Levitik 22 - Labib An Kreol Seselwa

Sentete bann Lofrann

¹ SENYER ti koz Moiz:

² Dir Aaron ek son bann garson, sa i bann ka kot zot pa devre manz lofrann ki pep Izrael in ofer mwan, pour ki zot pa dezonor mon non ki sen. Mwan menm SENYER.

³ Dir zot: Si dan bann zenerasyon fitir, en zonm sorti dan fanmir bann pret i apros bann lofrann sakre ki pep Izrael in ofer mwan, alor ki i dan en leta enpir, sa zonm pou ganny retire pour touzour dan mon servis. Mwan menm SENYER.

⁴ Personn parmi bann desandan Aaron ki annan en maladi ki parey lalep oubyen ki annan en desarz, pa pou kapab manz bann lofrann sakre, ziska ki i'n pirifye li. Sa i aplik osi pour sa enn ki'n tous en kadav, sa enn ki son sperm in koule,

⁵ e tou dimoun ki'n tous en pti bebet oubyen nenport imen ki'n vin enpir pour nenport rezon.

⁶ En pret ki'n ganny bann kontak parey, ava enpir ziska aswar. I pa pou kapab manz bann lofrann sakre, avan ki i'n lav son lekor dan delo.

⁷ I ava vin pir de ki soley i kouse. Apre, i ava kapab manz lofrann sakre, akoz sa i son nouritir.

⁸ I pa devre manz zannimo ki'n mor, ni sa ki'n ganny desire par bebet sovaz; sa i ava rann li enpir. Mwan menm SENYER.

⁹ Bann pret ava akonpli tou sa ki mon'n ordonnen, san rann zot koupab pour en pese profanasyon ki anmenn lanmor. Mwan menm SENYER ki rann zot sen.

¹⁰ Okenn Izraelit pa devre manz bann lofrann sakre. Okenn envite ni serviter pret pa devre manz lofrann sen.

¹¹ Me en lesklav ki pret in aste, ava kapab manz lofrann sakre. En serviter osi ki'n ne dan son lakaz, ava kapab manz son nouritir.

¹² Fiy en pret ki'n marye avek en dimoun ordiner, pa devre manz lofrann sakre ki'n ganny met de kote.

¹³ Me fiy en pret ki'n vin vev, oubyen ki'n divorse, ki san zanfan e ki'n retourn kot son papa parey letan son zenes, ava kapab manz nouritir son papa. Okenn dimoun ordiner pa pou kapab manze.

¹⁴ Si, san mazinen, en zonm i manz lofrann sakre, i ava azout en senkyenm valer sa lofrann sakre e donn pret.

¹⁵ Bann pret pa devre profann bann lofrann sakre ki pep Izrael i ofer SENYER.

¹⁶ Si zot manz bann lofrann sakre, zot ava pe komet en fot ki merit reparasyon. Mwan menm SENYER ki rann zot sen.

Regleman Konsernan bann Viktim

¹⁷ SENYER ti koz avek Moiz:

¹⁸ Dir avek Aaron, son bann zanfan e pep Izrael antye. Dir zot: Ler en dimoun ki parmi pep Izrael, oubyen en etranze ki reste Izrael i prezant SENYER en sakrifis konplet, ki swa en ve, en lofrann volonter,

¹⁹ pour ki sa lofrann i ganny aksepte, i ava pran en mal san defo parmi troupo bef, mouton oubyen kabri.

²⁰ I pa devre prezant en zannimo ki annan en defo, sankwa mon pa pou aksepte li dan ou faver.

²¹ Kan en zonm i ofer SENYER en sakrifis lape sorti dan troupo son bef, mouton oubyen kabri, swa pour li akonpli en ve oubyen volonterman, fodre ki sa zannimo i san defo e san okenn tas.

²² La sa ki ou pa devre ofer SENYER, ni met lo lotel koman en lofrann brile par dife pour SENYER: En zannimo aveg, estropye, ki annan en lapat kase, poro, lagal, dart.

²³ Ou ava kapab prezant koman en sakrifis volonter, en bef, en mouton oubyen en kabri diform, ki annan en lapat pli long ki lot. Me i pa pou ganny aksepte pour en ve.

²⁴ Ou pa devre prezant SENYER en zannimo avek testikil kraze, desire, arase oubyen koupe; ou pa pou fer sa dan ou pei.

²⁵ Ou pa devre osi aksepte okenn sa bann zannimo avek en etranze pour ofer koman nouritir pour ou Bondye. Blesir ki zot in gannyen i vin en defo. Zot pa pou kapab ganny aksepte.

²⁶ SENYER ti koz avek Moiz:

²⁷ Apre nesans en zenn bef oubyen en mouton, oubyen en kabri, i ava reste set zour avek son manman. Apartir wityenm zour, i ava kapab ganny prezante koman en lofrann brile pour SENYER.

²⁸ Me ou pa pou egorz en bef, en mouton oubyen en kabri avek son piti menm zour.

²⁹ Kan ou ofer SENYER en sakrifis louanz, ou ava fer li dan en mannyer akseptab pour ou.

³⁰ I ava ganny manze menm zour; ou pa pou les okenn restan ziska bomaten. Mwan menm SENYER.

³¹ Zot ava gard mon bann komannman. Mwan menm SENYER.

³² Zot pa pou dezonor mon non sakre, pour ki mon ganny rekonnet koman sen parmi pep Izrael. Mwan menm SENYER; mwan ki rann ou sen.

³³ Mwan ki'n fer ou sorti Lezip pour vin ou Bondye. Mwan menm SENYER.