Kolosyen 3 - Labib An Kreol Seselwa

¹ Par konsekan, si zot in resisite avek Kris, rod bann keksoz ki dan lesyel, kot Kris pe asize dan kote drwat Bondye.

² Fikse zot lespri lo bann keksoz ki dan lesyel, e non pa lo bann keksoz ki lo later.

³ Annefe, zot in mor e zot lavi i kasyet avek Kris, dan Bondye.

⁴ Kan Kris, zot vre lavi ava aparet, alor, zot osi, zot ava aparet avek li e pran par dan tou son laglwar.

Ansyen Lavi ek Nouvo Lavi

⁵ Alor, met anmor bann dezir materyel ki dan zot: Limoralite seksyel, lenpirte, pasyon, move dezir, lavaris (lavaris se idolatri).

⁶ Bann pese parey pou atir lakoler Bondye lo bann ki pa obei li.

⁷ Lontan, zot osi, zot ti viv konmsa, kan zot lavi ti ganny dominen par sa bann pese.

⁸ Me aprezan, debaras zot avek tousala: Lakoler, vyolans ek mesanste. Pa les okenn parol kalonmni ek parol obsenn sorti dan zot labous.

⁹ Pa koz manti ant zot, akoz zot in abandonn zot vye natir avek son bann move pratik.

¹⁰ Zot in pran en nouvo natir: Natir zonm nouvo ki tou letan, Bondye son Kreater, pe renouvle dan vre konnesans pour nou resanble li parfetman.

¹¹ Alor, i nepli annan okenn distenksyon ant Zwif ek non-Zwif; sirkonsi ek ensirkonsi. I nepli annan etranze ek non-sivilize, lesklav ek dimoun lib, me se Kris ki tou e dan tou.

¹² Alor, koman en pep ki Bondye in swazir, en pep konsakre pour li e ki i kontan, ranpli zot avek konpasyon, labonte, limilite, ladouser ek lapasyans.

¹³ Siport kanmarad, e pardonnen sak fwa ki enn parmi zot i ofans kanmarad. Parey Senyer ti pardonn zot, zot osi pardonn kanmarad.

¹⁴ Pardesi tou, annan lanmour ki soud ansanm tou keksoz parfetman dan larmoni.

¹⁵ Mon swete ki lape Kris i diriz zot leker. Annefe, se ver sa lape ki Kris in apel zot kan i ti fer zot vin en sel lekor. Montre zot touzour rekonesan.

¹⁶ Mon demande ki parol Kris i reste dan zot avek tou son larises. Enstri, e averti kanmarad avek lasazes. Avek rekonesans, loue Bondye avek psonm, kantik ek sanson enspire par Lespri.

¹⁷ Dan tou sa ki zot fer e dir, fer tou dan non Senyer Zezi. Par li, remersye Bondye nou Papa.

Konsey pour Relasyon Personnel

¹⁸ Fanm! Soumet zot avek zot mari parey fodre devan Senyer.

¹⁹ Mari! Kontan zot fanm e pa tret zot dir.

²⁰ Zanfan! Obei zot paran dan tou keksoz, akoz sa i fer plezir Senyer.

²¹ Papa! Pa provok zot bann zanfan; sa i kapab dekouraz zot.

²² Serviter! Obei zot bann met lo later dan tou keksoz. Pa fer li zis kan zot met i war zot, zis pour fer plezir, me fer li avek en leker senser, par respe pour Senyer.

²³ Dan tou sa ki zot fer, fer li avek tou zot leker, konmsi zot pe travay pour Senyer, pa pour zonm.

²⁴ Annefe, zot konnen ki zot pou resevwar an rekonpans bann byen ki Senyer in rezerve pour zot. Se nou Senyer, Kris, ki zot pe servi.

²⁵ Sak dimoun ki mal fer, pou pey pour lemal ki i'n fer, akoz Bondye pa fer preferans pour personn.