Levitik 12 - Labib An Kreol Seselwa

Pirifikasyon en Fanm apre Lakousman

¹ SENYER ti koz avek Moiz:

² Dir avek pep Izrael: Ler en fanm ansent i ganny en garson, i ava enpir pandan set zour; i ava enpir parey dan letan son reg.

³ Wityenm zour, sa garson ava ganny sirkonsi.

⁴ Apre, sa manman ava pran ankor 33 zour pour li pirifye son disan. Fodre pa ki i tous okenn keksoz sen, ni antre dan sanktyer, ziska ki son letan pirifikasyon in konplete.

⁵ Si sa fanm i ganny en fiy, i pou enpir pandan de semenn, parey ler i ganny son reg; letan pirifikasyon son disan ava dire pandan 66 zour.

⁶ Kan son letan pirifikasyon ava'n fini, pour en garson oubyen en fiy, sa fanm ava anmenn en zenn mouton aze enn an devan lantre Latant Rankont kot pret pour ofer en sakrifis konplet, avek en pizon oubyen en tourtrel pour sakrifis pardon pese.

⁷ Pret ava ofer SENYER sa bann sakrifis e fer rityel pour pardon lo sa fanm ki ava ganny pirifye avek son pert disan. Sa i ava lalwa konsernan bann fanm ki ganny zanfan, ki swa en garson oubyen en fiy.

⁸ Si i napa mwayen pour anmenn en zenn mouton, i ava pran de tourtrel oubyen de pizon, enn pour en sakrifis konplet e lot pour en sakrifis pardon pese. Pret ava fer rityel pardon pour sa fanm ki ava ganny pirifye.