Liv Zob 11 - Labib An Kreol Seselwa

Diskour Sofar

¹ Alor, Sofar ki sorti Naama ti reponn:

² Eski sa bann parol pa merit en larepons? Eski en zonm i annan rezon, zis akoz i koz bokou?

³ Eski ou bavardaz pou anpes dimoun koze? Eski dimoun pou kapab ekout ou gognarde san reponn?

⁴ Ou'n menm oze dir ki ou koz laverite; ki ou san repros devan Bondye.

⁵ Mon ti ava kontan ki Bondye ti koze, e reponn ou direkteman.

⁶ I ti ava fer ou konn sekre son lasazes ki depas nou rezonnman. Alor, ou ti ava konpran ki Bondye i oubliy en pe ou bann fot.

⁷ Eski ou kapab sonn profonder Bondye? Eski ou kapab konn grander Bondye liniver?

⁸ I pli gran ki lesyel! Ki ou kapab fer? I pli profon ki lemonn lanmor! Ki ou kapab konnen?

⁹ I mezir pli long ki later; i pli larz ki lanmer.

¹⁰ Si Bondye i azir, si i met ou dan prizon, si i konvok ou, lekel ki pou anpes li?

¹¹ I konnen lekel ki fo. I remarke ki mal zot in fer.

¹² Latet en imen i vid; kan i ne, i parey en bourik sovaz.

¹³ Me si ou sanz ou leker; si ou lev ou lanmen ver Bondye;

¹⁴ si ou'n fer move aksyon, arete. Si ou pa les lenzistis antre se ou,

¹⁵ alor, sirman ou pou kapab lev latet san onte; personn pa pou fer ou per.

¹⁶ Annefe, ou ava oubliy tou ou maler. Ou ava oubliy zot parey delo ki'n fini koule.

¹⁷ Ou lavi pou pli kler ki soley midi; fernwanr pou vin parey lalimyer bomaten.

¹⁸ Ou ava annan konfyans akoz pou annan lespwar. Menm si ou kanmi, ou ava dormi anpe.

¹⁹ Ou ava al dormi san ki personn i deranz ou. Bokou dimoun pou vin flat ou.

²⁰ Me lizye bann malfeter pou fatige. Zot pa pou war okenn semen sove. Lanmor pou zot dernyen lespwar.