Liv Zob 8 - Labib An Kreol Seselwa

Diskour Bildad

¹ Alor, Bildad ki sorti Soua, ti reponn:

² Ziska kan ou pou koz konmsa? Ziska kan ou parol pou parey en gro divan.

³ Eski Bondye i fos lalwa? Eski Bondye liniver pou al kont lazistis?

⁴ Si ou bann garson in fer pese kont li, zot in pey konsekans zot bann move aksyon.

⁵ Me ou, si ou rod Bondye, si ou sipliy Bondye liniver;

⁶ si ou onnet e drwat, deswit i pou vey lo ou, e fer ou retrouv ou plas ki ou merite koman en zonm zis.

⁷ Sa ki ou ti posede avan pou nanryen ditou, akoz sa ki ou pou gannyen pou bokou plis.

Temwannyaz bann Ansyen

⁸ Kestyonn bann ki'n viv avan ou e aksepte leksperyans bann zanset.

⁹ Nou, nou fek ne yer, e nou pa konn nanryen. Nou lavi lo later i pas vit parey en lonbraz.

¹⁰ Zot, zot ava kapab ansenny ou. Dan zot leksperyans, zot pou tir sa bann parol lasazes:

¹¹ Eski zon i pouse an deor lanmar? Eski banbou, i pouse san delo?

¹² San delo, san ki ou bezwen koup zot, zot fletri pli vit ki lezot plant.

¹³ La sa ki arive avek bann ki oubliy Bondye; lespwar en malfeter ava disparet.

¹⁴ Son lasirans i disparet; i pe anpandan avek en lakaz bib.

¹⁵ I pe apiy kont son lakaz; sa pa pou tenir. I ava kranponn avek li, me i pou tonbe.

¹⁶ I ranpli avek lasev, dan ker soley, i tal son bann brans dan zarden.

¹⁷ Son bann rasin i trese dan ta ros, i anfonse parmi bann ros.

¹⁸ Me si i ganny arase la kot i ti ete, later i fer konmsi i pa'n zanmen konn li.

¹⁹ Sanmenm lazwa ki en malfeter i gannyen. En lot plant ava pous dan son plas.

²⁰ Bondye pa rezet en zonm drwat; i pa toler bann malfeter non pli!

²¹ Byento i ava fer ou riye ankor e ou ava kapab kriye avek lazwa.

²² Ou bann lennmi pou ganny kouver avek laont; bann malfeter pou disparet.