Lamantasyon 3 - Labib An Kreol Seselwa

Bondye I Fidel

¹ Mwan menm sa zonm ki'n konn maler anba baton lakoler Bondye.

² I'n pous mwan devan li; i pa'n fer mwan mars dan lalimyer, me dan fernwanr.

³ Kont zis mwan, tou le zour i tourn son lakoler, i kontinyen tourmant mwan san pitye.

⁴ SENYER in mertri mon lekor antye. I'n kas tou mon bann lezo.

⁵ I'n serkle mwan, i'n soul mwan avek lanmertim e avek soufrans.

⁶ I'n fer mwan viv dan fernwanr, parey dimoun ki'n mor depi lontan.

⁷ SENYER in konstri en miray otour mwan, pour mwan pa kapab sove. I'n anmar mwan avek gro lasenn.

⁸ Mon kriye e mon demann son led; me i refize ekout mon lapriyer.

⁹ I'n bar mon semen avek bann gro ros; i'n fer devye mon larout.

¹⁰ SENYER in azir anver mwan parey en lours ki pare pour atake, parey en lyon ki'n kasyet dan brousay.

¹¹ I'n fer mwan perdi mon semen; i'n desir mwan e abandonn mwan.

¹² Son lark in pare pour tire e i'n viz son fles lo mwan.

¹³ SENYER in anfons son bann fles drwat dan mon leker.

¹⁴ Lepep antye pe riy mwan. Mon dan zot sanson tou lazournen.

¹⁵ I'n ranpli mwan avek zerb anmer; i'n donn mwan labsent pour bwar.

¹⁶ I'n fer mwan manz gravye ki'n kas mon ledan. I'n roul mwan dan lapousyer.

¹⁷ Mon nepli konnen kisisa lape. Mon nepli konnen ki savedir boner.

¹⁸ Alor, mon dir: Mon loner in disparet e tou mon lespwar dan SENYER in fini.

¹⁹ Mazin mon lapenn ek mon maler, konmsi margoz anmer ki mon'n manze e fyel ki mon'n bwar.

²⁰ Kan mon mazin tousala, mon tonm dan depresyon.

²¹ Pourtan, mon repran kouraz. La sa ki mon pe espere:

²² SENYER ava reste touzour fidel e son konpasyon pa pou zanmen fini.

²³ Tou le bomaten, son lanmour i nef! Ou fidelite i gran.

²⁴ Mon dir: SENYER i mon sel trezor. Alor, mon met tou mon lespwar dan li.

²⁵ SENYER i bon anver tou sa ki met son konfyans dan li; anver sa enn ki met son lespwar dan li.

²⁶ I bon ki nou esper an silans, delivrans ki sorti kot SENYER.

²⁷ I bon ki en zonm i anmenn son fardo depi letan son zenes.

²⁸ Dan lasoufrans, i devre asiz tousel e dan silans.

²⁹ I devre imilye li akoz i annan ankor lespwar.

³⁰ I devre donn lot lazou avek sa enn ki tap li; i devre aksepte ganny ensilte.

³¹ Annefe, SENYER pa pou rezet personn pour touzour.

³² Menm si i fer li soufer, i montre son konpasyon dan son gran fidelite.

³³ SENYER pa pran plezir fer nou soufer.

³⁴ Ler prizonnyen i ganny maltrete partou dan pei;

³⁵ ler drwa en imen i ganny abize devan Bondye Treo;

³⁶ SENYER pa i war, kan dan en zafer ankour, lazistis i ganny fose.

³⁷ Personn pa kapab fer keksoz arive san ki SENYER i deside.

³⁸ Tou sa ki arive, maler koman boner, i ariv par lavolonte Bondye Treo.

³⁹ Akoz en zonm i bezwen plennyen pour son bann pese ki i'n fer?

⁴⁰ Annou get byen nou mannyer viv e retourn ver SENYER.

⁴¹ Annou lev nou leker ek nou lanmen ver Bondye ki dan lesyel.

⁴² Nou'n fer pese e nou'n revolte kont ou; me ou pa'n pardonn nou.

⁴³ Ou'n anvlop ou dan ou lakoler; ou'n pourswiv nou e ou'n touy nou san pitye.

⁴⁴ Ou'n kasyet ou dan en nyaz, pour anpes nou lapriyer penetre ziska kot ou.

⁴⁵ Ou'n fer nou vin en ta salte, en bann lobze degoutan parmi lezot pep.

⁴⁶ Tou nou bann lennmi in ensilte nou.

⁴⁷ Lafreyer ek pyez in tonm lo nou. Tou in ganny devaste, tou in ganny detri.

⁴⁸ Akoz mon pep in ganny detri, mon lizye i deborde avek larm ki koule parey delo larivyer.

⁴⁹ Mon lizye pa pou aret plere,

⁵⁰ ziska ki, SENYER i gete depi lesyel koman lepep pe soufer.

⁵¹ Mon lizye i fer mal akoz sa ki'n arive avek bann zenn fiy mon lavil.

⁵² San okenn rezon, mon bann lennmi in pourswiv mwan parey en zwazo.

⁵³ Zot in zet mwan vivan dan en sitern; zot in saboul mwan avek ros.

⁵⁴ Ler delo ti mont par lao mon latet, mon ti dir: Mon pe noye.

⁵⁵ Depi dan fon mon sitern mon ti apel ou non, SENYER.

⁵⁶ Ou ti antann mon lapriyer: Pa bous ou zorey ler mon kriy osekour!

⁵⁷ Kan mon ti apel ou, ou ti vin pre avek mwan. Ou ti dir mwan: Pa per!

⁵⁸ SENYER! Ou'n pran mon defans; ou'n sov mon lavi.

⁵⁹ SENYER! Ou'n war ditor ki zot in fer mwan. Rann lazistis dan mon faver.

⁶⁰ Ou'n war tou zot vanzans; tou zot bann plan kont mwan.

⁶¹ SENYER! Ou'n antann zot bann ensilt, e tou zot bann konplo kont mwan.

⁶² Tou le zour zot koz lo mwan, e zot fer konplo kont mwan.

⁶³ Depi bomaten ziska aswar, zot fer sanson lo mwan.

⁶⁴ SENYER! Fer zot osi soufer pour sa ki zot in fer mwan.

⁶⁵ Pini zot, fer zot perdi lespwar.

⁶⁶ Dan ou lakoler pourswiv zot; fer zot disparet anba ou lesyel, SENYER.