Let Zak 4 - Labib An Kreol Seselwa

Zanmi Lemonn, Lennmi Bondye

¹ Kote lager ek kerel parmi zot i sorti? Eski pa i rezilta zot pasyon ki konbat san pozman dan zot lekor?

² Zot oule keksoz, me zot pa kapab gannyen. Alor, zot pare pour touye. Zot anvi, me zot pa kapab gannyen. Alor, zot fer kerel ek lager. Zot pa ganny sa ki zot anvi, akoz zot pa konn demande.

³ E kan zot demande, zot pa gannyen akoz zot mal demande. Zot demann zis pour zot prop plezir.

⁴ Bann adilter ki zot ete! Pa zot konnen ki lanmour pour lemonn i lennmi Bondye? Alor, sa enn ki oule fer zanmi avek lemonn i lennmi Bondye.

⁵ Zot krwar ki Lekritir i koz pour nanryen kan i deklare: Bondye i reklanm avek zalouzi, lespri ki i'n met dan nou.

⁶ Me lagras ki Bondye i donnen i siperyer. Annefe, Lekritir i deklare: Bondye i reziste bann ki orgeye, me i donn son lagras bann ki annan limilite.

⁷ Alor, soumet zot kot Bondye, me reziste kont dyab e i ava sov lwen kot zot.

⁸ Apros avek Bondye, e i ava apros avek zot. Lav zot lanmen, zot ki komet pese! Pirifye zot leker, zot bann ipokrit!

⁹ Rekonnet zot lanmizer, plere e lamante! Sanz zot sourir an pler, zot lazwa an tristes.

¹⁰ Imilye zot devan Senyer e i ava elev zot.

Pa Ziz ou Frer

¹¹ Mon bann frer! Pa bezwen malparl kanmarad. Sa enn ki malparl son frer oubyen ziz son frer, i koz mal kont Lalwa, i pe ziz Lalwa. Si ou ziz Lalwa, ou nepli en pratikan Lalwa, me en ziz.

¹² Me i annan zis enn ki donn Lalwa e li menm ki ziz: Sa i sa enn ki kapab sove e detri. Me ou, ki ou ete pour ziz ou prosen?

Lavertisman kont Lorgey

¹³ Ekoute, zot ki dir: Ozordi, oubyen demen, nou pou al dan tel oubyen tel lavil. Nou pou pas enn an laba; nou pou fer komers e nou pou fer benefis.

¹⁴ Pourtan, zot pa ni menm konnen ki mannyer zot lavi pou ete demen. Kisisa zot lavi? Zot parey brouyar ki paret pour en pti moman e ki apre i disparet.

¹⁵ Okontrer, zot ti devre dir: Si Senyer i oule, nou ava viv e nou ava fer sa, oubyen sa.

¹⁶ Me ou, ki ou fer? Ou fer vantar! Sa kalite vantar i move.

¹⁷ Donk, sa enn ki konn fer sa ki byen me i pa fer li, i koupab; i komet en pese.