Matye 14 - Labib An Kreol Seselwa

Lanmor Zanbatis

¹ Dan sa letan, lerwa Herod ti antann koz lo Zezi.

² I ti dir son bann serviter, “Sa i Zanbatis ki'n resisite. Pour sanmenm sa rezon ki i annan pouvwar pour fer bann mirak.”

³ Annefe, Herod li menm ti'n donn lord pour aret Zan, met li dan lasenn e ferm li dan prizon akoz Herodyad, fanm son frer Filip.

⁴ Sa ti arive, akoz Zanbatis ti'n dir Herod: I pa permet pour ou pran fanm ou frer.

⁵ Herod ti oule touy Zan, me i ti per lafoul ki ti konsider Zan koman en profet.

⁶ Zour lanniverser Herod, fiy Herodyad ti danse devan bann envite. Sa ti fer telman plezir Herod,

⁷ ki i ti promet pour donn li tou sa ki i ava demande.

⁸ Lo konsey son manman, i ti fer sa demann, “Donn mwan latet Zanbatis konmela menm lo en pla!”

⁹ Lerwa ti vin tris. Me akoz i ti'n fer en promes devan tou son bann envite, i ti donn lord pour akord sa fiy sa ki i ti'n demande.

¹⁰ Alor, i ti anvoy solda koup likou Zanbatis dan prizon.

¹¹ Latet Zanbatis ti ganny anmennen lo en pla. Zot ti donn sa pla avek sa zenn fiy ki ti anmenn kot son manman.

¹² Bann disip Zan ti vin pran lekor Zanbatis pour al antere. Apre, zot ti al rakont Zezi sa ki ti'n arive.

Zezi I Nouri Senk Mil Zonm

¹³ Kan Zezi ti antann sa nouvel, i ti mont lo en kannot li tousel pour al dan en landrwa, lwen avek lafoul. Me kan lafoul ti antann sa, zot ti sorti dan bann lavil e swiv Zezi apye.

¹⁴ Kan Zezi ti debarke, i ti war en gran lafoul. I ti pran pitye pour zot e i ti geri zot bann malad.

¹⁵ Kan aswar ti fer, bann disip Zezi ti vin kot li. Zot ti dir li, “I deza tar e sa landrwa i izole. Ranvoy sa lafoul pour zot kapab al aste manze dan bann vilaz.”

¹⁶ Zezi ti reponn zot, “I pa neseser fer zot ale. Zot menm, donn sa bann dimoun keksoz pour manze.”

¹⁷ Me zot ti dir li, “Nou annan zis senk dipen ek de pwason.”

¹⁸ Zezi ti dir zot, “Anmenn sa bann dipen ek sa bann pwason isi.”

¹⁹ Answit, i ti ordonn lafoul pour asiz lo zerb. I ti pran sa senk dipen ek sa de pwason; i ti lev lizye ver lesyel e remersye Bondye. I ti kas sa bann dipen an morso e donn son bann disip ki ti partaz avek lafoul.

²⁰ Tou dimoun ti manze ziska zot ti rasazye. Bann disip ti anmas bann morso ki ti'n reste. Zot ti ranpli douz pannyen

²¹ Anviron 5,000 zonm ti'n manze, san kont bann fanm ek bann zanfan.

Zezi I Mars lo Delo

²² Deswit apre, Zezi ti fer bann disip anbark dan kannot e al avan li lo lot kote lak, pandan ki i ti pe fer lafoul ale.

²³ Apre ki i ti'n fer zot ale, i ti mont lo montanny pour priye alekar. Kan fernwanr ti fer, Zezi ti reste la, tousel.

²⁴ Kannot ti'n ariv en bon distans lwen avek later. I ti pe ganny bate avek laroul akoz divan ti for.

²⁵ Tar dan lannwit, Zezi ti mars lo delo pour al zwenn son bann disip.

²⁶ Kan zot ti war li pe mars lo delo, zot ti per. Zot ti dir, “En fantonm sa!” Zot ti kriye avek lafreyer.

²⁷ Me deswit Zezi ti dir zot, “Pran kouraz, mwan sa! Pa bezwen per!”

²⁸ Pyer ti dir, “Senyer! Si vreman ou sa, donn lord pour mwan vin kot ou, lo delo.”

²⁹ Zezi ti reponn, “Vini!” Pyer ti sorti dan kannot, e konmans mars lo delo pour al kot Zezi.

³⁰ Me kan i ti remarke ki divan ti for, i ti per e i ti konmans koule. I ti kriye, “Senyer sov mwan!”

³¹ Deswit Zezi ti anvoy lanmen, atrap li. I ti dir li, “Ou napa bokou lafwa! Akoz ou'n doute?”

³² Kan tou le de ti'n mont dan kannot, divan ti tonbe.

³³ Bann disip ki ti dan kannot ti prostern devan Zezi. Zot ti dir, “Vreman ou Garson Bondye!”

Zezi I Geri bann Malad dan Rezyon Zenezaret

³⁴ Zot ti travers lak e debark lot kote, dan rezyon Zenezaret.

³⁵ Kan bann zabitan sa landrwa ti rekonnet Zezi, zot ti fann nouvel dan zanviron kot Zezi ti'n arive. Zot ti anmenn tou bann malad kot li.

³⁶ Zot ti sipliy li pour les zot zis tous bor son lenz. Tou bann ki ti tous li, ti geri.