Matye 12 - Labib An Kreol Seselwa

Lo Size Saba

¹ Pa tro lontan apre, Zezi ti travers bann plantasyon dible en zour saba. Son bann disip ti lafen. Alor, zot ti kas bann zepi e manz bann lagrenn.

² Kan bann Farizyen ti war sa, zot ti dir Zezi, “Gete! Ou bann disip pe fer sa ki i defann fer zour saba!”

³ Zezi ti reponn zot, “Zanmen zot in deza lir sa ki David ek son bann zonm ti fer kan zot ti lafen?

⁴ I ti antre dan tanp avek son bann zonm e manz dipen konsakre, alor ki zis bann pret ki ti annan drwa manz sa dipen.

⁵ Oubyen, zot pa'n lir dan liv Lalwa Moiz, ki zour saba, bann pret ki ti pe servi dan Tanp, ti kas Lalwa; pourtan zot pa ti koupab?

⁶ Mon dir zot, i annan isi, keksoz ki pli enportan ki Tanp!

⁷ In ekri: Mon oule konpasyon pa sakrifis zannimo. Si zis zot ti konpran sa, zot pa ti ava'n kondann bann inosan.

⁸ Annefe, Fis-de-Lonm i li menm met saba.”

En Zonm avek Lanmen Paralize

⁹ Zezi ti kit sa landrwa e i ti antre dan zot sinagog,

¹⁰ kot ti annan en zonm avek en lanmen paralize. En bann dimoun ki ti pe rod en rezon pour akiz Zezi, ti demann li, “Eski nou Lalwa i permet geri dimoun zour saba?”

¹¹ Zezi ti reponn zot, “Si enn parmi zot, i annan zis en mouton ki tonm dan en trou zour saba, eski i pa pou tir li?

¹² E en zonm pa i vo bokou plis ki en mouton? Donk, nou Lalwa i permet fer dimoun dibyen zour saba.”

¹³ Alor, Zezi ti dir sa zonm, “Dres ou lanmen.” Sa zonm ti dres son lanmen, e son lanmen ti geri e vin parey lot.

¹⁴ Bann Farizyen ti sorti e zot ti rode konman zot pou kapab touy Zezi.

Serviter ki Bondye in Swazir

¹⁵ Kan Zezi ti aprann sa, i ti kit sa landrwa e en gran lafoul ti swiv li. I ti geri tou bann ki ti malad.

¹⁶ Me i ti defann zot severman dir ki i ete,

¹⁷ pour ki parol profet Ezai i ganny realize:

¹⁸ La mon serviter ki mon'n swazir, sa enn ki mon kontan, e dan ki mon'n met tou mon lazwa. Mon pou met mon Lespri lo li, pour li anons lazistis avek tou bann nasyon.

¹⁹ I pa pou dispit; i pa pou kriye. Personn pa pou antann son lavwa dan semen.

²⁰ I pa pou kas en banbou ki'n pliye, I pa pou tenny sa pti laflanm ki ankor alimen, ziska ki lazistis i ranport laviktwar.

²¹ Tou bann nasyon ava met zot lespwar dan son non.

Zezi ek Belzebil

²² Apre, zot ti anmenn kot Zezi, en zonm ki ti posede par en demon. Sa zonm ti aveg e kozpa. Zezi ti geri sa zonm; konmsa, i ti kapab koze e war kler.

²³ Tou bann dimoun ti etonnen e zot ti dir, “Pa li menm garson David?”

²⁴ Me kan bann Farizyen ti antann sa, zot ti dir, “Sa zonm i sas demon avek pouvwar sef demon, Belzebil.”

²⁵ Zezi ti konnen ki zot ti pe mazinen. I ti dir zot, “Tou rwayonm divize kont li menm pou fini par ganny detri. Tou lavil, tou fanmir ki divize dan li menm pa kapab egziste.

²⁶ Si Satan i divize kont li menm, ki mannyer son rwayonm pou kapab tenir?

²⁷ Si mwan, mon sas bann demon par pouvwar Belzebil, alor par ki pouvwar, zot bann zanfan i fer li? Pour sa rezon, zot bann zanfan menm ki pou vin zot prop ziz.

²⁸ Me si mon pe sas bann demon par Lespri Bondye, alor Rwayonm Bondye in ariv parmi zot.

²⁹ Personn pa kapab antre dan lakaz en zonm for e vol sa ki i annan. I bezwen anmar sa zonm for avan. Apre, i ava kapab vol tou sa ki dan sa lakaz.

³⁰ Sa enn ki pa avek mwan i kont mwan. Sa enn ki pa rasanble avek mwan i disperse.

Pese kont Lespri Sen

³¹ Pour sa rezon, mon dir zot: Tou pese ek tou blasfenm, i kapab ganny pardonnen. Me sa enn ki blasfenm kont Lespri Sen, pa pou zanmen ganny pardonnen.

³² En dimoun ki blasfenm kont Fis-de-Lonm ava ganny pardonnen. Me en dimoun ki blasfenm kont Lespri Sen pa pou zanmen ganny pardonnen, ni dan sa monn, ni dan lot.”

En Pye Dibwa ek Son Fri

³³ “Pour ganny en bon fri, ou bezwen annan en bon pye fri. Si ou pye fri i move, ou pou ganny move fri. Annefe, ou rekonnet en pye dibwa par son fri.

³⁴ Ras serpan ki zot ete! Ki mannyer zot pou kapab dir bon keksoz, kan zot menm, zot move? Annefe, labous i dir sa ki deborde dan leker.

³⁵ En bon dimoun i tir bann bon keksoz dan son bon trezor. En move dimoun i tir bann move keksoz dan son move trezor.

³⁶ Mon dir zot: Zour zizman, tou dimoun pou bezwen rann kont sak parol initil ki i'n dir.

³⁷ Annefe, se par zot parol ki zot pou ganny zize, e ganny deklare inosan oubyen koupab.”

Lafoul I Demann En Mirak

³⁸ Alor, serten profeser Lalwa ek serten Farizyen ti dir Zezi, “Met! Nou ti ava kontan si ou fer nou war en siny.”

³⁹ Zezi ti reponn zot, “Sa zenerasyon move e adilter i demann en siny! Me zot pa pou ganny okenn siny, eksepte siny profet Zonas.

⁴⁰ Annefe, parey Zonas ti pas trwa zour ek trwa nwit dan vant balenn, Fis-de-Lonm pou pas trwa zour ek trwa nwit dan vant later.

⁴¹ Zour Zizman, bann zabitan Niniv pou leve kont sa zenerasyon ki zot ava kondannen. Annefe, bann zabitan Niniv ti repanti kan zot ti antann mesaz Zonas. Me isi, i annan en dimoun ki pli gran ki Zonas!

⁴² Zour Zizman, larenn sorti dan Sid pou leve avek dimoun sa zenerasyon e i pou kondann zot, akoz i ti sorti dan bout later pour vin ekout lasazes Salomon. Me isi, i annan en dimoun ki pli gran ki Salomon!”

Move Lespri I Retournen

⁴³ “Kan en move lespri i sorti dan en dimoun, i ale vini dan bann landrwa dezer pour rod en plas pour li repoze. Me i pa trouv okenn landrwa.

⁴⁴ Alor, i dir dan li menm: Mon pou retourn dan mon lakaz kot mon ti sorti. I retournen e i war son lakaz vid, byen balye e byen annord.

⁴⁵ Alor, i al rod set lezot lespri pli move ki li menm. Ansanm, zot antre e viv la. Leta sa dimoun i vin pli move ki avan. Sanmenm sa ki pou arive avek bann move dimoun sa zenerasyon.”

Manman ek bann Frer Zezi

⁴⁶ Letan Zezi ti pe koz avek lafoul, son manman ek son bann frer ti pe debout deor. Zot ti oule koz avek li.

⁴⁷ En dimoun ti dir Zezi, “Ou manman ek ou bann frer i deor e zot oule koz avek ou.”

⁴⁸ Me Zezi ti reponn, “Lekel ki mon manman? Lekel ki mon bann frer?”

⁴⁹ Avek son lanmen, i ti montre lo son bann disip. I ti dir, “La mon manman ek mon bann frer!

⁵⁰ Sa enn ki fer lavolonte mon Papa ki dan lesyel, li menm, mon frer, mon ser, mon manman.”