Liv Zob 16 - Labib An Kreol Seselwa

Zob I Mentenir Son Linosans

¹ Zob ti reponn:

² Mon'n deza antann sa kalite parol. Zot en bann move konsolater.

³ Zot demann mwan: Kan ou pou aret koz sa bann parol initil? Kwa ki fors ou kontinyen reponn?

⁴ Si zot ti dan mon plas, e si mon ti dan zot plas, mwan osi, mon ti pou kapab koz parey zot. Mon ti ava kapab fer gran diskour pour zot e sekwe mon latet kont zot.

⁵ Mon ti ava ankouraz zot avek en kantite parol, e kalmi zot douler avek bann zoli fraz.

⁶ Me si mon koze, sa pa soulaz mon soufrans. Si mon reste trankil, mon douler pa pou kit mwan.

⁷ An realite, Bondye in pran tou mon lafors e in detri tou sa ki otour mwan.

⁸ Bann rid ki i'n donn mwan i temwen; mon megrer i akiz mwan e i montre ki mon koupab.

⁹ Dan son lakoler, Bondye in desir mwan, e atak mwan; i grens ledan kont mwan. Mon ladverser i pers mwan avek son regar.

¹⁰ Zot ouver zot labous gran kont mwan. Zot kalot mwan lo mon lazou, e zot ensilte mwan; zot antoure kont mwan.

¹¹ Bondye in abandonn mwan dan lanmen bann zenn bandi. In livre mwan dan lanmen bann malfeter.

¹² Mon ti anpe, me Bondye i'n bouskil mwan. I'n sezi mwan par likou e zet mwan ater; i'n tir fles lo mwan.

¹³ Son bann dart i soufle otour mwan. Zot in vin transpers mon leren. San pitye, i pers mon fyel; e mon labil i koul ater.

¹⁴ I fons lo mwan parey en gerye e bles mwan partou lo mon lekor.

¹⁵ Mon'n koud en lenz dey lo mon bann sikatris e anfons mon fron dan lapousyer.

¹⁶ Afors plere, mon lizye in vin rouz, e mon popyer i sernen e anfle.

¹⁷ Pourtan, napa okenn disan lo mon lanmen, e mon lapriyer i senser.

¹⁸ Later! Pa kouver mon disan. Les mwan fer tande mon lavwa.

¹⁹ Menm dan sa moman, mon annan en temwen dan lesyel; sa enn ki garanti mwan i lao.

²⁰ Mon bann zanmi i mepriz mwan; mon lizye i sipliye avek larm devan Bondye.

²¹ Mon temwen i entervenir devan Bondye pour mwan, parey ou fer ant vwazen.

²² Mon lavi pe ariv ver son lafen, mon pe al pran semen san retour.