi I Geri Bokou Malad

²⁹ Zezi ti kit sa landrwa e i ti al dan bor lanmer Galile. I ti mont lo en montanny kot i ti asize.

³⁰ En kantite dimoun ti vin kot li. Zot ti anmenn bann dimoun bwete, envalid, aveg, kozpa e en kantite lezot malad. Zot ti depoz bann malad devan Zezi; i ti geri zot.

³¹ Dimoun ti etonnen kan zot ti war sa bann kozpa koze, bann dimoun bwete marse, bann envalid vin byen, e bann aveg war kler. Zot tou, zot ti loue Bondye Izrael.

Zezi I Nouri Kat Mil Zonm

³² Zezi ti apel son bann disip. I ti dir zot, “Sa lafoul i fer mwan pitye: Zot avek mwan depi trwa zour e zot napa nanryen pour manze. Mon pa kapab fer zot ale, vant vid; zot kapab tonm feb dan semen.”

³³ Bann disip ti demann li: “Kote nou pou ganny dipen dan sa dezer pour nouri sa kantite dimoun?”

³⁴ Zezi ti demann zot, “Konbyen dipen zot annan?” Zot ti reponn, “Set dipen ek detrwa pti pwason.”

³⁵ Alor, Zezi ti ordonn lafoul pour asiz ater.

³⁶ I ti pran sa set dipen ek sa bann pwason; i ti remersye Bondye. I ti kas an morso e donn bann disip, ki ti partaz avek lafoul.

³⁷ Tou dimoun ti manze e zot ti rasazye. Apre, bann disip ti ranmas set pannyen plen avek bann morso ki ti reste.

³⁸ Ti annan 4,000 zonm ki ti'n manze, san kont bann fanm ek bann zanfan.

³⁹ Apre ki i ti'n ranvoy lafoul, Zezi ti mont dan en kannot e al dan rezyon Magadan.