Levitik 19 - Labib An Kreol Seselwa

Konman Servi Bondye

¹ SENYER ti koz avek Moiz:

² Koz avek pep Izrael: Zot ava sen, akoz mwan SENYER zot Bondye, mon sen.

³ Sakenn zot ava annan respe pour son manman ek son papa e zot ava obzerv mon bann saba. Mwan menm SENYER, zot Bondye.

⁴ Pa tourn ver bann fo bondye, ni fonn metal pour fabrik bann stati. Mwan menm SENYER zot Bondye.

⁵ Kan zot ofer SENYER en lofrann lape, fer li pour ki i ganny aksepte dan ou faver.

⁶ Sa lofrann ava ganny manze son menm zour, oubyen son lannmen ki i'n ganny ofer; tou sa ki reste trwazyenm zour ava ganny brile.

⁷ Si zot manz li trwazyenm zour, zot pa pou ganny mon faver.

⁸ Sa enn ki manz sa, ava pe profann keksoz ki'n konsakre pour mwan. I ava koupab akoz in komet en fot. I ava ganny ekskli parmi lepep.

⁹ Kan ou fer rekolt lo ou later, ou pa pou ranmas ziska dan bor ou plantasyon, ni retournen pour ranmas sa ki'n reste.

¹⁰ Ou pa pou retournen pour ranmas bann grap rezen ki ti'n reste lo pye, ni bann ki ti'n tonbe. Ou ava les sa pour bann pov ek bann etranze. Mwan menm SENYER ou Bondye.

¹¹ Pa vole; pa koz manti, ni tronp ou prosen.

¹² Ou pa devre fer fo serman an servan mon non; ou ava pe dezonor non ou Bondye. Mwan menm SENYER.

¹³ Ou pa pou eksplwat ou prosen; ou pa devre vol li. Pa gard ziska lannmen bomaten lapey en zournalye.

¹⁴ Ou pa pou ensilte en dimoun ki sourd ni met en lobstak devan en aveg. Ou ava annan respe pour ou Bondye. Mwan menm SENYER.

¹⁵ Pa rann okenn zizman enzis; pa fer preferans pour sa enn ki pov, ni favoriz sa enn ki pwisan. Ou ava ziz ou prosen avek lazistis.

¹⁶ Pa senm kalonmni kont ou prosen, ni fer en lakizasyon ki fer disan ou prosen koule. Mwan menm SENYER.

¹⁷ Ou pa pou annan okenn laenn dan ou leker kont ou prosen; reprimann ou prosen pour ou pa responsab son pese.

¹⁸ Ou pa pou vanze, ni gard rankin kont personn parmi ou pep; me ou devre kontan ou prosen parey ou menm. Mwan menm SENYER.

¹⁹ Obzerv mon bann regleman. Pa les de zannimo lespes diferan krwaz avek kanmarad; pa senm legren diferan kalite dan menm plantasyon, ni met en lenz ki'n ganny fer avek de kalite latwal.

²⁰ Si en zonm i dormi avek en fanm lesklav ki ti'n ganny promet pour en lot zonm, me ki pa ti'n ganny ni aste, ni libere, en lanket ava bezwen ganny fer. Pou bezwen annan en pinisyon, me sa zonm pa pou ganny kondannen anmor, akoz sa fanm pa ti ankor ganny libere.

²¹ Koman en sakrifis reparasyon pour SENYER, sa zonm ava anmenn en bouk devan lantre Latant Rankont.

²² Son pese ava ganny pardonnen, kan devan SENYER e gras a lofrann sa bouk pour reparasyon pese, pret ava fer rityel pardon pour son pese.

²³ Kan zot ava'n antre dan pei Kanaan e plant tou kalite pye fri, zot ava konsider sa bann fri koman ensirkonsi. Pandan 3 an zot pa pou manz sa bann fri, akoz zot ensirkonsi.

²⁴ Katriyenm lannen, tou bann fri ava ganny konsakre dan en lafet rezouisans an loner SENYER.

²⁵ Dan senkyenm lannen, zot ava kapab manz fri. Konmsa ki zot rekolt ava ogmante: Mwan menm SENYER zot Bondye.

²⁶ Pa manz okenn lavyann avek son disan. Pa pratik mazik, ni devinen.

²⁷ Pa koup an ron bor zot seve, ni zot labarb lo kote latanp.

²⁸ Pa fer mark dan zot lapo an siny dey, ni fer okenn tatouaz lo zot lekor. Mwan menm SENYER.

²⁹ Pa detri loner ou fiy e fer li vin en prostitye. Sinon, pei antye ava vin prostitye e ranpli avek limoralite.

³⁰ Obzerv mon bann saba e annan respe pour mon sanktyer. Mwan menm SENYER.

³¹ Pa konsilte bann lespri dimoun mor, ni bann lespri divinasyon; pa al rod zot, akoz zot ava rann ou enpir. Mwan menm SENYER zot Bondye.

³² Ou ava lev debout devan en dimoun aze e respekte en vyeyar; ou ava annan respe pour ou Bondye. Mwan menm SENYER.

³³ Pa eksplwat en etranze ki vin reste dan ou pei.

³⁴ Tret sa etranze ki'n vin reste kot ou koman en sitwayen parmi zot. Kontan sa etranze parey ou menm akoz ou osi, ou ti etranze dan pei Lezip: Mwan menm SENYER ou Bondye.

³⁵ Ou pa devret azir an malonnet dan mezir longer, pwa oubyen kantite.

³⁶ Ou bann balans ek ou bann pwa, devret zis; ou bann mezir devret zis. Mwan menm SENYER ou Bondye ki'n fer ou sorti Lezip.

³⁷ Ou ava gard tou mon bann regleman ek mon bann desizyon, e met zot an pratik. Mwan menm SENYER.