Mark 1 - Labib An Kreol Seselwa

Zanbatis I Anons Bonn Nouvel

¹ La Bonn Nouvel Zezi-Kri, Garson Bondye.

² Parey i'n ganny ekri dan liv profet Ezai: La mon anvoy mon mesaze devan ou, pour li prepar ou semen.

³ En lavwa pe kriye dan dezer: Prepar semen Senyer, fer drwat son bann santye.

⁴ Zanbatis ti arive sorti dan dezer. I ti pres en batenm konversyon pour pardon pese.

⁵ Tou bann zabitan provens Zide ek bann zabitan Zerizalenm ti vin kot li. Zot ti konfes zot pese an piblik e Zan ti batiz zot dan larivyer Zourden.

⁶ Lenz Zan ti fer avek pwal samo. I ti met en sang an kwir otour son leren. I ti manz sotrel ek dimyel sovaz.

⁷ I ti anonse: Sa enn ki pou vin apre mwan i pli pwisan ki mwan. Mon pa diny pour mwan bese e delarg lase son sandal.

⁸ Mwan, mon batiz zot avek delo. Me li, i pou batiz zot dan Lespri Sen.

Batenm ek Tantasyon Zezi

⁹ Dan sa lepok, Zezi ti arive sorti Nazaret, en vilaz dan Galile. Zan ti batiz li dan larivyer Zourden.

¹⁰ Zis koman Zezi ti sorti dan delo, i ti war lesyel ouver e Lespri ti desann lo li, dan laform en pizon.

¹¹ En lavwa sorti dan lesyel, ti dir: Ou menm mon Garson byenneme, ou donn mwan bokou lazwa.

¹² Osito apre, Lespri ti pous Zezi dan dezer.

¹³ I ti reste dan dezer pandan 40 zour e ganny tante par Satan. I ti reste parmi bann zannimo sovaz, e bann lanz ti servi li.

Zezi I Proklanm Bonn Nouvel dan Galile

¹⁴ Apre ki Zan ti'n ganny arete e met dan prizon, Zezi ti vin Galile kot i ti proklanm Bonn Nouvel sorti kot Bondye.

¹⁵ I ti dir, “Letan fikse in arive; Rwayonm Bondye i pros. Sanz zot lavi e krwar dan sa Bonn Nouvel.”

Zezi I Apel Kat Peser

¹⁶ Letan Zezi ti pe pase obor lak Galile, i ti war Simon ek son frer Andre pe pas lasenn; tou le de zot ti peser.

¹⁷ Zezi ti dir zot, “Vini! Swiv mwan, e mon ava fer zot lapes zonm.”

¹⁸ Deswit, zot ti kit zot lasenn e swiv li.

¹⁹ En pe pli lwen, Zezi ti war Zak, garson Zebede ek Zan, son frer, ki ti pe repar lasenn.

²⁰ Deswit, Zezi ti apel zot. Zot ti kit zot papa, Zebede dan kannot avek bann travayer e zot ti swiv Zezi.

En Zonm Tourmante par En Move Lespri

²¹ Zezi ek son bann disip ti al Kapernaoum. Zour saba, Zezi ti antre dan sinagog e i ti konmans ansennyen.

²² Tou sa ki ti la, ti etonnen par son lansennyman, akoz i ti ansenny zot parey enn ki annan lotorite, pa parey bann profeser Lalwa.

²³ Zisteman, dan zot sinagog, ti annan en zonm ki ti posede par en move lespri.

²⁴ Sa zonm ti kriye, “Ki ou pe rode avek nou, Zezi ki sorti Nazaret? Eski ou'n vin isi pour detri nou? Mon konnen ki ou menm sa zonm Sen anvoye par Bondye.”

²⁵ Me Zezi ti reprimann sa move lespri, “Reste trankil! Sorti dan sa zonm!”

²⁶ Sa move lespri ti sekwe sa zonm avek vyolans e i ti sorti an kriyan byen for.

²⁷ Tou dimoun ki ti la, ti etonnen. Zot ti demann ant zot, “Kisisa sa? La en nouvo lansennyman ki ganny donnen avek lotorite. Sa zonm i menm komann bann move lespri, e zot obei li!”

²⁸ Deswit, renonmen Zezi ti fannen dan rezyon Galile antye.

Zezi I Geri Bokou Malad

²⁹ An sortan dan sinagog, ansanm avek Zak ek Zan, Zezi ti al kot Simon ek Andre.

³⁰ Belmer Simon ti lo lili avek en lafyev. Deswit, zot ti koz avek Zezi.

³¹ Zezi ti apros li, atrap son lanmen e fer li leve. Sa lafyev ti kit belmer Simon ki ti servi zot.

³² Aswar, apre soley kouse, dimoun ti anmenn kot Zezi bann malad ek bann ki ti posede par demon.

³³ Lavil antye ti'n rasanble devan laport.

³⁴ Zezi ti geri bokou malad ki ti pe soufer avek diferan maladi. I ti osi sas bokou demon. I pa ti permet bann demon koze, akoz zot ti konn li.

Zezi dan Galile

³⁵ Lannmen byen granmaten, ankor fernwanr, Zezi ti leve. I ti al an deor lavil, dan en landrwa dezer kot i ti priye.

³⁶ Simon ek bann zanmi ki ti avek li, ti al rod li.

³⁷ Kan zot ti war li, zot ti dir li, “Tou dimoun pe rod ou.”

³⁸ Zezi ti dir zot, “Annou al dan bann vilaz alantour, akoz mon bezwen anons Bonn Nouvel laba osi; se pour sa rezon ki mon'n vini.”

³⁹ Alor, Zezi ti travers Galile antye. I ti anons mesaz dan zot sinagog e sas bann demon.

Zezi I Geri En Zonm avek Lalep

⁴⁰ En zonm ki ti annan maladi parey lalep ti vin kot Zezi. I ti tonm lafas ater e sipliy li, “Si ou oule, ou kapab fer mwan vin pir.”

⁴¹ Zezi ti pran pitye pour li. I ti lev son lanmen e tous li. I ti dir, “Mon oule! Ganny pirifye.”

⁴² Deswit, sa maladi ti disparet lo sa zonm. I ti'n vin pir.

⁴³ Apre, Zezi ti remontrans li severman e fer li ale.

⁴⁴ I ti dir li, “Pa dir nanryen personn, me al fer pret egzamin ou. Ofer pour ou pirifikasyon, sa ki Moiz in ordonnen. Sa i ava laprev ki ou'n geri.”

⁴⁵ Me li, koman i ti ale, i ti konmans koze e fann sa nouvel. Akoz sa, Zezi ti nepli kapab antre dan en lavil piblikman. I ti reste an deor lavil, dan bann landrwa izole. Dimoun ti sorti partou pour vin kot li.