Levitik 14 - Labib An Kreol Seselwa

Rityel Pirifikasyon pour Lalep

¹ SENYER ti koz avek Moiz:

² La lalwa konsernan rityel pirifikasyon bann ki ganny en maladi parey lalep kan zot ganny anmennen devan pret.

³ Pret ava sorti an deor kan e egzamin li. Si i'n geri avek son maladi ki parey lalep,

⁴ pret ava donn lord ki zot anmenn pour sa dimoun ki devre ganny pirifye, de zwazo vivan e pir, dibwa sed, lalenn rouz fonse ek en brans izop.

⁵ Pret ava donn lord touy enn sa zwazo dan en resipyan anter, anba delo kouran.

⁶ I ava pran sa zwazo vivan, dibwa sed, sa lalenn rouz ek sa brans izop e tranp tou ansanm avek sa zwazo vivan dan disan sa zwazo ki'n ganny touye anba delo kouran.

⁷ I ava fer laspersyon set fwa lo sa dimoun ki devre ganny pirifye avek son maladi ki parey lalep. Apre, i ava deklar li pir, e i ava larg sa zwazo vivan e les li anvol ver lakanpanny.

⁸ Sa dimoun ki pe ganny pirifye ava lav son lenz, raz tou son bann pwal, e pran en ben dan delo; apre i ava vin pir. Answit, i ava kapab retourn dan kan, me i ava reste an deor son latant pandan set zour.

⁹ Setyenm zour, i ava raz son latet, son labarb, son sousi, ek tou leres bann pwal. I ava osi lav son lenz e pran en ben dan delo. Alor i ava'n ganny pirifye.

¹⁰ Wityenm zour, i ava pran de mouton mal san defo, en zenn femel mouton aze enn an e san defo, en lofrann nef kilo lafarin meyer kalite, petri avek delwil, ek en demi lit delwil.

¹¹ Pret ki fer rityel pirifikasyon ava prezant devan SENYER sa zonm ki pe ganny pirifye dan lantre Latant Rankont avek bann lofrann.

¹² Pret ava pran en premye mouton e ofer koman en sakrifis reparasyon, ansanm avek sa demi lit delwil e i ava prezant zot devan SENYER dapre rityel.

¹³ I ava egorz sa mouton la kot zot egorz zannimo pour pardon pese oubyen pour sakrifis konplet, dan en landrwa sen. Annefe, sakrifis reparasyon, parey sakrifis pour pardon pese i tre sen. I en lofrann strikteman rezerve pour Bondye e i vin pour pret.

¹⁴ I ava pran disan zannimo sakrifis reparasyon e pas lo bout zorey drwat, lo pous lanmen drwat ek lo pous lipye drwat sa dimoun ki pe ganny pirifye.

¹⁵ Apre, pret ava pran en pe delwil e vers dan son lanmen gos.

¹⁶ I ava tranp son ledwa drwat dan delwil ki dan son lanmen gos, e fer laspersyon set fwa devan SENYER.

¹⁷ Avek sa delwil ki reste dan son lanmen, pret ava pas en pe lo zorey drwat, lo pous lanmen drwat, e lo pous lipye drwat sa dimoun ki pe ganny pirifye, la kot i ti'n pas disan zannimo sakrifis pour reparasyon.

¹⁸ Pret ava pas leres delwil ki dan son lanmen, lo latet sa dimoun ki pe ganny pirifye. Apre, i ava fer rityel pour pardon pese devan SENYER.

¹⁹ Pret ava ofer sakrifis pour pardon pese, e fer rityel demann pardon pour sa dimoun ki pe ganny pirifye. Answit, i ava egorz zannimo pour sakrifis konplet.

²⁰ Pret ava ofer sakrifis konplet ek lofrann vezetal lo lotel. Konmsa, ki i ava fer rityel pour pardon pese e sa dimoun ava ganny pirifye.

²¹ Si en dimoun i pov e i pa kapab ganny sa ki neseser, alor, i ava pran zis en mouton koman sakrifis reparasyon pour fer seremoni pardon son pese, ek en lofrann trwa kilo lafarin meyer kalite, petri avek delwil, ek en demi lit delwil.

²² I ava osi pran de tourtrel ek de pizon, dapre son mwayen; enn pour sakrifis pardon pese, lot pour sakrifis konplet.

²³ Wityenm zour, i ava anmenn tou sa bann lofrann kot pret devan lantre Latant Rankont, pour son pirifikasyon.

²⁴ Pret ava pran sa mouton pour sakrifis reparasyon, ek sa demi lit delwil, e i ava fer rityel prezantasyon devan SENYER.

²⁵ Pret ava egorz sa mouton pour sakrifis reparasyon. I ava pran disan sa mouton e pas lo bout zorey drwat, lo pous lanmen drwat, e lo pous lipye drwat sa dimoun ki pe ganny pirifye.

²⁶ Pret ava vers en pe delwil dan son lanmen gos.

²⁷ Avek son ledwa lanmen drwat, i ava asperz en pe sa delwil ki dan son lanmen gos, set fwa devan SENYER.

²⁸ I ava pas en pe sa delwil ki dan son lanmen lo bout zorey drwat, lo pous lanmen drwat, e lo pous lipye drwat sa dimoun ki pe ganny pirifye, la kot i ti'n pas disan zannimo pour sakrifis reparasyon.

²⁹ Pret ava pas leres delwil ki dan son lanmen, lo latet sa dimoun ki pe ganny pirifye, koman rityel pardon pese devan SENYER.

³⁰ Pret ava ofer enn sa tourtrel oubyen pizon, dapre sa ki sa zonm i'n kapab anmennen,

³¹ koman sakrifis pour pardon pese e lot koman sakrifis konplet, ansanm avek lofrann vezetal. Pret ava fer rityel pour pardon pese devan SENYER pour sa dimoun ki pe ganny pirifye.

³² Sa i bann lalwa konsernan en dimoun ki ganny maladi ki parey lalep ki napa mwayen neseser pour son pirifikasyon.

Mwazi lo Miray Lakaz

³³ SENYER ti koz avek Moiz ek Aaron:

³⁴ Kan zot ava'n antre dan pei Kanaan ki mon pou donn zot koman zot posesyon, e si mon met en tas mwazi dan en lakaz dan sa pei ki zot pou gannyen,

³⁵ propriyeter sa lakaz ava vin dir pret: Mon'n apersevwar en kalite tas maladi dan mon lakaz.

³⁶ Sa pret ava donn lord ki zot tir tou sa ki annan dan lakaz, avan ki li personnelman, i al egzamin sa lakaz; sinon, tou sa ki dan sa lakaz ava ganny deklare enpir. Answit, pret ava al egzamin sa lakaz.

³⁷ I ava egzamin sa tas. Si i remarke ki sa tas ki lo miray sa lakaz i kouler tire lo ver oubyen rouz e ki i form en kre dan miray,

³⁸ pret ava sorti lo padport sa lakaz ki i ava gard fermen pandan set zour.

³⁹ Setyenm zour, i ava retournen pour fer en lenspeksyon. Si sa tas lo miray sa lakaz in agrandi,

⁴⁰ pret ava donn lord pour ki zot tir bann ros kot sa tas in aparet e zet zot dan en landrwa enpir an deor lavil.

⁴¹ I ava fer grat miray lakaz partou anndan e fer zet tou grabo dan en landrwa enpir an deor lavil.

⁴² Apre, zot ava ranplas bann ros ki'n ganny tire, par lezot ros e pran en lot mortye pour rekrepi lakaz.

⁴³ Si sa tas mwazi i aparet ankor dan sa lakaz, apre ki bann ros in ganny tire, e ki miray in ganny grate e rekrepi,

⁴⁴ pret ava al fer en nouvo lenspeksyon. Si sa tas mwazi in agrandi dan lakaz, sa i ava en maladi parey lalep ki dan sa lakaz; sa lakaz i enpir.

⁴⁵ Pret ava fer kraz sa lakaz e fer retir tou son ros, dibwa ek tou krepisaz. I ava fer anmenn tousala an deor lavil, dan en landrwa enpir.

⁴⁶ An plis, si en dimoun i antre dan sa lakaz pandan ki i devre fermen, i ava enpir ziska aswar;

⁴⁷ e sa enn ki dormi dan sa lakaz, oubyen ki manz dan sa lakaz i devre lav son lenz.

⁴⁸ Me, si kan pret i vin egzamin sa lakaz, i remarke ki sa tas mwazi pa'n agrandi, apre ki lakaz ti'n ganny rekrepi, alor, pret ava deklare ki sa lakaz i pir; tas mwazi in disparet.

⁴⁹ Pour pirifikasyon sa lakaz, i ava pran de zwazo, avek dibwa sed, lalenn rouz ek izop.

⁵⁰ I ava egorz enn sa zwazo dan en resipyan anter anba delo kouran.

⁵¹ I ava pran sa dibwa sed, izop ek lalenn rouz ansanm avek sa zwazo vivan, e tranp tou dan disan sa zwazo ki'n ganny touye anba delo kouran e i ava asperz lakaz set fwa.

⁵² I ava fer rityel pirifikasyon sa lakaz avek disan sa zwazo avek delo kouran, dibwa sed, izop ek lalenn.

⁵³ I ava larg sa zwazo an deor lavil ver lakanpanny. Alor, i ava fer rityel pirifikasyon pour lakaz e sa lakaz ava vin pir.

⁵⁴ Sa i regleman konsernan bann diferan laform maladi lapo,

⁵⁵ mwazi lo lenz dan lakaz,

⁵⁶ klou, dart oubyen tas rouz,

⁵⁷ pour determin bann ka kot en dimoun oubyen en lobze i pir oubyen enpir. Sa i bann regleman konsernan bann maladi ki parey lalep.