Levitik 18 - Labib An Kreol Seselwa

Respe pour Relasyon Seksyel

¹ SENYER ti koz avek Moiz:

² Dir avek pep Izrael: Mwan menm SENYER zot Bondye.

³ Pa imit bann pratik ki ganny fer Lezip kot zot ti reste, ni sa ki ganny pratike dan pei Kanaan kot mon pe anmenn zot. Fodre pa swiv zot bann pratik.

⁴ Zot ava met an pratik mon bann lalwa e swiv mon bann regleman. Mwan menm SENYER zot Bondye.

⁵ Obzerv mon bann lalwa ek mon bann regleman: An metan sa bann regleman an pratik, en dimoun ava viv. Mwan menm SENYER.

⁶ Personn parmi zot pa pou ganny relasyon seksyel avek son fanmir pros. Mwan menm SENYER.

⁷ Ou pa pou dezonor ou papa e dekouver son touni, ni dezonor ou manman pour dekouver son touni. I ou manman; ou pa pou dekouver son touni.

⁸ Ou pa pou dormi avek fanm ou papa; sa i dezonor ou prop papa.

⁹ Ou pa pou dormi avek ou ser, ni fiy ou papa, ni fiy ou manman ki'n ne dan lakour oubyen an deor.

¹⁰ Ou pa pou dormi avek fiy ou garson oubyen fiy ou fiy; sa i en dezoner pour ou.

¹¹ Ou pa pou dormi avek fiy fanm ou papa; i en fanmir pros ou papa, i ou ser.

¹² Ou pa pou dormi avek ser ou papa. I fanmir pros ou papa; i ou tantin.

¹³ Ou pa pou dormi avek ser ou manman. I fanmir pros ou papa; i ou tantin.

¹⁴ Ou pa pou dormi avek frer ou papa. Ou pa devre apros son fanm; i ou tantin.

¹⁵ Ou pa pou dormi avek ou belfiy. I fanm ou garson; ou pa pou dekouver son touni.

¹⁶ Ou pa pou dormi avek fanm ou frer. I fanmir pros ou prop frer.

¹⁷ Ou pa pou dormi avek en fanm e osi avek son fiy. Ou pa devre dormi avek fiy son garson, ni fiy son fiy. Zot ou fanmir pros. Sa ava en laont.

¹⁸ Ou pa devre dormi avek ser ou fanm pandan ki i ankor vivan; sa i riske eksit bann rivalite.

¹⁹ Ou pa pou apros en fanm pandan son reg pour dormi avek li. I enpir.

²⁰ Ou pa pou annan relasyon seksyel avek fanm ou konpatriyot; ou pou rann ou enpir avek li.

²¹ Ou pa pou ofer enn ou zanfan an sakrifis avek Molek. Sa i ava dezonor non ou Bondye. Mwan menm SENYER.

²² Ou pa pou dormi avek en zonm parey ou dormi avek en fanm. Sa i degoutan.

²³ Ou pa pou ganny relasyon seksyel avek okenn zannimo. Sa i ava rann ou enpir parey li. En fanm osi pa devre ganny relasyon seksyel avek en zannimo. Sa i en aksyon degoutan.

²⁴ Pa rann zot enpir par okenn sa bann pratik. Se akoz sa bann pratik ki mon pe sas devan zot, sa bann nasyon ki'n rann zot enpir.

²⁵ Pei osi in vin enpir. Mon'n pini li akoz son bann fot e pei menm ti vomi son bann zabitan.

²⁶ Zot ava gard mon bann lalwa ek mon bann regleman. Okenn Izraelit, okenn etranze ki pe viv parmi zot, pa devre komet sa bann aksyon degoutan.

²⁷ Bann zabitan ki ti pe reste dan sa pei avan zot in komet sa bann aksyon degoutan e zot in rann sa pei enpir.

²⁸ Konmsa, zot pa ava rann sa pei enpir; e sa pei pa pou vomi zot, parey i ti fer anver bann nasyon ki ti la avan zot.

²⁹ Sa enn ki pratik okenn sa bann aksyon degoutan pou ganny sase parmi son pep.

³⁰ Alor, zot ava gard tou sa ki mon'n ordonn zot. Pa pratik sa bann aksyon degoutan ki ti ganny komet avan zot. Konmsa, zot pa ava rann zot enpir. Mwan menm SENYER zot Bondye.