Let Zid 1 - Labib An Kreol Seselwa

Salitasyon

¹ Sa let i sorti kot Zid, serviter Zezi-Kri, e frer Zak. Pour tou bann ki'n ganny apele par Bondye e ki viv dan lanmour Bondye Papa e ki ganny garde par Zezi-Kri.

² Mon demande ki Bondye ava akord zot pardon, lape ek lanmour annabondans.

Fo Lansennyman

³ Mon bann zanmi! Mon ti vreman anvi ekri zot konsernan lafwa ki nou partaze. Me mon ti santi mwan dan lobligasyon pour ekri deswit sa let pour ankouraz zot konbat pour lafwa ki ti ganny transmet en fwa pour tou, avek bann ki Bondye in swazir.

⁴ Annefe, i annan serten dimoun move ki'n antre sekretman parmi nou. Zot deform lansennyman konsernan lagras nou Bondye, pour zistifye zot lavi imoral. Zot rezet Zezi-Kri, nou sel Met e Senyer. Depi lontan, Lekritir in anons zot kondannasyon.

⁵ Menm si zot konn tousala tre byen, mon profite pour rapel zot ki mannyer Bondye ti sov pep Izrael kan i ti fer li sorti Lezip. Me apre i ti detri tou bann ki ti refize krwar dan li.

⁶ Mon rapel zot koman serten lanz ki pa ti satisfe avek pouvwar ki zot ti annan, ti abandonn zot prop demer. Alor, Bondye i'n gard zot ansennen pour touzour dan fernwanr, dan fon labim, pour sa gran zour zizman.

⁷ Rapel zot osi, sa ki ti arive avek Sodonm, Gomor ek bann lavil dan zalantour. Zot bann zabitan ti fer parey: Zot ti livre zot lekor dan bann akt seksyel imoral, ek bann akt kont natir. Zot ti ganny pinisyon dife eternel. Sa i en lavertisman serye pour tou dimoun.

⁸ Sa bann zonm pe konport zot dan menm fason: Zot swiv zot bann move manni; zot fer pese e sali zot prop lekor. Zot mepriz lotorite Bondye e ensilte bann kreatir ki viv dan laglwar lesyel.

⁹ Menm larkanz Mikael dan son diskisyon avek dyab konsernan lekor Moiz, pa ti oze kondann li. I ti zis dir: Senyer pou pini ou.

¹⁰ Me sa bann zonm pe ensilte sa ki zot pa konnen. Zot konn zis par zot lensten, parey zannimo sovaz. Sa pe fer zot maler.

¹¹ Maler lo zot! Zot in swiv menm semen ki Kaen. Pour larzan, zot in livre zot dan menm lerer ki Balaanm. Zot in ganny detri akoz zot in revolte parey Kore.

¹² Aprezan, prezans sa bann zonm in vin en skandal dan zot repa fraternel, kot zot vin zis ranpli zot vant san okenn laont. Zot parey bann nyaz ki divan i anmennen, me ki pa donn lapli. Zot parey bann pye dibwa ki pa prodwi okenn fri, menm pandan lasezon, e ki derasinen, i'n konpletman mor.

¹³ Zot fann zot bann aksyon degoutan parey bann gro laroul lanmer ki pe kras zot lekim. Zot parey bann zetwal filan, e Bondye in rezerv en plas pour zot dan fernwanr, dan profonder labim.

¹⁴ Depi lontan, Henok, setyenm desandan Adan, i'n profetize lo zot size, kan i ti dir: Senyer pe vin avek son bann dizenn milye lanz sen.

¹⁵ I pou egzers son zizman lo tou dimoun. I pou kondann tou bann peser pour tou zot bann move aksyon ki zot in komet, kan zot ti revolte kont Bondye; pour tou zot bann parol lensilt ki zot in dir kont li.

¹⁶ Sa bann zonm ki touzour mekontan, pe touzour plennyen. Zot pe viv dapre zot bann move dezir. Zot koz avek ensolans, e zot flat dimoun dan zot prop lentere.

Avertisman

¹⁷ Me zot, mon bann zanmi! Rapel zot bann parol ki zot in tande depi lontan par bann zapot nou Senyer Zezi-Kri.

¹⁸ Zot ti dir: Dan dernyen letan, pou annan bann moker, ki pou viv dapre zot prop move dezir.

¹⁹ Zot menm zot, sa bann foter dezord. Zot napa Lespri Bondye, me zot pe viv anba kontrol zot lensten.

²⁰ Me zot, mon bann zanmi! Kontinyen fer progre dan zot lafwa ki tre sen. Priy avek lapwisans Lespri Sen.

²¹ Reste dan lanmour Bondye, an atandan ki nou Senyer Zezi-Kri, dan son labonte, i donn zot lavi eternel.

²² Annan konpasyon pour bann ki doute.

²³ Sov zot e retir zot dan dife zizman. Anver lezot, montre konpasyon, me fer atansyon: Evit tou kontak, menm avek zot lenz ki'n tase par zot move lavi.

Louanz Final

²⁴ Pour sa enn ki anpes zot tonbe; ki kapab fer zot konparet san fot e dan lazwa devan son prezans glorye;

²⁵ pour li, sel Bondye, nou Sover par Zezi-Kri nou Senyer, nou rann glwar, grander, pwisans ek lotorite, depi touzour, aprezan e pour touzour. Amenn!