Matye 13 - Labib An Kreol Seselwa

Parabol Senmer Lagrenn

¹ Sa menm zour, Zezi ti sorti kot lakaz e i ti al asiz obor lak.

² En sitan gran lafoul ti rasanble otour li, ki i ti bezwen mont lo en kannot kot i ti asize. Lafoul ti reste ater obor delo.

³ Zezi ti servi parabol pour ansenny zot bokou keksoz. I ti dir zot, “En zour, en senmer ti sorti pour al senm lagrenn.

⁴ Pandan ki i ti pe senmen, en parti lagrenn ti tonm lo semen. Bann zwazo ti vin manz tou.

⁵ En lot parti lagrenn ti tonm dan bann landrwa kot ti annan bokou ros, me pa bokou later. Zot ti pous deswit, akoz later pa ti profon.

⁶ Me kan soley ti leve, i ti bril bann pti plant e zot ti sek, akoz zot ti napa ase rasin.

⁷ En lot parti lagrenn ti tonm parmi bann brousay pikan. Sa bann pye pikan ti grandi e touf zot.

⁸ Me en lot parti lagrenn ti tonm dan bon later; zot ti donn bokou fri. Serten ti raport 100, serten 60 e serten 30.”

⁹ Zezi ti azoute, “Sa ki annan zorey, ekoute!”

Akoz Zezi ti Koz an Parabol

¹⁰ Bann disip ti apros Zezi. Zot ti demann li, “Akoz ou koz avek zot an parabol?”

¹¹ Zezi ti reponn, “Avek zot, sekre Rwayonm Bondye in ganny revele. Me sa sekre pa ankor ganny revele avek sa bann.

¹² Annefe, sa enn ki annan, pou ganny plis ankor annabondans. Me sa enn ki napa nanryen, pou ganny arase menm sa pti gin ki i annan.

¹³ Rezon ki mon servi parabol avek zot, se akoz zot gete me zot pa war; zot ekoute, me zot pa ni tande, ni konpran.

¹⁴ Alor, pour zot, sa ki profet Ezai in ekri, i ganny realize: Zot ava antann, me zot pa pou zanmen konpran. Zot ava gete, me zot pa pou zanmen war.

¹⁵ Leker sa pep in vin ensansib; zot in bous zot zorey e zot in ferm zot lizye, pour zot pa war avek zot lizye, pour zot pa tande avek zot zorey, e pour zot pa konpran avek zot leker, pour ki zot pa retourn kot mwan pour mwan geri zot.

¹⁶ Me zot, zot ere: Zot lizye i war kler e zot zorey i tande!

¹⁷ Mon dir zot, sa i laverite: Bokou profet, bokou bon dimoun ti anvi war sa ki zot pe war, me zot pa'n war; zot ti anvi antann sa ki zot pe tande, me zot pa'n tande.”

Zezi I Eksplik Parabol Senmer

¹⁸ “Aprezan, ekout sinifikasyon sa parabol senmer:

¹⁹ Dimoun ki antann koz lo Rwayonm, me ki pa konpran, zot parey bann lagrenn ki tonm lo semen. Dyab i vini e retir tou sa ki'n ganny senmen dan zot leker.

²⁰ Bann lagrenn ki'n tonm kot i annan ros, zot parey sa bann dimoun ki antann Laparol ki zot aksepte deswit avek lazwa.

²¹ Me Laparol pa'n pran rasin dan zot; i pa reste dan zot leker pour lontan. Alor, osito ki troub oubyen persekisyon i arive akoz Laparol, deswit zot tonbe.

²² Bann lagrenn ki tonm parmi bann zarbis pikan, zot parey sa bann dimoun ki antann Laparol, me traka lemonn, plezir lavi ek larzan i touf Laparol e zot pa prodwir okenn fri.

²³ Bann lagrenn ki tonm dan bon later, zot parey sa bann dimoun ki antann Laparol e konpran li. Zot raport bokou fri, serten 100, serten 60 e serten 30.”

Parabol Move Zerb

²⁴ Zezi ti rakont zot en lot parabol, “Rwayonm lesyel i parey en zonm ki ti'n senm bann bon lagrenn dan son plantasyon.

²⁵ Letan tou dimoun ti pe dormi, en lennmi ti vini e senm move zerb dan milye son plantasyon dible. Apre i ti ale.

²⁶ Kan bann plant ti pouse e zepi ti formen, bann move zerb osi ti aparet.

²⁷ Bann serviter sa propriyeter ti dir li: Met! Ou ti senm bon lagrenn dan ou plantasyon, me kote sa bann move zerb i sorti?

²⁸ Sa zonm ti reponn zot: En lennmi ki'n fer sa. Bann serviter ti demann li si zot ava aras sa bann move zerb?

²⁹ Me i ti reponn zot: Non. Si zot aras sa bann move zerb, zot riske derasin dible anmenmtan.

³⁰ Les zot pous ansanm ziska rekolt. Letan rekolt, mon ava dir avek bann ki fer rekolt: Konmans par aras bann move zerb, fer bann pake e bril zot. Apre, rekolte dible e met dan mon langar rezerv.”

Parabol Lagrenn Moutard

³¹ Zezi ti rakont zot en lot parabol, “Rwayonm lesyel i parey en lagrenn moutard ki en zonm in pran e senm dan son plantasyon.

³² I pli pti ki tou lagrenn; me kan i pouse, i vin pli gran ki tou bann plant dan zarden. I vin en pye dibwa e bann zwazo i vin fer zot nik dan son bann brans.”

Parabol Lelven

³³ Zezi ti rakont zot ankor en lot parabol, “Rwayonm lesyel i parey lelven ki en fanm i pran e melanz avek 25 kilo lafarin ki fer monte lapat antye.”

Zezi I Servi bann Parabol

³⁴ Zezi ti servi bann parabol pour koz avek lafoul. I pa ti dir zot nanryen san servi en parabol,

³⁵ pour ki parol profet i ganny realize: Mon pou koz an parabol. Mon pou anons sa ki'n reste sekre depi kreasyon lemonn.

Zezi I Eksplik Parabol Move Zerb

³⁶ Zezi ti kit lafoul e i ti al dan lakour. Son bann disip ti vin dir li, “Eksplik nou parabol move zerb dan plantasyon.”

³⁷ Zezi ti dir zot, “Sa zonm ki senm bon lagrenn dan son plantasyon, se Fis-de-Lonm.

³⁸ Sa zarden se lemonn. Bon lagrenn i reprezant pep ki fer parti Rwayonm; move zerb i reprezant zanfan dyab.

³⁹ Lennmi ki senm move zerb i reprezant dyab. Larekolt, se lafen lemonn; bann travayer se bann lanz.

⁴⁰ Parey nou derasin bann move zerb pour zet dan dife, i pou konmsa, zour lafen lemonn:

⁴¹ Fis-de-Lonm pou anvoy son bann lanz dan son Rwayonm pour elimin tou bann ki fer tonm dan lemal e bann ki fer lemal zot menm.

⁴² I pou zet zot dan fourno dife, la kot zot pou plere e grens ledan.

⁴³ Alor, sa bann ki obei Bondye, pou briye parey soley dan Rwayonm zot Papa. Sa ki annan zorey, ekoute!”

Parabol Trezor

⁴⁴ “Rwayonm lesyel i parey en trezor ki'n ganny kasyet dan en plantasyon. En zonm ki'n dekouver sa trezor, i kasyet li ankor en fwa. Dan son kontantman, i al vann tou sa ki i posede pour li aste sa plantasyon.”

Parabol Perl

⁴⁵ “Rwayonm lesyel i osi parey en marsan ki rod bann zoli perl.

⁴⁶ Kan i trouv en perl ki annan gran valer, i vann tou sa ki i posede pour aste sa perl!”

Parabol Lasenn

⁴⁷ “Rwayonm lesyel i parey en lasenn ki'n ganny zete dan lak; tou kalite pwason i pri ladan.

⁴⁸ Kan lasenn in plen, peser i redi li ater e zot asize pour fer triyaz pwason. Bann ki bon, zot met dan en pannyen. Bann ki pa bon, zot zete.

⁴⁹ Lafen lemonn pou parey: Bann lanz pou al separ bann ki move avek bann ki bon.

⁵⁰ Bann ki move pou ganny zete dan fourno dife, la kot bokou pou plere e grens ledan.”

⁵¹ Zezi ti demann zot, “Eski zot in konpran tousala?” Zot ti reponn, “Wi.”

⁵² Zezi ti dir zot, “Pour sa rezon, tou profeser Lalwa ki vin en disip Rwayonm lesyel i parey en propriyeter ki tir dan son trezor, bann keksoz nef ek bann ansyen.”

Zabitan Nazaret pa Krwar Zezi

⁵³ Kan Zezi ti'n fini rakont sa bann parabol, i ti kit sa landrwa.

⁵⁴ I ti al dan lavil kot i ti'n grandi. I ti ansenny dan zot sinagog e bann zabitan ki ti antann li ti etonnen. Zot ti dir, “Kote i ganny sa lasazes? Ki mannyer i kapab fer sa bann mirak?

⁵⁵ Pa li menm garson sa sarpantye? Son manman pa i apel Mari? Zak, Zozef, Simon ek Zida, pa son bann frer?

⁵⁶ Son bann ser pa zot reste isi parmi nou? Alor, kote i ganny tou sa pouvwar?”

⁵⁷ Sa ti anpes zot krwar dan li. Alor, Zezi ti dir zot, “En profet i ganny respekte partou, sof dan son prop pei e dan son prop fanmir.”

⁵⁸ Zezi pa ti fer bokou mirak la, akoz zot ti napa lafwa.