Malasi 1 - Labib An Kreol Seselwa

Lanmour Senyer pour Izrael

¹ Menas SENYER kont pep Izrael par lentermedyer profet Malasi.

² SENYER ti dir avek son pep Izrael, “Mon'n kontan ou.” Me Izrael ti reponn, “Ki mannyer ou'n montre ki ou kontan nou?” SENYER ti reponn zot, “Ezai ek Zakob, pa zot de frer? Pourtan mon'n kontan Zakob,

³ e mon'n ay Ezai. Mon'n devaste son rezyon montanny e fer landrwa kot son desandan ti reste, vin en landrwa devaste pour sakal, sa zannimo ki viv dan dezer.”

⁴ Si Edonm i dir: Nou landrwa in ganny detri, me nou pou rekonstri li, la sa ki SENYER liniver i deklare: Zot kapab rekonstri li, me mon pou kraz li ankor. Dimoun pou apel li pei modi e en pep ki toultan fer SENYER ankoler.

⁵ Zot pou war tousala arive avek zot prop lizye e zot pou dir: SENYER i gran, menm an deor pei Izrael.

Senyer I Reprimann bann Pret

⁶ SENYER liniver i dir avek bann pret: En zanfan, i obei son papa; en serviter, i respekte son met. Si mon en papa pour zot, oli loner ki mon merite? Si mon zot sef, akoz zot napa respe anver mwan, SENYER liniver i demann avek bann pret ki mepriz li. Me zot demande: Ki mannyer nou'n mepriz ou?

⁷ Kan zot ofer sakrifis nouritir ki enpir lo mon lotel, zot demande: Ki mannyer nou'n profann ou lotel? Kan zot pa rekonnet lenportans lotel SENYER.

⁸ Kan zot ofer sakrifis zannimo aveg, eski sa i byen? Kan zot ofer zannimo andikape oubyen malad, eski zot krwar napa nanryen mal ladan? Esey donn sa ou gouverner. Eski sa pou fer li plezir e i ava rekonpans zot? SENYER liniver ki deklare.

⁹ Aprezan, esey sipliy Bondye, pour li montre son bonte anver zot. Eski i pou aksepte zot lofrann? SENYER ki deklare.

¹⁰ Ti ava preferab ki enn parmi zot ti ava ferm bann laport tanp e personn pa ti ava alim dife pour nanryen lo mon lotel, SENYER liniver i deklare. Zot pa fer mwan plezir, mon pa pou aksepte zot sakrifis, SENYER liniver ki deklare.

¹¹ Depi soley leve ziska soley kouse, partou dan lemonn, dimoun i onor mwan. Partou, zot bril lansan e prezant en lofrann pir, akoz mon non i gran parmi bann nasyon, SENYER liniver ki deklare.

¹² Me zot, zot in rann enpir mon lotel kan zot dir mon lotel in ganny sali e lofrann nouritir napa gran valer.

¹³ Zot osi oze dir: Tousala i fatigan, e zot lev nennen avek mwan. Zot menm ofer sakrifis zannimo vole, malad oubyen andikape. Eski mon kapab aksepte sa, sorti kot zot? SENYER ki deklare.

¹⁴ Bondye pou modi sa voler ki tronp li avek en zannimo taste, kan dan son troupo, i annan en zannimo mal, byen portan. Mon en gran lerwa, e mon non i ganny respekte parmi bann nasyon. SENYER liniver ki deklare.