Kolosyen 4 - Labib An Kreol Seselwa

¹ Bann met! Tret zot serviter dan en fason drwat e zis. Rapel zot ki zot osi, zot annan en Met dan lesyel.

Rekomandasyon

² Persevere dan lapriyer; reste vizilan dan lapriyer ki zot adres Bondye avek rekonesans

³ Anmenmtan, priy osi pour nou, pour ki Bondye i ouver en laport favorab pour nou proklanm son mesaz e anons sekre Kris. Annefe, pour sa rezon ki mon dan prizon ozordi.

⁴ Priye pour ki nou ava kapab proklanm sa sekre klerman koman mon fodre.

⁵ Fer tou keksoz avek lasazes dan zot konportman avek bann non-krwayan, e servi byen tou lokazyon ki prezant devan zot.

⁶ Veye ki zot parol i touzour agreab e enteresan, pour zot kapab donn bann repons valab tou dimoun.

Konpliman Final

⁷ Tisik, nou frer byenneme, ki en kolaborater fidel e en serviter dan travay Senyer ava donn zot tou nouvel lo mwan.

⁸ Pour sa rezon ki mon pe anvoy li kot zot, pour zot ganny nou nouvel, e pour li ankouraz zot.

⁹ Onezim, sa frer byenneme e fidel ki sorti kot zot, pe vin avek li. Sa de frer ava rakont zot tou sa ki pe arive isi.

¹⁰ Aristark, ki dan prizon avek mwan, i anvoy zot son konpliman, ensi ki Mark, kouzen Barnabas. Zot in deza ganny rekomandasyon pour byen resevwar Mark si i pas kot zot.

¹¹ Konpliman i osi sorti kot Zezi, ki osi apel Zistis. Zis sa trwa parmi bann Zwif konverti ki travay avek mwan pour Rwayonm Bondye; zot in en gran rekonfor pour mwan.

¹² Epafras osi ki sorti kot zot i fer zot salanm. Sa serviter Zezi-Kri pa zanmen aret lite pour zot dan lapriyer, pour ki zot reste solid, koman bann dimoun matir, dan lobeisans lavolonte Bondye dan tou.

¹³ Annefe, mon kapab dir personnelman ki i'n travay dir pour zot e pour bann ki reste Laodise ek Hierapolis.

¹⁴ Lik, nou zanmi dokter ek Demas osi i fer zot salanm.

¹⁵ Fer salanm bann frer Laodise, ensi ki Nenfa ek Legliz ki rasanble dan son lakaz.

¹⁶ Apre ki zot in lir sa let, fer sir ki zot lir li, osi dan Legliz ki Laodise. Lir osi let ki sorti Laodise.

¹⁷ Dir Arsip, fer sir ki i fer byen sa travay ki i'n ganny konfye dan servis Senyer.

¹⁸ Mon pe ekri sa let avek mon prop lanmen: Konpliman sorti kot Pol. Rapel zot ki mon ansennen dan prizon. Mon demande ki lagras Bondye ava avek zot tou.