Liv Zob 12 - Labib An Kreol Seselwa

Larepons Zob

¹ Zob ti reponn:

² Vreman, ou menm lavwa lepep! Lasazes pou mor avek ou!

³ Mwan osi, mon annan disernman parey ou. Mon pa pli bet ki ou. Lekel ki pa konn sa ki ou'n dir?

⁴ Mon bann zanmi i boufonn mwan akoz kan mon apel Bondye, i reponn. Mwan, sa zonm drwat e san repros, mon pe ganny gognarde!

⁵ Sa enn ki dan byen, i mepriz sa enn ki dan maler. I vin ogmant douler sa enn ki pre pour tonbe.

⁶ Voler i viv anpe anba son latant. Sa enn ki provok Bondye i an sekirite. Son prop lafors in vin son Bondye.

⁷ Me pran konsey avek bann zannimo e zot ava enstri ou. Demann zwazo dan lesyel e zot ava ansenny ou.

⁸ Koz avek later e i ava ansenny ou; bann pwason dan lanmer ava rakont ou.

⁹ Annefe, lekel parmi zot pa konnen ki lanmen SENYER ki'n fer tousala?

¹⁰ Lavi tou et vivan, souf tou imen i dan son lanmen.

¹¹ Pa nou dir ki zorey i ekout koze, parey pale i gout manze?

¹² Lasazes i vin avek laz, e disernman apre en long lavi.

¹³ Me lasazes ek lapwisans i kot Bondye. Bondye ki posed disernman; tou son bann plan i bon.

¹⁴ Sa ki Bondye in demoli, personn pa kapab rekonstri. Personn pa kapab delivre sa enn ki i met dan prizon.

¹⁵ Si i anpes lapli tonbe, later i reste sek. Si i larg delo, later i ganny devaste.

¹⁶ Bondye ki posed lafors ek lasazes; sa enn ki ganny tronpe e sa enn ki tronp lezot osi.

¹⁷ I fer bann dimoun enportan mars pyeni; i fer bann ziz divage.

¹⁸ I detronn bann lerwa e i fer zot vin koman lesklav.

¹⁹ I fer bann pret mars pyeni; i fer tonbe bann ki annan lotorite.

²⁰ I ferm labous bann gran kozer; i fer bann vyeyar perdi zot bon sans.

²¹ I abes bann sef; i imilye bann diktater.

²² I revel sa ki dan profonder later, e met okler sa ki dan teneb.

²³ I fer bann nasyon vin for, apre i detri zot. I fer bann nasyon vin gran, apre i fer zot disparet.

²⁴ I fer bann sefdeta perdi larezon; i fer zot drive dan dezer kot napa semen.

²⁵ Zot tatonnen dan fernwanr; i fer zot drive parey zonm sou.