Mark 7 - Labib An Kreol Seselwa

Tradisyon bann Zanset

¹ Bann Farizyen ek detrwa profeser Lalwa sorti Zerizalenm, ti rasanble otour Zezi.

² Zot ti remarke ki serten son bann disip ti manz avek lanmen enpir, savedir ki pa'n lave dapre koutim.

³ Annefe, bann Farizyen, parey tou bann Zwif, pa manze san ki zot lav zot lanmen dapre tradisyon bann zanset.

⁴ Kan zot ti sorti bazar, zot pa ti manze avan pirifye zot lekor. I annan ankor en kantite tradisyon ki zot obzerve tel ki: Lav bann lakoup, marmit ek bann pla.

⁵ Alor, bann Farizyen ek bann profeser Lalwa ti demann Zezi, “Akoz ou bann disip pa swiv tradisyon bann zanset, me zot manz avek lanmen enpir?”

⁶ Zezi ti reponn zot, “Bann ipokrit! Ezai ti byen profetize lo zot, parey in ganny ekri: Sa pep i onor mwan avek zot labous, me zot leker i lwen avek mwan.

⁷ Zot ladorasyon i initil; zot ansenny bann komannman ki'n ganny fer par zonm.

⁸ Zot met dekote komannman Bondye e zot obei bann tradisyon zonm.”

⁹ Zezi ti azoute, “Zot konn byen bann fason pour rezet komannman Bondye pour zot gard zot tradisyon.

¹⁰ Moiz annefe, ti dir: Onor ou papa ek ou manman. E osi: Sa enn ki koz mal lo son papa, oubyen lo son manman, i devre ganny pini anmor.

¹¹ Me zot, zot ansennyen: Si en dimoun i dir avek son papa oubyen son manman: Sa led ki mon devre donn ou, mon'n deklar li korban, savedir, en lofrann rezerve pour Bondye.

¹² Alor, sa dimoun i ganny soutire pour li pa fer nanryen pour son papa ek son manman.

¹³ Dan sa fason, zot detri valer Parol Bondye par zot tradisyon. I annan bokou lezot keksoz parey, ki zot fer.”

Sa ki Rann En Dimoun Enpir

¹⁴ Apre, Zezi ti apel lafoul ankor kot li. I ti dir zot, “Ekout mwan zot tou e konpran:

¹⁵ Napa nanryen ki antre dan zonm ki rann li enpir. O kontrer, sa ki sorti dan leker en zonm ki fer li enpir.

¹⁶ Ekout sa byen! Sa ki annan zorey pour antann, tande!”

¹⁷ Kan Zezi ti'n kit lafoul e antre dan lakaz, son bann disip ti kestyonn li lo sa parabol.

¹⁸ Zezi ti dir zot, “Zot osi, zot pa konpran? Sa ki antre dan en zonm pa kapab fer li enpir,

¹⁹ akoz i pa antre dan son leker, me dan son vant e apre i sorti.” Par sa bann parol, Zezi ti deklare ki tou manze i pir.

²⁰ Zezi ti dir ankor, “Sa ki sorti dan leker en zonm, ki fer li enpir.

²¹ Annefe, se dan leker dimoun ki tou sa bann move keksoz i sorti: Move panse, move aksyon, vol, krim,

²² adilter, lanvi pour keksoz dimoun, mesanste, riz, lavi dezord, zalouzi, kalonmni, vantardiz, nwizans.

²³ Tou sa bann move keksoz i sorti dan leker zonm e i rann li enpir.”

Lafwa En Fanm non-Zwif

²⁴ Apre, Zezi ti sorti e i ti al dan rezyon Tir ek Sidon. I ti antre dan en lakaz, e i pa ti anvi ki personn i konnen. Me i pa ti kapab kasyet.

²⁵ Annefe, en fanm ki ti annan en pti fiy ki ti posede par en move lespri ti tande ki Zezi ti la. I ti vin kot li e tonm azenou devan li.

²⁶ Sa fanm ti en non-Zwif, ki'n ne Fenisi, an Siri. I ti sipliy Zezi pour sas sa demon ki ti dan son fiy.

²⁷ Me Zezi ti reponn li, “Les bann zanfan manze avan, akoz i pa byen pour pran manze en zanfan pour zet avek lisyen.”

²⁸ Sa fanm ti reponn li, “I vre Senyer! Pourtan, menm bann lisyen i manz bann myet ki bann zanfan i les tonbe anba latab.”

²⁹ Alor, Zezi ti dir avek li, “Akoz sa parol, ou kapab ale; sa demon in kit ou fiy.”

³⁰ Sa fanm ti al se li, e i ti war son fiy pe alonze lo lili: Sa demon ti'n kit li.

Zezi I Geri En Zonm Sourd e Kozpa

³¹ Apre sa, Zezi ti kit teritwar Tir. I ti travers Sidon ziska lak Galile, atraver rezyon Dekapol.

³² Zot ti anmenn kot li en zonm sourd ki ti osi annan difikilte pour koze. Zot ti sipliy Zezi pour enpoz lanmen lo li.

³³ Alor, Zezi ti anmenn li an deor lafoul e pran li alekar. I ti met son ledwa dan son zorey, tous son lalang avek lasaliv.

³⁴ Apre, Zezi ti lev lizye ver lesyel. I ti pran en gran respirasyon. I ti dir, “Efata!” Savedir: Ouver!

³⁵ Toudswit, zorey sa zonm ti ouver e son lalang ti delarge. I ti koz dan en fason normal.

³⁶ Zezi ti ordonn zot pour pa dir personn. Me pli i ti dir zot sa, pli zot ti rakonte.

³⁷ Zot ti telman etonnen ki zot ti dir, “I fer tou keksoz byen; i fer menm bann sourd tande e bann kozpa koze.”