Levitik 3 - Labib An Kreol Seselwa

Sakrifis Lape

¹ Si en dimoun i ofer en sakrifis lape, i ava ofer en zannimo ki sorti dan son troupo bef. I ava ofer SENYER en mal oubyen en femel ki san defo.

² I ava poz son lanmen lo latet sa zannimo e i ava egorz li devan Latant Rankont. Bann pret, bann garson Aaron, ava asperz disan otour lotel.

³ Pour sa sakrifis lape, i ava ofer en lofrann brile dan dife devan SENYER: Lagres ki kouver trip ek tou lagres ki lo trip,

⁴ son de ronnyon avek lagres ki anvlop zot, sa ki kouver son kote, ek bann morso ki avek lefwa, ava ganny detase ansanm avek bann ronnyon.

⁵ Bann garson Aaron ava bril sa bann morso lo lotel ansanm avek sakrifis konplet ki'n ganny plase lo dibwa ki pe brile. Sa i ava en sakrifis brile par dife ki anvoy en loder ki fer plezir SENYER.

⁶ Si en dimoun i ofer koman sakrifis lape en zannimo sorti dan son troupo mouton oubyen kabri, i ava pran en mal oubyen en femel ki san okenn defo.

⁷ Si i ofer en zenn mouton, i ava prezant li devan SENYER.

⁸ I ava poz son lanmen lo latet sa zannimo; i ava egorz li devan lantre Latant Rankont, e bann garson Aaron ava asperz son disan otour lotel.

⁹ Pour sa sakrifis lape, i ava ofer koman sakrifis brile devan SENYER, tou lagres, son lake antye depi kot son kolonn vertebral, lagres ki kouver trip ek tou lagres ki anvlop trip,

¹⁰ son de ronnyon avek lagres ki anvlop zot, sa ki dan son kote ek son bann morso lefwa e ki detas ansanm avek bann ronnyon.

¹¹ En pret ava bril sa bann morso lo lotel. Sa i ava en nouritir, brile pour SENYER.

¹² Si en dimoun i ofer en kabri, i ava prezant li devan SENYER.

¹³ I ava poz son lanmen lo latet sa zannimo, egorz li devan Latant Rankont, e bann garson Aaron ava asperz disan otour lotel.

¹⁴ Pour sa sakrifis, i ava ofer koman sakrifis brile devan SENYER: Tou lagres ki kouver trip ek tou lagres ki anvlop trip,

¹⁵ son de ronnyon avek lagres ki kouver zot, sa ki dan son kote, ek son bann morso lefwa, ki i ava detas ansanm avek bann ronnyon.

¹⁶ En pret ava bril sa bann morso lo lotel koman en lofrann brile par dife, ki anvoy en loder ki fer plezir. Tou lagres i ganny rezerve pour SENYER.

¹⁷ Zot pa devre manz ni lagres, ni disan. Sa i en lalwa pour touzour, pour tou zot bann zenerasyon, partou dan nenport landrwa kot zot ava reste.