Levitik 27 - Labib An Kreol Seselwa

Lalwa lo bann Don

¹ SENYER ti koz avek Moiz:

² Dir avek pep Izrael: Si en dimoun i oule akonpli en ve anver SENYER, i ava fer li dapre valer en et imen.

³ Pour en zonm aze ant 20 a 60 an, i ava 50 pyes larzan, dapre larzan sanktyer.

⁴ Pour en fanm: 30 pyes larzan.

⁵ Pour en fiy aze ant 5 a 20 an, son valer ava 20 pyes; pour en garson, dis pyes.

⁶ Ant en mwan a senk an, i ava senk pyes larzan pour en garson, trwa pyes pour en fiy.

⁷ Pour en dimoun ki annan plis ki 60 an, son valer ava 15 pyes larzan pour en zonm e 10 pyes larzan pour en fanm.

⁸ Si en dimoun ki'n fer en ve i tro pov pour li peye, i ava ganny prezante devan en pret. Pret ava fer en lestimasyon baze lo mwayen sa dimoun ki'n fer sa ve.

⁹ Si i konsern en zannimo ki kapab ganny ofer koman sakrifis an loner SENYER, sa zannimo ki ava kapab ganny ofer SENYER ava ganny konsakre.

¹⁰ Fodre pa ranplas li, ni fer lesanz avek en lot zannimo, menm si sa zannimo i pli bon oubyen pli move. Me si en zannimo i ganny ranplase par en lot, tou le de ava ganny konsakre.

¹¹ Si i konsern en zannimo enpir ki pa kapab ganny ofer koman en sakrifis an loner SENYER, sa zannimo ava ganny prezante devan en pret.

¹² Sa pret ava evalye sa zannimo an bonn sante oubyen non; son lestimasyon ava final.

¹³ Me si zot oule reaste sa zannimo, fodre azout en senkyenm lo valer fikse.

¹⁴ Si en dimoun i konsakre son lakaz an loner SENYER, en pret ava estimen si sa lakaz i dan bon leta oubyen non. Son lestimasyon ava final.

¹⁵ Si sa dimoun i oule reaste son lakaz konsakre, fodre i azout en senkyenm lo valer fikse e sa lakaz ava revin pour li.

¹⁶ Si en dimoun i konsakre en porsyon son later an loner SENYER, valer sa later ava baze lo kantite legren ki kapab ganny senmen lo la: 50 pyes larzan pour 300 kilo lagrenn lorz.

¹⁷ Si sa dimoun i konsakre son morso later o konmansman lannen zibile, valer sa later ava baze lo son pri.

¹⁸ Me si sa morso later in ganny konsakre apre lannen zibile, pret ava kalkil tarif dapre bann lannen ki reste ziska prosen lannen zibile. Pou annan en rediksyon lo valer ki'n ganny fikse.

¹⁹ Si sa dimoun i anvi reaste sa morso later ki i'n konsakre, i devre pey en senkyenm en plis lo valer ki ti'n ganny fikse e i ava revin propriyeter.

²⁰ Me si sa porsyon later pa'n ganny reaste, oubyen in ganny vann avek en lot dimoun, alor sa later pa pou kapab ganny reaste.

²¹ Ler sa morso later ava ganny libere dan lannen zibile, i ava vin sakre pour SENYER e propriyete bann pret, koman en morso later ki'n ganny konsakre an loner SENYER pour touzour.

²² Si en dimoun i konsakre an loner SENYER, en later ki i'n aste, me ki pa fer parti en propriyete,

²³ pret ava kalkil son valer ziska lannen zibile e pri ava ganny peye menm zour. Sa i en don sakre pour SENYER.

²⁴ Dan lannen zibile, sa porsyon later ava retourn pour sa dimoun avek ki i ti'n ganny aste e ki ti propriyeter sa later.

²⁵ Tou bann evalyasyon ava ganny fer dapre larzan sanktyer: En pyes i pez 10 granm.

²⁶ Personn pa pou konsakre premye zannimo ki ne parmi son troupo, akoz koman en zannimo premye ne, i deza pour SENYER: Bef oubyen mouton, zot pour SENYER.

²⁷ En zannimo ki enpir ava kapab ganny reaste an azoutan en senkyenm valer ki'n ganny fikse. Si i pa'n ganny reaste, i ava ganny vann dapre lestimasyon.

²⁸ Tou sa ki en zonm in konsakre pour SENYER, pa pou kapab ganny vann ni reaste. Sa i aplik pour zonm, zannimo, en propriyete. Tou sa ki'n ganny konsakre pour SENYER i vin en keksoz sakre.

²⁹ Tou zonm ki'n ganny konsakre pour SENYER pa kapab ganny reaste. I ava ganny touye.

³⁰ En dizyenm parti prodwi later ek fri bann pye dibwa i pour SENYER: Zot in ganny konsakre pour SENYER.

³¹ Sa enn ki ava oule reaste en parti sa dizyenm ki pour SENYER, ava bezwen azout en senkyenm.

³² Tou ladim bef, mouton ek kabri, savedir sak dizyenm zannimo ki pas anba baton berze, ava ganny konsakre pour SENYER.

³³ Pa rode si sa zannimo i bon ouswa i move, akoz i pa pou ganny ranplase. Me si kantmenm sa, en lesanz in ganny fer, alor tou le de zannimo ava sen e zot pa pou kapab ganny reaste.

³⁴ Sa i bann komannman ki SENYER ti donn Moiz pour pep Izrael lo montanny Sinai.