Levitik 2 - Labib An Kreol Seselwa

Lofrann Vezetal

¹ Si en dimoun i oule ofer SENYER en lofrann vezetal, i ava ofer son meyer lafarin. I ava vers delwil e met lansan lo la.

² I ava anmenn sa lofrann kot bann pret, bann garson Aaron. En pret ava pran en ponnyen sa lafarin melanze avek delwil ek lansan, e bril lo lotel koman sa porsyon rezerve pour SENYER. Sa i en lofrann brile dan dife, ki anvoy en loder ki fer plezir SENYER.

³ Sa ki reste dan sa lofrann vezetal, ava vin pour Aaron ek son bann garson. I en porsyon tre sakre sa sakrifis ki'n ganny brile dan dife pour SENYER.

⁴ Si ou ofer en lofrann vezetal kwi dan four, i devre en gato fer avek lafarin meyer kalite, san lelven, petri avek delwil, ek en galet san lelven, aroze avek delwil.

⁵ Si ou ofer en lofrann vezetal kwi lo plak, i devre ganny fer avek lafarin meyer kalite, san lelven, petri avek delwil.

⁶ Ou ava kas li an morso e vers delwil lo la; sa i en lofrann vezetal.

⁷ Si ou ofer en lofrann vezetal ki'n ganny kwi dan en pwalon, i devre ganny fer avek lafarin meyer kalite ek delwil.

⁸ La koman ou devre anmenn en lofrann vezetal pour SENYER: Ou ava anmenn sa lofrann kot pret ki ava prezant li devan lotel.

⁹ Sa pret ava pran en porsyon sa sakrifis rezerve pour SENYER e bril li lo lotel. Sa i ava en sakrifis brile dan dife, ki anvoy en loder ki fer plezir SENYER.

¹⁰ Sa ki reste dan sa lofrann ava vin pour Aaron ek son bann garson. I en porsyon tre sakre sa lofrann ki'n ganny brile dan dife pour SENYER.

¹¹ Tou lofrann vezetal ki ganny ofer devan SENYER pa devre annan lelven. Ou pa devre servi ni lelven, ni dimyel dan sakrifis brile pour SENYER.

¹² Ou kapab ofer SENYER lofrann premye fri, me fodre pa bril li lo lotel pour li donn en loder ki fer plezir.

¹³ Ou ava azout en pe disel dan tou lofrann vezetal ki ou ofer SENYER. Pa zanmen oubliy disel dan lofrann, akoz i reprezant lalyans ki Bondye in fer avek ou. Alor, avek tou lofrann ou devre azout disel.

¹⁴ Kan ou ofer SENYER en lofrann bann premye prodwi ou propriyete, ou ava ofer legren ki ou'n kraze, sorti dan zepi ki ou'n griye dan dife.

¹⁵ Ou ava azout delwil e met lansan lo la. Sa i en lofrann vezetal.

¹⁶ En pret ava bril en parti sa legren kraze avek delwil ek lansan. Sa i en lofrann brile dan dife pour SENYER.