Levitik 13 - Labib An Kreol Seselwa

Maladi Lapo parmi Zonm

¹ SENYER ti koz avek Moiz ek Aaron:

² Si lo lapo en zonm i devlop en lanflir, en dart, oubyen okenn tas ki pran laform en maladi lapo ki resanble lalep, sa dimoun ava ganny anmennen devan pret Aaron, oubyen kot enn son bann garson.

³ Pret ava egzamin sa maladi ki lo lapo sa zonm. Si pwal dan sa parti malad lo son lekor in vin blan e sa maladi in fer en trou dan son lapo, sa i en ka maladi parey lalep, e pret ava deklar sa zonm enpir.

⁴ Si sa tas lo son lapo i paret blan, me i pa'n fouy son lapo, e son pwal dan sa landrwa pa'n vin blan, pret ava plas sa zonm malad dan en landrwa izole pandan set zour.

⁵ Setyenm zour, pret ava reegzamin li. Si i konstate ki sa maladi in reste parey, e i pa'n fannen lo son lapo, pret ava gard li ankor set zour dan en landrwa izole.

⁶ Apre set zour, pret ava reegzamin li. Si sa maladi lapo in pali, e i pa'n fannen lo son lapo, alor pret ava deklar li pir. Sa ti zis en dart. Sa zonm ava lav son lenz e i ava pir.

⁷ Me si apre ki pret in deklar li pir, sa dart i fannen lo son lapo, i devre prezant li ankor devan pret.

⁸ Pret ava reegzamin li. Si i remarke ki sa dart in fannen lo son lapo, pret ava deklar li enpir. I annan lalep.

⁹ Kan en zonm i ganny en maladi lapo ki parey lalep, i ava ganny anmennen devan pret.

¹⁰ Pret ava egzamin li; si i annan en lanflir blan lo son lapo ki fer son pwal vin blan, e ki laser vif i paret dan sa lanflir,

¹¹ sa i en maladi parey lalep kronik. Pret ava deklar li enpir. I pa pou met li dan en landrwa izole akoz i enpir.

¹² Me si sa maladi lapo ki parey lalep i devlop lo son lapo, e ki i kouver lapo antye sa dimoun malad, depi son latet ziska son lipye, dapre sa ki i kapab war,

¹³ pret ava egzamin li. Si sa maladi i kouver son lekor antye, pret ava deklar li pir. I pir akoz tou son lekor in vin konpletman blan.

¹⁴ Me si en zour laser ovif i paret ankor, i ava'n vin enpir.

¹⁵ Pret ava egzamin sa laser ovif, e deklare ki i enpir. Laser ovif i enpir akoz i en maladi parey lalep.

¹⁶ Me si sa laser ovif i sanze ankor e revin blan, alor, i ava al kot pret,

¹⁷ e pret ava egzamin li. Si sa maladi in vin blan, alor, pret ava deklare ki sa malad in vin pir, e sa dimoun i pir.

¹⁸ Kan en dimoun i annan lo son lapo en klou ki'n deza geri,

¹⁹ e ki dan sa landrwa i devlop en lanflir blan oubyen en tas blan tire lo rouz, i devre montre li avek en pret.

²⁰ Sa pret ava egzamin li. Si i paret ki i fer en kre dan son lapo e ki son pwal i vin blan, alor pret ava deklar sa dimoun enpir: En maladi parey lalep in devlop dan sa klou.

²¹ Me si ler pret i egzamin li, son pwal pa blan e napa en kre dan son lapo, me i annan en kouler pal, alor pret ava izol li pandan set zour.

²² Si sa tas i fannen lo son lapo, alor pret ava deklar li enpir; i en ka lalep.

²³ Me si sa tas i reste dan menm landrwa san fannen, sa i zis en sikatris sa klou; pret ava deklar li pir.

²⁴ Si en dimoun in ganny brile e en tas blan tire lo rouz oubyen blan i paret dan laser ovif,

²⁵ pret i devre egzamin li. Si pwal kot sa tas in vin blan e i annan en kre, alor, sa i en maladi parey lalep ki'n devlop dan sa brilir, e sa pret ava deklar li enpir; i en maladi parey lalep.

²⁶ Me si ler pret i egzamin li, sa pwal dan sa tas pa'n vin blan, e napa en kre dan son lapo, me in pran en kouler pal, pret ava met li dan en landrwa izole pandan set zour.

²⁷ Setyenm zour, pret ava egzamin li ankor; si maladi pe fannen lo lapo, alor pret ava deklar li enpir; i en maladi ki parey lalep.

²⁸ Me si sa tas i reste dan menm landrwa san fannen, e i pran en kouler pal, i zis anfle akoz sa brilir, pret ava deklar li pir akoz sa i zis sikatris sa brilir.

²⁹ Kan en zonm oubyen en fanm i ganny en serten maladi lo son latet oubyen lo son manton,

³⁰ en pret ava egzamin sa landrwa malad. Si i fer en kre dan son lapo e son pwal i kouler zonn pal e napa bokou pwal, pret ava deklar sa dimoun enpir; i en dart, en maladi lapo ki parey lalep lo latet oubyen lo manton.

³¹ Si ler pret i egzamin sa dart, i remarke ki sa boubou pa'n fouy en trou dan lapo e ki napa pwal nwanr ladan, pret ava met sa malad dan en landrwa izole pandan set zour.

³² Setyenm zour, pret ava egzamin sa dart. Si sa boubou pa'n agrandi, e napa okenn pwal zonn ladan, e i paret ki sa dart pa'n al pli profon,

³³ alor, i ava raz son latet, me pa kot sa boubou. Pret ava izol li pour ankor set zour.

³⁴ Setyenm zour, pret ava egzamin sa dart. Si sa boubou pa'n agrandi e i pa paret ki i'n al pli profon dan lapo sa malad, pret ava deklar li pir. I ava lav son lenz e i ava vin pir.

³⁵ Me si sa dart i grandi dan lapo apre ki sa malad i'n ganny deklare pir,

³⁶ pret ava egzamin li. Si sa dart in agrandi, i pa neseser ki sa pret i rod pwal zonn; sa dimoun i enpir.

³⁷ Me si dapre li, sa dart pa pli grav e pwal nwanr in pouse ladan, alor, dart in geri, e sa dimoun i pir. Pret ava deklar li pir.

³⁸ Kan en zonm oubyen en fanm, i war bann tas blan aparet lo son lekor,

³⁹ pret ava egzamin li. Si sa bann tas lo lekor i kouler blan pal, si i annan en dekolorasyon lapo, sa dimoun i pir.

⁴⁰ Si en zonm i perdi son seve, i vin sov, me i pir.

⁴¹ Si i perdi son seve lo kote devan e lo latanp, i vin sov par devan, me i pir.

⁴² Me si en tas rouz i aparet lo son latet sov oubyen lo son fron kler, sa i en maladi parey lalep ki pe devlope.

⁴³ Pret ava egzamin li; si i trouv sa lenfeksyon lo son latet kler oubyen lo son fron en kouler blan tire lo rouz, ki resanble lalep,

⁴⁴ sa i en ka parey lalep; sa dimoun i enpir. Pret ava deklar li enpir; sa maladi i lo son latet.

⁴⁵ En dimoun ki annan en maladi ki parey lalep i devre met lenz desire, kit son seve fannen e kouver son labarb ziska kot son lalev anler, e kriye: Enpir! Enpir!

⁴⁶ I ava reste enpir toultan ki i annan sa maladi. I devre reste apar, son landrwa reste ava an deor kan.

Tas Mwazi lo Lenz

⁴⁷ Kan i annan tas mwazi lo en lenz, ki swa lenz lalenn oubyen linenn,

⁴⁸ latwal ouswa triko, linenn ouswa lalenn, an lapo ouswa nenport lobze an lapo;

⁴⁹ si sa tas lo sa lenz, lo latwal oubyen lo triko, lo okenn lobze an lapo i en kouler tire lo ver ouswa tire lo rouz, i tas maladi ki parey lalep e i devre ganny fer egzaminen par en pret.

⁵⁰ Pret ava egzamin sa tas e izol sa lobze kontaminen pandan set zour.

⁵¹ Setyenm zour, i ava egzamin li ankor. Si sa tas lo sa lenz, lo sa latwal, lo sa triko, ouswa lo sa lapo, nenport lobze lapo, in agrandi, i en tas ki parey lalep; sa lobze i enpir.

⁵² Pret ava bril sa lenz, latwal, triko lalenn, linenn, ouswa nenport lobze an lapo, akoz i en maladi ki parey lalep; e i devre ganny brile dan dife.

⁵³ Me si ler pret i egzamin sa dimoun, i remarke ki sa tas pa'n agrandi lo sa lenz, latwal, triko, okenn lobze an lapo,

⁵⁴ alor, i ava donn lord pour lav sa lobze e gard li izole pandan ankor set zour.

⁵⁵ Pret ava reegzamin sa lobze avek tas mwazi apre ki i'n ganny lave. Si sa tas i reste parey, menm si i pa'n agrandi, i enpir. I devre ganny brile dan dife, menm si sa tas mwazi i lo bon kote oubyen lo lanver.

⁵⁶ Si, ler pret pe egzamin li, i remarke ki sa tas in vin pal apre ki i'n ganny lave, i ava desir sa morso lenz kot sa tas mwazi i ete lo latwal, triko ouswa lapo.

⁵⁷ Si sa tas i paret ankor lo sa lenz latwal ouswa triko, ouswa nenport keksoz an lapo, e i agrandi, fodre bril sa lobze mwazi.

⁵⁸ En lenz, latwal ouswa triko, ouswa nenport lobze an lapo ki, ler in ganny lave, sa tas mwazi in disparet, ou ava lav li en dezyenm fwa e i ava pir.

⁵⁹ Sa i rityel konsernan tas ki parey lalep lo lenz lalenn ek linenn, ki swa latwal, triko, ouswa nenport lobze an lapo, pour determinen si i pir oubyen enpir.