Levitik 23 - Labib An Kreol Seselwa

Bann Lafet dan Izrael

¹ SENYER ti koz avek Moiz:

² Dir avek pep Izrael: Pour lokazyon bann selebrasyon solannel an loner SENYER, zot ava konvok bann rasanbleman sakre. La sa bann lafet:

Saba

³ Zot ava travay pandan sis zour. Me setyenm zour i saba, en zour repo konplet, en rasanbleman sakre. Zot pa pou travay sa zour; i en saba an loner SENYER partou kot zot ava pe reste.

⁴ La bann lafet solannel an loner SENYER, bann rasanbleman sakre, ki zot ava selebre dan letan ki ganny fikse.

Lafet Pak ek Lafet Dipen san Lelven

⁵ Premye mwan, katorzyenm zour, ler lannwit pe tonbe, pou annan en selebrasyon Pak an loner SENYER.

⁶ Kenzyenm zour sa menm mwan, i ava lafet Dipen san lelven an loner SENYER. Pandan set zour, zot ava manz dipen san lelven.

⁷ Zot ava fer en rasanbleman sakre son premye zour; zot pa pou fer okenn travay ordiner.

⁸ Pandan set zour, zot ava prezant SENYER bann sakrifis brile. Pou annan en rasanbleman sakre setyenm zour. Zot pa pou fer okenn travay tou le zour.

Lofrann Premye Fri

⁹ SENYER ti koz avek Moiz:

¹⁰ Dir avek pep Izrael: Kan zot ava antre dan sa pei ki mon pe donn zot, ler zot ava fer rekolt, zot ava anmenn kot pret, premye tiz dan sa rekolt.

¹¹ Pret ava prezant li devan SENYER pour ki ou ganny aksepte; pret ava fer sa, lannmen saba.

¹² Zour zot ava fer rityel avek lofrann sa tiz, zot ava ofer SENYER en zenn mouton aze enn an, san defo, koman en sakrifis konplet.

¹³ Avek lofrann vezetal, zot ava ofer en lofrann brile sis kilo lafarin petri avek delwil, en lofrann ki anvoy en loder ki fer plezir SENYER, ek lofrann en lit edmi diven.

¹⁴ Zot pa pou manz ni dipen, ni zepi griye, ni nouvo legren avan sa zour kan zot ava anmenn lofrann zot Bondye. Sa i en desizyon pour touzour ki valab pour tou bann zenerasyon, dan okenn landrwa kot zot ava pe reste.

¹⁵ Zot ava kont set semenn konplet apartir lannmen saba, setadir, depi zour ki sa tiz ti ganny prezante dapre rityel.

¹⁶ Zot ava kont 50 zour ziska lannmen setyenm saba. Alor, zot ava prezant SENYER en lofrann vezetal zot premye rekolt.

¹⁷ Zot ava anmenn pour rityel prezantasyon sorti kot zot, de dipen fer avek trwa kilo lafarin meyer kalite e kwi avek lelven. Sa i ava premye lofrann dipen pour SENYER.

¹⁸ Avek sa dipen, zot ava prezant set zenn mouton enn an, san tas, en zenn toro ek de bouk. Sa i ava en sakrifis konplet par dife pour SENYER, ansanm avek lofrann vezetal, lofrann labwason, en lofrann brile par dife ki anvoy en loder ki fer plezir SENYER.

¹⁹ Zot ava osi ofer en bouk koman en sakrifis pour pardon pese, avek de zenn mouton aze enn an pour en sakrifis lape.

²⁰ Avek sa dipen ek de zenn mouton, pret ava fer rityel lofrann devan SENYER; sa bann lofrann i sen pour SENYER. Zot ava vin pour pret.

²¹ Sa menm zour, zot ava konvok en lasanble sakre; zot pa pou fer okenn travay ordiner. Sa i en regleman pour touzour, pour tou bann zenerasyon, la kot zot ava pe reste.

²² Kan zot ava fer rekolt lo zot later, zot pa pou koup bann zepi ki'n pous lo balizaz, ni ranmas sa ki reste apre rekolt. Zot ava les sa pour bann pov ek bann etranze. Mwan menm SENYER zot Bondye.

Lafet Lanmizik

²³ SENYER ti koz avek Moiz:

²⁴ Dir avek pep Izrael: Premye zour, setyenm mwan, ou ava obzerv en zour repo konplet. Sa i ava en zour souvenir, avek laklamasyon dan en lasanble sakre.

²⁵ Zot pa pou fer okenn travay ordiner; zot ava ofer SENYER bann lofrann brile par dife.

Zour Rityel Pardon Pese

²⁶ SENYER ti koz avek Moiz:

²⁷ Dizyenm zour, setyenm mwan, i zour rityel pardon pese. I ava annan en rasanbleman sakre. Zot ava zennen e ofer SENYER bann lofrann brile par dife.

²⁸ Lazournen antye, zot pa pou travay, akoz sa i en zour rityel pardon pese; en zour pardon pour zot pese devan SENYER zot Bondye.

²⁹ Sa enn ki pa fer zenn sa lazournen antye, ava ganny met an deor kominote Izraelit.

³⁰ Sa ki fer okenn travay sa zour, mon pou fer li disparet parmi son pep.

³¹ Zot pa pou fer okenn travay. Sa i en re-gle-man pour touzour atraver tou bann zenerasyon, dan tou landrwa kot zot ava pe reste.

³² Sa zour ava en saba repo konplet e zot ava fer li en zour zenn. Nevyenm zour sa mwan, zot ava obzerv zot saba depi aswar ziska lannmen swar.

Lafet bann Rekolt

³³ SENYER ti koz avek Moiz:

³⁴ Dir avek pep Izrael: Kenzyenm zour, setyenm mwan e pandan set zour, i ava annan lafet rekolt an loner SENYER.

³⁵ Premye zour, pou annan en rasanbleman sakre; zot pa pou fer okenn travay ordiner.

³⁶ Pandan set zour, zot ava ofer SENYER bann lofrann brile par dife. Wityenm zour, zot ava obzerv en rasanbleman sakre e prezant SENYER bann lofrann brile par dife. Sa i en lasanble solannel; zot pa pou fer okenn travay ordiner.

³⁷ Sa i bann lafet solannel an loner SENYER ki'n ganny fikse e zot ava konvok bann rasanbleman sakre, pour prezant SENYER bann lofrann brile par dife, bann sakrifis konplet ek bann lofrann vezetal, bann sakrifis lape ek bann lofrann diven, dapre regleman sak zour.

³⁸ Sa ava an plis ki bann saba an loner SENYER, apard zot bann don ek tou bann lofrann volonter e pour akonpli en ve ki zot fer anver SENYER.

³⁹ Kenzyenm zour setyenm mwan, kan zot ava rekolte prodwi later, zot ava selebre lafet SENYER pandan set zour: Premye zour ek wityenm zour ava repo konplet.

⁴⁰ Premye zour, zot ava pran bann meyer fri, bann brans palmye, bann brans kouver avek fey ek brans bann pye dibwa ki pous obor larivyer. Pandan set zour, zot ava selebre dan lazwa devan SENYER zot Bondye.

⁴¹ Zot ava gard sa lafet pour selebre SENYER pandan set zour toulezan. Zot ava obzerv sa lafet setyenm mwan, koman en regleman pour touzour pour tou bann zenerasyon.

⁴² Pandan set zour, zot ava reste dan latant; tou sitwayen Izrael ava reste dan latant.

⁴³ Konmsa, tou bann zenerasyon ava rapel ki mon ti fer pep Izrael reste anba latant ler mon ti fer zot sorti dan pei Lezip. Mwan menm SENYER zot Bondye.

⁴⁴ Alor, Moiz ti proklanm avek pep Izrael bann lafet an loner SENYER.