Let Zak 1 - Labib An Kreol Seselwa

¹ Sa let i sorti kot Zak, en serviter Bondye e Senyer Zezi-Kri: Pour sa 12 tribi disperse partou dan lemonn, meyer salitasyon!

Lafwa ek Lasazes

² Mon bann frer! Aksepte avek bonker, tou bann leprev ki zot pas ladan.

³ Annefe, zot konnen ki si zot lafwa i reziste dan leprev, i prodwi pasyans.

⁴ Me fodre ki zot pasyans i manifeste konpletman. Konmsa, zot ava vin parfe, san defo, e zot pa ava mank nanryen.

⁵ Si parmi zot i annan enn ki mank lasazes, ki i demande e Bondye ava donn li. Annefe, Bondye i donn tou dimoun zenerezman san fer okenn repros.

⁶ Me fodre ki i demann avek lafwa, san doute, akoz en dimoun ki doute i parey laroul lo lanmer ki divan i anmennen e pous dan tou direksyon.

⁷ Fodre pa ki sa dimoun i mazinen ki i pou ganny okenn keksoz avek Senyer.

⁸ Annefe, sa dimoun pa konnen kwa ki i pou swazir; i enserten dan sa ki i fer.

Lapovrete ek Larises

⁹ En frer ki pov, i devre santi li fyer ki Bondye in lev li anler.

¹⁰ Okontrer en frer ki ris, i devre santi li fyer si Bondye i abes li, akoz bann ris pou disparet parey plant sovaz:

¹¹ Soley i leve, son gro lasaler i bril sa plant; sa fler i tonbe e son labote i disparet. Demenm, en ris pou disparet dan milye son bann zafer.

Leprev ek Tantasyon

¹² I byennere sa enn ki reste ferm dan leprev. Annefe, apre ki i'n ganny teste, i pou resevwar kouronn laviktwar ki Bondye in promet tou bann ki kontan li.

¹³ Personn pa devre dir kan i ganny tante: Bondye ki'n tant mwan. Annefe, Bondye pa kapab ganny tante pour fer sa ki mal, e li menm i pa tant personn.

¹⁴ An realite, tou dimoun i ganny tante kan i les li ganny antrennen e atire par son prop move dezir.

¹⁵ Alor, en fwa ki move dezir in ganny formen, i donn nesans pese, e kan pese in devlope, i anmenn lanmor.

¹⁶ Mon bann frer byenneme! Pa les zot ganny anbete:

¹⁷ Tou don ekselan, tou kado parfe i sorti lao kot Bondye, Papa tou lalimyer ki pa zanmen sanze. Kot li napa menm lonbraz en sanzman.

¹⁸ Par son prop volonte, i'n donn nou lavi par sa Parol ki laverite. Konmsa, nou ava vin koman bann premye fri son bann kreatir.

Met Laparol an Pratik

¹⁹ Mon bann frer byenneme! Konpran sa byen: Zot devre pare pour ekoute; me pran letan avan koze, avan pran lakoler,

²⁰ akoz en dimoun ankoler pa realiz plan lazistis Bondye.

²¹ Alor, rezet tou bann salte dan zot lavi ek tou bann move mannyer viv. Aksepte avek douser parol ki Bondye in plant dan ou leker, akoz sa parol i annan pouvwar pou sov ou.

²² Pa bezwen tronp zot lekor: Pa zis ekout Parol Bondye; fodre osi met li an pratik.

²³ Sa enn ki zis ekout Laparol, me ki pa met li an pratik, i parey en zonm ki get li tel ki i ete dan laglas.

²⁴ Apre ki i'n byen war li dan laglas, i ale e oubliy deswit koman i ete.

²⁵ Me sa enn ki byen egzamin lalwa parfe ki rann nou lib e ki persevere; sa enn ki pa zis ekoute pour oubliye apre, me ki met sa lalwa parfe an pratik, Bondye pou beni li dan tou sa ki i fer.

²⁶ Sa enn ki krwar i relizye, si i pa kontrol son langaz, i pe anbet son lekor: Son relizyon pa vo nanryen.

²⁷ La sa ki Bondye Papa i konsider koman en relizyon pir e san defo: Pran swen bann orfelen ek bann vev dan zot detres; pa les ou ganny sali par salte sa monn.