Matye 10 - Labib An Kreol Seselwa

Douz Zapot

¹ Zezi ti apel son 12 disip. I ti donn zot lotorite pour sas bann demon, geri tou bann maladi ek tou bann diformite.

² La non sa 12 zapot: Premye Simon, ki zot ti apel Pyer, ek son frer, Andre; Zak, garson Zebede ek son frer Zan;

³ Filip ek Bartelemi; Toma ek Matye, ki ti en kolekter taks; Zak, garson Alfe, ek Tade;

⁴ Simon, en nasyonalis, ek Zida Iskaryot, sa enn ki ti trai Zezi.

Misyon Douz Zapot

⁵ Zezi ti anvoy sa 12 zonm an misyon, avek sa bann lord swivan: Pa bezwen al dan bann rezyon kot bann non-Zwif i reste, ni dan okenn bann lavil Samari.

⁶ Al plito kot bann brebi egare dan pep Izrael.

⁷ Partou dan semen, anonse: Rwayonm lesyel i pros!

⁸ Geri bann malad, redonn lavi bann ki'n mor, geri bann ki annan en maladi parey lalep, sas bann demon. Zot in resevwar gratwitman alor donn osi gratwitman.

⁹ Pa bezwen anmenn okenn lanmonnen annor, ni annarzan, ni an kwiv dan zot pos.

¹⁰ Dan zot vwayaz, pa bezwen anmenn ni sak, ni semiz de resanz, ni sandal, ni baton. Annefe, en zouvriye i annan drwa ganny son manze.

¹¹ Kan zot ariv dan en lavil oubyen en vilaz, rode lekel ki pare pour resevwar zot, e reste kot sa dimoun, ziska ki zot kit sa landrwa.

¹² Kan zot antre dan en lakaz, dir: Lape i avek zot!

¹³ Si bann zabitan sa lakaz i resevwar zot, zot salitasyon lape ava reste dan sa lakaz. Me si zot pa ganny akeyir, repran zot salitasyon lape.

¹⁴ Si dan nenport ki lakaz oubyen lavil, dimoun pa resevwar zot, ni ekout zot, kit sa landrwa. Sekwe lapousyer ki avek zot lipye.

¹⁵ Mon dir zot, sa i laverite: Zour zizman, zabitan Sodonm ek Gomor, pou ganny trete mwen severman ki bann zabitan sa lavil.

Persekisyon

¹⁶ Mon pe anvoy zot parey bann mouton parmi bann loulou. Alor, zot bezwen rize parey bann serpan e inosan parey bann pizon.

¹⁷ Fer atansyon! Zot pou ganny arete e ganny anmennen ankour. Zot pou ganny fwete dan zot bann sinagog.

¹⁸ Akoz mwan, zot pou ganny anmennen devan bann gouverner ek bann lerwa. Zot ava mon temwen devan zot e devan bann non-Zwif.

¹⁹ Kan zot ganny anmennen devan tribinal, pa trakase pour konnen ki pou dir, ni koman zot pou dir. Parol ki zot devre dir, pou vini dan sa moman menm.

²⁰ Annefe, pa zot ki pou koze, me Lespri zot Papa ki pou koz atraver zot.

²¹ En frer pou denons son prop frer pour li ganny touye. Papa pou denons son prop zanfan. Bann zanfan pou tourn kont zot paran e fer zot ganny kondannen anmor.

²² Tou dimoun pou ay zot akoz mwan. Me sa enn ki persevere ziska lafen, pou ganny sove.

²³ Kan zot ava ganny persekite dan en lavil, sov dan en lot. Mon dir zot, sa i laverite: Zot pa pou ankor fini fer letour tou bann lavil dan Izrael, avan ki Fis-de-Lonm i vini.

²⁴ En disip pa pli enportan ki son met; ni en serviter pli gran ki son patron.

²⁵ En disip i devre kontant pour vin parey son met, e en serviter parey son bourzwa. Si zot in apel Belzebil, sa enn ki sef lafanmir, a pli fort rezon, lezot manm son fanmir ava ganny ensilte.

Lekel Zot Devre Per

²⁶ Alor, pa bezwen per! Tou sa ki kasyet pou ganny dekouver; tou sa ki sekre pou ganny devwale.

²⁷ Sa ki mon dir zot dan fernwanr, repet li dan kler. Sa ki zot tande an sekre, pibliy li lo twa lakaz.

²⁸ Pa per bann ki touy lekor, me ki pa kapab touy ou et antye. Plito per sa enn ki kapab detri ou lekor ek ou et antye dan lanfer.

²⁹ Pa zot vann de pti sren pour en sou? Pourtan, en sel pa tonm ater san lavolonte zot Papa.

³⁰ Menm, bann bren seve lo zot latet in ganny konte.

³¹ Alor, pa bezwen per; zot vo bokou plis ki en kantite sren!

³² Sa enn ki deklare devan lezot ki i mon disip, mwan osi, mon pou rekonnet li devan mon Papa ki dan lesyel.

³³ Me sa enn ki rezet mwan piblikman, mon pou rezet li devan mon Papa ki dan lesyel.

Pa Lape, me Lepe

³⁴ Pa krwar ki mon'n vin anmenn lape lo later. Mon pa'n vin anmenn lape, me lepe.

³⁵ Mon'n vin anmenn divizyon: Garson kont papa; fiy kont manman; belfiy kont belmer.

³⁶ Ou lennmi pou parmi dimoun dan ou prop fanmir.

³⁷ Sa enn ki kontan son papa oubyen son manman plis ki mwan, i pa merit ganny apele mon disip. Sa enn ki kontan son garson oubyen son fiy plis ki mwan, i pa merit ganny apele mon disip.

³⁸ Sa enn ki pa pran son lakrwa e swiv mwan, i pa merit ganny apele mon disip.

³⁹ Sa enn ki oule gard son lavi pou perdi li, me sa enn ki perdi son lavi akoz mwan, pou gard li.

Rekonpans

⁴⁰ Sa enn ki resevwar zot, i resevwar mwan. Sa enn ki resevwar mwan, i resevwar sa enn ki'n anvoy mwan.

⁴¹ Sa enn ki resevwar en profet Bondye, akoz i en profet, i pou resevwar rekonpans en profet. Sa enn ki resevwar en dimoun ki zis, akoz i en zis, i pou resevwar rekonpans en zis.

⁴² En dimoun ki donn menm en ver delo fre sa enn ki pli pti parmi mon bann disip, akoz i mon disip, mon dir zot, sa i laverite: I pa pou perdi son rekonpans.