Levitik 21 - Labib An Kreol Seselwa

Sentete bann Pret

¹ SENYER ti koz avek Moiz: Dir avek bann pret, zanfan Aaron. Dir zot: En pret pa kapab rann li enpir akoz en lanmor dan son fanmir,

² sof enn son pli pros paran: Son manman, son papa, son garson, son fiy, son frer;

³ oubyen son ser ki ankor vyerz; i son fanmir pros ki pa ankor marye; i kapab rann li enpir pour sa fiy.

⁴ Koman sef en fanmir parmi lepep, i pa kapab rann li enpir e profann son lekor.

⁵ Bann pret pa pou raz zot latet, ni raz zot labarb lo latanp, ni sizle zot lapo.

⁶ Zot ava reste sen pour zot Bondye e pa dezonor non zot Bondye. Annefe, zot ki ofer Bondye bann sakrifis ki ganny brile, nouritir zot Bondye. Alor, zot ava sen.

⁷ Zot pa pou marye avek en prostitye oubyen avek en fanm ki'n ganny dezonore par en lot zonm, ni avek en fanm divorse. Annefe, zot in ganny konsakre pour Bondye.

⁸ Ou ava konsider bann pret koman sen, akoz zot ofer nouritir ou Bondye. Zot ava sen pour mwan SENYER, akoz mwan ki rann zot sen.

⁹ Ler fiy en pret i dezonor li dan prostitisyon, i pe dezonor son papa. I ava ganny brile vivan.

¹⁰ Gran-Pret ki'n ganny met par lao son bann frer pret, sa enn ki delwil in ganny verse lo son latet, ki'n ganny konsakre e port bann lenz sakre, pa pou delarg son seve, ni desir son lenz.

¹¹ I pa pou al kot i annan en lekor mor; i pa pou rann li enpir, ni akoz son papa, ni akoz son manman.

¹² I pa pou sorti dan sanktyer pour li profann sanktyer son Bondye. Annefe, i'n ganny konsakre avek delwil son Bondye. Mwan menm SENYER.

¹³ Gran-Pret ava marye selman avek en fiy vyerz.

¹⁴ I pa devre marye avek en vev oubyen en fanm divorse, ni avek en fanm ki'n ganny dezonore, ni avek en prostitye. I ava marye avek en fiy vyerz sorti parmi son parante.

¹⁵ I pa pou dezonor son desandans dan son fanmir, akoz mwan SENYER ki konsakre li.

¹⁶ SENYER ti koz avek Moiz:

¹⁷ Dir avek Aaron: Atraver tou bann zenerasyon, okenn zonm parmi ou bann desandan ki annan en diformite, pa pou kapab prezant nouritir devan Bondye.

¹⁸ Annefe, okenn zonm ki annan en diformite pa pou kapab prezant li devan Bondye, tel ki en aveg, enn ki bwete, oubyen ki'n ganny defigire, oubyen ki annan en lipye pli long ki lot;

¹⁹ ni enn ki annan en lipye oubyen en lanmen kase;

²⁰ ni enn ki bosi, ni en pti nen, ni en zonm ki annan en tas dan lizye, oubyen lagal, dart, oubyen testikil kraze.

²¹ Okenn desandan pret Aaron ki enfirm pa kapab prezant li devan SENYER pour ofer bann lofrann brile par dife. I annan en diformite, i pa pou kapab prezant devan Bondye, pour ofer li nouritir.

²² Sepandan, i ava kapab manz nouritir son Bondye, sa ki tre sakre e sa ki sakre.

²³ Me, akoz son lenfirmite, e pour ki i pa profann mon bann sanktyer, i pa pou kapab apros kot rido, ni kot lotel. Mwan menm SENYER; mwan ki konsakre li.

²⁴ Moiz ti dir tousala avek Aaron, son bann garson ek pep Izrael antye.