Habakouk 3 - Labib An Kreol Seselwa

Lapriyer Habakouk

¹ Lapriyer profet Habakouk dan laform en kantik dey.

² SENYER! Mon'n antann koz lo ou bann mervey. SENYER! Mon tranble devan ou bann gran aksyon. Pandan ki nou ankor vivan, fer ankor sa bann mervey. Fer zot ganny konnen! Me dan ou lakoler, pa oubliy ou konpasyon.

³ Bondye i sorti Temann! Bondye sen i sorti dan montanny Parann! Son laglwar i kouver lesyel e son louanz i ranpli later!

⁴ I klere parey lalimyer soley. Bann reyon i sorti dan son lanmen, la kot i kasyet son pwisans.

⁵ Devan li, en lepidemi pe avanse; deryer li, en lafyev i swiv dan son lepa.

⁶ Kan i arete, later i tranble. I get bann nasyon, zot tranble. Bann montanny ansyen i fann an de; bann kolin ek bann santye ki la depi lontan, zot afese; zot ki otrefwa ti son semen.

⁷ Mon war bann latant Kousann ki'n aplati, pep Madyanit pe tranble avek lafreyer.

⁸ SENYER! Eski ou gran lakoler ti kont bann larivyer? Alor, ou gran lakoler i kont bann larivyer e kont lanmer, kan ou mont lo ou bann seval ek ou bann kales pour laviktwar.

⁹ Ou prepar ou fles; ou bann parol i parey bann dart. Ou fer later ouver e larivyer i aparet.

¹⁰ Bann montanny i war ou, zot tranble avek lafreyer. Lapli i tonm avek lafors; losean i ronfle. I anvoy son laroul anler.

¹¹ Soley ek lalin i reste san bouze devan lalimyer ou bann dart, devan zekler ou bann lans.

¹² Ou travers later dan lakoler; ou kraz bann nasyon par ou lakoler.

¹³ Ou sorti pour sov ou pep, pour sov sa enn ki ou'n konsakre. Ou detri sef klan bann malfeter. Ou detri zot konpletman.

¹⁴ Ou pers latet bann sef son bann gerye avek zot prop dart. Zot arive parey siklonn, pour sas nou dan tou kote. Zot kriye avek lazwa, konmsi pour devor en pov ki ti'n kasyet dan son trou.

¹⁵ Ou avans dan lanmer avek ou bann seval, atraver bann gro laroul.

¹⁶ Mon tande e mon tranble dan mwan menm; sa tapaz i fer mon lalev tranble; mon bann lezo pe pouri; mon lazanm i tranble. Dan silans, mon atann zour maler, pour fer fas avek sa pep ki vin atak nou.

¹⁷ Pye fig nepli fleri; plantasyon rezen nepli donn rezen; pye zoliv nepli donn zoliv; bann plantasyon dible nepli donn dekwa manze.

¹⁸ Sepandan, mon pou dan lazwa akoz SENYER; mon pou zwaye akoz Bondye i mon sover.

¹⁹ BONDYE i mon Senyer, li menm mon lafors: I rann mon lipye parey lipye gazel; i fer mwan taye e sote lo bann oter. Pour sef lakoral: Avek bann lenstriman lakord.