Levitik 8 - Labib An Kreol Seselwa

Seremoni Konsekrasyon

¹ SENYER ti dir Moiz,

² “Apel Aaron ek son bann garson. Pran bann lenz sakre, delwil pour konsekrasyon; pran toro pour sakrifis pardon pese, de mouton mal, ek korbey dipen san lelven.

³ Rasanble pep Izrael antye devan lantre Latant Rankont.”

⁴ Moiz ti fer parey SENYER ti'n ordonn li. Ler pep Izrael ti'n rasanble devan lantre Latant Rankont,

⁵ Moiz ti dir zot, “La sa ki SENYER in ordonnen fer.”

⁶ I ti al sers Aaron ek son bann garson e fer zot lav zot avek delo.

⁷ I ti met Aaron en semiz, anmar en sentir otour son leren, met li son rob avek lefod lo la, e anmar son sentir par deryer.

⁸ Apre, i ti plas pektoral lo son pwatrin e met Ourim ek Toumim ladan.

⁹ Moiz ti poz en tirban lo son latet, e devan tirban i ti met en plak annor, kouronn sakre, parey SENYER ti'n ordonn li.

¹⁰ Apre, Moiz ti pran delwil pour konsekrasyon. I ti konsakre sanktyer, ensi ki tou sa ki ti annan ladan. I ti konsakre tousala.

¹¹ Avek en pe sa delwil, i ti fer laspersyon set fwa lo lotel ki i ti konsakre avek tou son bann akseswar, basen ek son sipor.

¹² I ti vers en pe delwil lo latet Aaron, e konsakre li.

¹³ Moiz ti fer bann garson Aaron avans devan. I ti met zot, zot rob, anmar sentir otour zot leren e plas en bonnen lo zot latet, parey SENYER ti'n ordonn li.

¹⁴ Apre, Moiz ti fer anmenn sa toro pour sakrifis pardon pese. Aaron ek son bann garson ti poz lanmen lo latet sa toro pour sakrifis pardon pese.

¹⁵ Moiz ti egorz sa toro. I ti pran disan e avek son ledwa, i ti pas lo sak korn lotel, e pirifye lotel. Apre, i ti vers disan ater devan lotel e konsakre lotel. Konmsa ki i ti konsakre lotel pour fer rityel pardon lo la.

¹⁶ Moiz ti pran tou lagres ki ti anvlop trip, bann morso lefwa ek son de ronnyon ansanm avek lagres ki antour li. I ti bril tousala lo lotel.

¹⁷ Me toro li menm ti ganny brile avek son lapo, son lavyann ek son leskreman lo en dife an deor kan, parey SENYER ti'n ordonn Moiz.

¹⁸ Apre, i ti prezant sa mouton mal pour sakrifis konplet. Aaron ek son bann garson ti poz zot lanmen lo latet sa mouton.

¹⁹ Moiz ti egorz sa mouton. I ti pran son disan e i ti asperz partou otour lotel.

²⁰ Apre, sa mouton ti ganny koupe an morso, e Moiz ti bril latet, bann morso ek tou son lagres.

²¹ Parey SENYER ti'n ordonn li, Moiz ti lav trip ek bann lapat avek delo. I ti bril leres mouton lo lotel koman en sakrifis konplet, brile par dife, ki anvoy en loder ki fer plezir SENYER.

²² Apre, Moiz ti prezant sa dezyenm mouton mal ki mark antre dan fonksyon koman pret. Aaron ek son bann garson ti poz lanmen lo latet sa mouton mal.

²³ Moiz ti egorz li e pran en pe son disan ki i ti pas lo bout zorey drwat Aaron, lo pous son lanmen drwat e lo gro pous son lipye drwat.

²⁴ Moiz ti fer bann garson Aaron avans devan. I ti met en pe disan lo bout zot zorey drwat, lo pous zot lanmen drwat, e lo gro pous zot lipye drwat. Apre, Moiz ti pran leres disan e aroz otour lotel.

²⁵ Moiz ti pran tou morso lagres, lake, lagres ki anvlop trip, ek bann morso lefwa, son de ronnyon, avek lagres ki anvlop zot ek son kwis drwat.

²⁶ Dan korbey dipen san lelven ki ti devan SENYER, i ti pran en gato san lelven, en gato fer avek delwil, ek en galet ki i ti depoz lo lagres e lo sa kwis drwat.

²⁷ Moiz ti plas tousala dan lanmen Aaron e dan lanmen son bann garson. I ti fer zot fer rityel lofrann devan SENYER.

²⁸ Moiz ti pran sa lofrann dan zot lanmen e bril lo lotel avek sakrifis konplet. Sa ti en sakrifis konsekrasyon brile dan dife ki ti anvoy en loder ki fer plezir SENYER.

²⁹ Moiz ti pran morso pwatrin sa mouton pour fer rityel prezantasyon lofrann devan SENYER. Sa ti porsyon pour Moiz, parey SENYER ti'n ordonn li.

³⁰ Moiz ti pran en pe delwil konsekrasyon ek en pe disan ki ti lo lotel. I ti fer laspersyon lo Aaron e lo son lenz; i ti osi asperz bann garson Aaron ek zot lenz. Konmsa ki i ti konsakre Aaron ek son lenz, ensi ki son bann garson ek zot lenz.

³¹ Moiz ti dir avek Aaron ek son bann garson: Fer bwi lavyann dan lantre Latant Rankont, e manz li lanmenm avek dipen ki dan korbey pour lofrann konsekrasyon, parey mon ti ordonnen: Aaron ek son bann garson ki pou manz sa.

³² Ou ava bril lavyann ek dipen ki reste.

³³ Ou pa pou sorti an deor Latant Rankont pandan set zour, ziska ki ou'n konplet letan ki fodre pour ou antre an fonksyon. Annefe, seremoni lordinasyon devre pran set zour.

³⁴ SENYER in ordonn tou sa bann rityel pour pardon ou bann pese.

³⁵ Ou ava reste dan lantre Latant Rankont lizour koman aswar, pandan set zour. Apre, ou ava kapab akonpli servis ki SENYER in ordonnen, san riske lanmor. Sa i dapre lord ki mon'n gannyen.

³⁶ Aaron ek son bann garson ti fer tou sa ki SENYER ti'n ordonnen par lentermedyer Moiz.