Matye 1 - Labib An Kreol Seselwa

Zanset Zezi-Kri

¹ Sa i lalis bann zanset Zezi-Kri, desandan David, ki ti li menm en desandan Abrahanm:

² Abrahanm ti papa Izaak; Izaak ti papa Zakob; Zakob ti papa Zida ek son bann frer.

³ Zida ti papa Peres ek Zara; zot manman ti apel Tamar. Peres ti papa Hesronn; Hesronn ti papa Aranm;

⁴ Aranm ti papa Aminadab; Aminadab ti papa Naasonn; Naasonn ti papa Salmonn;

⁵ Salmon ti papa Boaz; son manman ti apel Rahab. Boaz ti papa Obed, son manman ti apel Rit. Obed ti papa Zese;

⁶ Zese ti papa David. Lerwa David ti papa Salomon; son manman ti fanm Iri.

⁷ Salomon ti papa Roboanm; Roboanm ti papa Abya; Abya ti papa Asaf;

⁸ Asaf ti papa Zozafat; Zozafat ti papa Zoranm; Zoranm ti papa Ozyas;

⁹ Ozyas ti papa Yoatanm; Yoatanm ti papa Akaz; Akaz ti papa Ezekyas;

¹⁰ Ezekyas ti papa Manase; Manase ti papa Amonn; Amonn ti papa Zozyas;

¹¹ Zozyas ti papa Yekonya ek son bann frer. Sa ti dan lepok ki pep Izraelit ti ganny deporte Babilonn.

¹² Apre ki pep Izraelit ti'n ganny deporte Babilonn, Yekonya ti fer Sealtiel; Sealtiel ti papa Zorobabel;

¹³ Zorobabel ti papa Abihoud; Abioud ti papa Elyakim; Elyakim ti papa Azor;

¹⁴ Azor ti papa Sadok; Sadok ti papa Akim; Akim ti papa Elihoud;

¹⁵ Elihoud ti papa Eleazar; Eleazar ti papa Matan; Matan ti papa Zakob;

¹⁶ Zakob ti papa Zozef ki ti marye avek Mari; Mari ti donn nesans Zezi, ki zot ti apel Mesi.

¹⁷ An tou, ti annan 14 zenerasyon depi Abrahanm ziska David, 14 zenerasyon depi David ziska deportasyon Babilonn, e 14 zenerasyon depi deportasyon Babilonn ziska nesans Mesi.

Nesans Zezi

¹⁸ La dan ki sirkonstans Zezi-Kri ti ne: Mari, manman Zezi ti'n fiyanse avek Zozef. Me avan ki zot ti konmans viv ansanm, i ti trouv li ansent par laksyon Lespri Sen.

¹⁹ Zozef, son mari, ti en zonm zis. Pour li pa dezonor Mari piblikman, i ti deside kas fiyansay an sekre.

²⁰ Letan i ti pe mazin sa, en lanz Senyer ti aparet avek li dan en rev. I ti dir li, “Zozef, garson David! Pa bezwen per pour pran Mari koman ou fanm, akoz sa zanfan ki i pou gannyen, in ganny formen par laksyon Lespri Sen.

²¹ I pou donn nesans en garson, e ou ava apel li Zezi, akoz i pou sov son pep dan son bann pese.”

²² Tousala in arive pour ki tou sa ki Senyer ti'n dir par lentermedyer profet i realize:

²³ En zenn fiy vyerz pou tonm ansent; i pou donn nesans en garson, e zot pou apel li Emanouel, savedir, Bondye i avek nou.

²⁴ Kan Zozef ti reveye, i ti fer tou parey lanz Senyer ti'n ordonn li e i ti pran Mari koman son fanm.

²⁵ Me i pa ti ganny okenn relasyon avek li, ziska ki i ti donn nesans en garson ki Zozef ti apel Zezi.