Levitik 5 - Labib An Kreol Seselwa

Detrwa Legzanp Fot ek Reparasyon

¹ Kan en dimoun i ganny apele koman temwen lo keksoz ki i'n war, oubyen ki i deza konnen, me i refize dir sa ki i'n tande oubyen war, i komet en pese. I ava responsab pour son fot.

² Kan en dimoun, enkonsyanman, i tous nenport keksoz enpir, ki swa kadav en zannimo enpir, kadav en zannimo domestik enpir, ouswa en pti zannimo enpir, li menm, i ava rekonnet son pese. I ava enpir e koupab.

³ Si en dimoun, enkonsyanman, i tous nenport keksoz ki sorti avek en imen ki enpir, oubyen nenport keksoz ki rann enpir, ler i realize, i ava koupab.

⁴ Kan, enkonsyanman, en dimoun, i pronons en serman, menm si i pou fer dibyen oubyen dimal, e ki plitar i rekonnet, i rann li koupab.

⁵ Ler i realize ki i koupab pour komet en tel fot, i devre rekonnet sa pese ki i'n komet.

⁶ An reparasyon pour sa pese ki i'n komet, i ava anmenn en femel mouton oubyen en kabri ki i'n pran parmi son troupo, koman sakrifis devan SENYER pour pardon son pese. Pret ava fer rityel pardon pour son pese.

⁷ Me si i pa kapab ganny en mouton koman sakrifis pour pardon pese ki i'n komet, alor, i ava anmenn devan SENYER, de tourtrel oubyen de pizon. Enn koman sakrifis pour pardon pese, lot koman sakrifis konplet.

⁸ I ava anmenn zot kot pret ki ava ofer premyerman, zwazo ki pour pardon pese. I ava kas son likou, me san ki i separ son latet.

⁹ Pret ava asperz en pe disan sa zwazo ki pour pardon pese obor lotel, tandis ki i ava vers leres disan ater devan lotel. Sa i en sakrifis pour pardon pese.

¹⁰ I ava ofer dezyenm zwazo koman en sakrifis konplet dapre regle-man. Pret ava fer rityel pour sakrifis pardon son pese ki i'n komet, e i ava ganny pardonnen.

¹¹ Me, si i pa posib pour en dimoun ganny de tourtrel oubyen de pizon, alor i kapab ofer koman lofrann pour pardon pese ki i'n komet, en dizyenm mezir lafarin meyer kalite. Me i pa devre azout delwil avek, ni met lansan lo la, akoz i en lofrann pour pardon pese.

¹² I ava anmenn sa lafarin kot pret ki ava pran en ponnyen koman porsyon rezerve pour SENYER e bril li lo lotel, avek lezot lofrann brile par dife pour SENYER. Sa i en lofrann pour pardon pese.

¹³ Alor, pret ava fer rityel pardon pese sa zonm, pour nenport pese ki i'n komet, e i ava ganny pardonnen. Sa ki reste, ava vin par sa pret, parey dan ka en lofrann vezetal.

Sakrifis Reparasyon

¹⁴ SENYER ti dir Moiz:

¹⁵ Si, enkonsyanman, en dimoun i komet en fot grav, an gardan sa ki'n konsakre pour SENYER, la sa ki i devre fer: I ava anmenn devan SENYER, koman sakrifis reparasyon, en mouton mal, san defo, sorti dan son troupo. Son valer pou ganny estimen an pyes larzan, dapre valer ki an viger dan sanktyer.

¹⁶ I devre donn konpansasyon pour sa domaz kont sanktyer, an azoutan en senkyenm parti son valer e donn avek sa pret ki ava fer rityel pardon son pese avek sa mouton, e sa dimoun ava ganny pardonnen.

¹⁷ Sa enn ki fer pese kont enn sa bann komannman SENYER, menm si i fer li enkonsyanman, i koupab e i ava responsab pour son fot.

¹⁸ I devre anmenn kot pret en mouton mal, san defo, sorti dan son troupo, estimen dapre valer pour sakrifis reparasyon. Pret ava fer rityel pardon pour fot ki i'n komet san ki i ti rann kont, e i ava ganny pardonnen.

¹⁹ Sa i en sakrifis reparasyon, akoz i ti koupab devan SENYER.