Mark 12 - Labib An Kreol Seselwa

Parabol bann Move Lokater

¹ Apre, Zezi ti koz avek zot an parabol. I ti dir zot, “En zour, en zonm ti plant en plantasyon rezen. I ti met en miray toultour. I ti fouye pour fer en preswar diven. I ti fer en tour pour en gardyen. Apre, i ti kit sa plantasyon rezen avek bann lokater e i ti al an vwayaz.

² Kan letan rekolt ti arive, i ti anvoy en serviter kot bann lokater pour al rod son par rezen.

³ Bann lokater ti atrap sa serviter, bat li, e fer li ale lanmen vid.

⁴ Apre, i ti anvoy en lot serviter; bann lokater ti kas son latet e maltret li.

⁵ I ti anvoy ankor en lot serviter; zot ti touy li. I ti anvoy bokou lezot ankor. Zot ti bat en bann e touy lezot.

⁶ En sel dimoun ti reste: Son garson ki i ti kontan bokou. I ti anvoy li. I ti dir dan li menm: Zot ava annan respe pour mon garson.

⁷ Me sa bann lokater ti dir: La zeritye i vini! Annou touy li e son leritaz ava vin pour nou.

⁸ Alor, zot ti atrap li, touy li e zet son lekor an deor plantasyon.

⁹ Ki i reste pour propriyeter plantasyon rezen fer? I pou vini, touy sa bann lokater e donn sa plantasyon avek lezot lokater.

¹⁰ Eski zot pa'n lir dan Lekritir? Sa ros ki bann travayer in rezete, in vin ros prensipal dan fondasyon.

¹¹ Sa i travay ki Senyer in fer: I en mervey devan nou lizye!”

¹² Bann sef Zwif ti esey aret Zezi, me zot ti per lafoul. Zot ti konpran ki i ti'n rakont sa parabol pour zot. Alor, zot ti kit li e zot ti ale.

Kestyon lo Taks

¹³ Zot ti anvoy bann Farizyen ek bann Herodyen kot Zezi pour esey met li dan pyez par son prop parol.

¹⁴ Zot ti vin dir li, “Met! Nou konnen ki ou fran e ou pa per personn. Ou pa pran kont lenportans dimoun, me ou ansenny laverite lo lavolonte Bondye. Dir nou, eski nou Lalwa i permet pey taks Sezar? Eski nou devre peye oubyen non?”

¹⁵ Zezi ti'n war zot lipokrizi. I ti dir zot, “Akoz zot oule met mwan dan en pyez? Anmenn en pyes larzan isi, e les mwan gete.”

¹⁶ Zot ti anmenn en pyes larzan. Zezi ti demann zot, “Figir ek non lekel ki lo la?” Zot ti reponn li, “Sezar.”

¹⁷ Zezi ti dir zot, “Alor, rann Sezar sa ki pour Sezar, e rann Bondye sa ki pour Bondye.” Zot ti etonnen par sa repons.

Kestyon lo Rezireksyon

¹⁸ Serten Sadiseen, bann ki dir napa rezireksyon, ti vin kot Zezi. Zot ti demann li,

¹⁹ “Met! Moiz in ekri dan nou lalwa: Si en zonm i mor e i kit son fanm san zanfan, sa zonm i bezwen marye avek sa fanm, pour donn son frer en desandans.

²⁰ En zour, ti annan set frer. Premye frer ti marye e i ti mor san zanfan.

²¹ Dezyenm frer ti marye ek sa fanm. I ti mor san zanfan. Menm zafer ti arive avek trwazyenm frer.

²² Tou le set frer pa ti ganny okenn zanfan. Alafen, sa fanm osi ti mor.

²³ Zour rezireksyon kan tou dimoun pou resisite, i pou fanm lekel? Annefe, i ti fanm tou le set frer.”

²⁴ Zezi ti reponn zot, “Zot dan lerer: Zot pa konn ni Lekritir, ni pwisans Bondye.

²⁵ Annefe, kan bann mor ava resisite, zot pa pou marye; zot pou viv parey bann lanz dan lesyel.

²⁶ Lo size rezireksyon bann mor, eski zot pa'n zanmen lir dan liv Moiz, sa ki Bondye ti dir li dan brousay anflanm: Mwan menm Bondye Abrahanm, Bondye Izaak e Bondye Zakob.

²⁷ I pa Bondye bann mor, me Bondye bann vivan. Alor zot konpletman dan lerer.”

Pli Gran Komannman

²⁸ En profeser Lalwa ti aprose e i ti antann zot pe diskite ant zot. I ti war ki Zezi ti'n byen reponn. I ti demann li, “Lekel komannman ki pli enportan?”

²⁹ Zezi ti reponn li, “La premye komannman: Ekoute Izrael: Senyer nou Bondye i sel Senyer.

³⁰ Kontan Senyer ou Bondye avek tou ou leker, avek ou et antye, avek tou ou lespri e avek tou ou lafors.

³¹ La dezyenm komannman: Kontan ou prosen parey ou menm. Napa okenn pli gran komannman ki sa de.”

³² Sa profeser Lalwa ti dir li, “Ou annan rezon, Met! I vre ki i annan en sel Bondye e napa en lot.

³³ Sakenn i devre kontan Bondye avek tou son leker, tou son lentelizans e tou son lafors. I devre osi kontan son prosen parey li menm. Sa i vo plis ki tou bann sakrifis ek bann sakrifis konplet.”

³⁴ Kan Zezi ti war ki sa profeser Lalwa ti'n byen reponn, i ti dir li, “Ou pa lwen avek Rwayonm Bondye.” Apre sa, personn pa ti oze kestyonn Zezi ankor.

Lekel Kris

³⁵ Zezi ti pe ansennyen dan Tanp. I ti demande, “Ki mannyer bann profeser Lalwa i kapab dir ki Mesi i garson David,

³⁶ alor ki David li menm, enspire par Lespri Sen, ti dir: Senyer ti dir avek mon Senyer: Asiz lo mon kote drwat, ziska ki mon met ou bann lennmi anba ou lipye.

³⁷ David li menm ti apel li, Senyer. Alor ki mannyer i kapab osi son garson?” Sa gran lafoul ti ekout li avek plezir.

Lafyerte ek Pinisyon

³⁸ Dan son lansennyman, Zezi ti dir, “Mefye zot bann profeser Lalwa, ki kontan mars dan zot bann gran rob, e ganny salye avek respe dan bann landrwa piblik.

³⁹ Zot kontan bann premye plas dan bann sinagog e meyer plas dan bann gran resepsyon.

⁴⁰ Zot pran tou sa ki bann vev i posede. Anmenmtan, zot pas zot letan fer bann long lapriyer. Zot pinisyon pou bokou pli sever.”

Lofrann En Vev

⁴¹ Zezi ti asiz dan Tanp vizavi landrwa kot dimoun i met lofrann larzan. I ti pe gete koman lafoul ti donn larzan. En kantite dimoun ris ti met gro sonm larzan.

⁴² En pov vev ti vini e met de pti sou.

⁴³ Zezi ti apel son bann disip. I ti dir zot, “Mon dir zot, sa i laverite: Sa pov vev in donn plis ki tou lezot.

⁴⁴ Annefe, lezot in donn sa ki zot ti annan an plis. Me li, dan son mizer, i'n donn tou sa ki i ti posede, tou sa ki i ti annan pour viv.”