Levitik 1 - Labib An Kreol Seselwa

Sakrifis Konplet

¹ SENYER ti apel Moiz depi Latant Rankont. I ti ordonn li:

² Koz avek pep Izrael e dir zot: Kan en dimoun parmi zot, i oule ofer SENYER en sakrifis zannimo, i ava swazir en zannimo dan son troupo bef oubyen dan son troupo mouton oubyen kabri.

³ Si i ofer koman sakrifis konplet, en bef sorti dan son troupo, i ava swazir en mal san okenn defo. I ava ofer son sakrifis devan lantre Latant Rankont pour li ganny aksepte devan SENYER.

⁴ I ava poz son lanmen lo latet sa zannimo. Sa zannimo ava ganny aksepte dan son faver koman en lofrann pour pardon son pese.

⁵ I ava egorz sa zannimo devan SENYER. Alor bann pret, bann garson Aaron, ava prezant disan e asperz otour lotel ki dan lantre Latant Rankont.

⁶ I ava kros lapo sa zannimo e dekoup li an morso.

⁷ Bann garson pret Aaron ava alim dife lo lotel, e aranz dibwa lo dife.

⁸ Bann pret, bann garson Aaron ava depoz bann morso lavyann, latet ek lagres lo dibwa ki pe brile lo lotel.

⁹ Trip ek bann lapat ava ganny lave avek delo. Apre, en pret ava bril tousala lo lotel. Sa, i ava en sakrifis konplet, brile dan dife, ki anvoy en loder ki fer plezir SENYER.

¹⁰ Si en dimoun i ofer koman sakrifis konplet, en mouton oubyen en kabri ki sorti dan troupo, i ava ofer en mal san okenn defo.

¹¹ I ava egorz li lo kote Nor lotel devan SENYER, e bann pret, bann garson Aaron, ava asperz disan sa zannimo otour lotel.

¹² Sa mouton oubyen sa kabri ava ganny dekoupe an morso separe, avek son latet ek son lagres. En pret ava aranz bann morso lavyann lo dibwa ki pe brile lo lotel.

¹³ I ava lav trip ek bann lapat avek delo. Answit, en pret ava prezant tou e fer brile lo lotel. Sa i ava en sakrifis konplet, brile dan dife, ki anvoy en loder ki fer plezir SENYER.

¹⁴ Si en dimoun i ofer SENYER koman sakrifis konplet avek en zwazo, alor i ava ofer en tourtrel oubyen en pizon.

¹⁵ En pret ava anmenn sa zwazo devan lotel, koup son likou e bril li lo lotel; i ava les son disan koul lo kote lotel.

¹⁶ I ava tir son zabo ek sa ki ladan e zet deryer lotel, lo kote Les, la kot i rezerve pour lasann.

¹⁷ I ava fann sa zwazo an de ant son lezel, me san separ li an morso. Apre, sa pret ava bril li lo dibwa ki lo lotel. Sa i ava en sakrifis konplet, brile dan dife, ki anvoy en loder ki fer plezir SENYER.