Liv Zob 40 - Labib An Kreol Seselwa

¹ Alor SENYER ti dir Zob:

² Eski sa enn ki kritik Bondye liniver i oze argimant avek li? Sa enn ki kritik Bondye i devre annan larepons.

Zob i Rekonnet Son Linyorans

³ Alor, Zob ti reponn SENYER:

⁴ Mon en nanryen ditou. Ki mon kapab reponn ou? Mon poz mon lanmen lo mon labous.

⁵ Mon'n koz en fwa, mon pa pou reponn ankor; mon pa pou koz en dezyenm fwa mon napa nanryen ankor pour dir.

⁶ Alor, dan milye en tourbiyon, SENYER ti reponn Zob:

⁷ Met ou pare! Debout parey en vre zonm; mon pou kestyonn ou, e ou ava reponn mwan.

⁸ Eski ou pou vreman kas mon zizman? Eski ou pou kondann mwan pour ou ganny rezon?

⁹ Eski ou lebra i osi for ki Bondye? Eski ou lavwa i rezonnen dan loraz parey pour li?

¹⁰ Dan sa ka, met ou pare dan loner ek dinyite; abiy ou dan laglwar ek mazeste.

¹¹ Les deborde ou lakoler; avek ou regar abes bann orgeye.

¹² Avek en sel regar fer pliye sa bann ki vantar; kraz bann malfeter kot zot ete.

¹³ Anter zot tou dan lapousyer; anferm zot dan prizon lanmor.

¹⁴ Alor, mwan menm, mon ava felisit ou; akoz ou'n ganny laviktwar par ou prop lafors.

Behemot

¹⁵ Aprezan, get Behemot, sa mons ki mon'n kree parey mon ti kree ou. I manz zerb parey en bef.

¹⁶ Get sa lafors ki dan son leren e viger ki dan bann misk son vant!

¹⁷ I redi son lake parey en pye sed; bann nerf dan son kwis in trese ansanm.

¹⁸ Son bann lezo i parey bann tiyo an bronz, e son bann kot i koman bann bar feray.

¹⁹ I premye parmi bann kreatir Bondye. Zis mwan son Kreater ki kapab kontrol li.

²⁰ Bann montanny ki donn li manze, la kot tou bann zannimo sovaz i zwe.

²¹ I dormi anba bann pye lotis, i kasyet parmi bann gran zerb dan lanmar.

²² Bann pye lotis i donn li lonbraz; pye dibwa obor larivyer i antour li.

²³ Si kouran larivyer i for, sa pa trakas li; i reste trankil menm ler larivyer Zourden i monte ziska kot son lagel.

²⁴ Kan son lizye i ouver, lekel ki kapab atrap li? Lekel ki kapab pers son nennen avek en bout dibwa?