Kolosyen 2 - Labib An Kreol Seselwa

¹ Mon oule fer zot konnen ki mannyer mon pe lite pour zot, pour bann ki reste Laodise e pour tou bann ki pa konn mwan personnelman.

² Mon swete ki zot leker ava ranpli avek kouraz; ki zot reste ini dan lanmour, e posed tou bann larises konplet ki rezilta vre disernman. Konmsa, zot ava kapab konn sekre Bondye, setadir Kris li menm.

³ Dan li, tou bann trezor lasazes ek konnesans Bondye in ganny kasyet.

⁴ Mon dir zot sa, pour ki zot pa les personn tronp zot par bann zoli diskour.

⁵ Menm si mon pa avek zot an personn, mon avek zot an lespri, e mon rezoui pour war ki zot tenir ferm e reste solid dan zot lafwa dan Kris.

Lavi Konplet dan Kris

⁶ Alor, parey ki zot in aksepte Zezi-Kri koman Senyer, kontinyen reste atase avek li.

⁷ Viv anrasinen dan li; konstri zot lavi lo li; reste touzour pli ferm dan lafwa dapre sa lansennyman ki zot in resevwar, e montre ki zot ranpli avek rekonesans.

⁸ Fer atansyon ki zot pa ganny atrape par bann fo largiman filozofik, ki pa fonde lo Kris, me lo lasazes imen, lo tradisyon zonm, ek bann lespri ki kontrol lemonn.

⁹ Annefe, Kris i posed dan son lekor, tou natir konplet Bondye.

¹⁰ Zot osi, zot in resevwar lavi konplet dan Kris ki domin tou bann lotorite e tou bann pouvwar spirityel.

¹¹ Dan Kris zot in ganny sirkonsi, pa par en sirkonsizyon fer par lanmen zonm, me en sirkonsizyon ki sorti kot Kris e ki delivre nou kont pouvwar nou lekor peser.

¹² Annefe, kan zot ti ganny batize, zot ti'n ganny met dan tonbo avek Kris. Zot in krwar dan pwisans Bondye ki'n resisit li dan pouvwar bann mor.

¹³ Otrefwa, zot ti spirityelman mor akoz zot pese, e par zot ensirkonsizyon. Me aprezan, Bondye in redonn nou lavi avek Kris. I'n pardonn nou tou nou pese.

¹⁴ In efas sa lakt lakizasyon, avek tou son bann lobligasyon ki ti kont nou; in fer li disparet par klout li lo lakrwa.

¹⁵ Bondye in debaras li avek pouvwar bann lotorite ek pwisans bann lespri. In fer en spektak piblik avek zot dan laviktwar son Garson.

¹⁶ Pa les personn pas zizman lo zot konsernan sa ki zot manze oubyen bwar, konsernan bann zour lafet, nouvellin oubyen bann saba.

¹⁷ Tousala i zis lonbraz keksoz ki pou vini dan lavenir. Me se Kris ki larealite.

¹⁸ Pa les zot ganny kondannen par dimoun ki pran plezir dan bann fo pratik limilite, ek ladorasyon bann lanz e ki fer vantar dan fo vizyon. Par zot mannyer panse ki tro imen, sa bann dimoun i ranpli avek lorgey san okenn rezon.

¹⁹ Zot pa reste atase avek Kris ki latet. Annefe, latet ki kontrol lekor antye e ki donn li tou sa ki neseser. Par li, tou i reste ini ansanm: Son bann zwentir, artikilasyon, ek misk, tou ansanm, Bondye ki fer li grandi.

Mor e Resisite avek Kris

²⁰ Si zot in mor avek Kris, zot in ganny libere avek bann lespri ki kontrol lemonn. Alor, akoz zot pe viv konmsi zot ankor fer parti lemonn e aksepte bann regleman ki ganny enpoze lo zot:

²¹ Pa pran sa; pa gout sa; pa tous sa?

²² Tousala, i konsern bann keksoz ki tanporer, akoz zot en bann regleman ek en bann lansennyman pirman imen.

²³ I vre ki sa bann regleman i kapab annan laparans lasazes: Devosyon personnel, limilite ek tretman strik anver son lekor. Me zot napa okenn vre valer. Tousala i zis pour satisfer bann dezir imen.